قصص عراقية حقيقية بقلم ابو بغداد سائق التكسي المجموعة الثانية

نور حمامة الجنه

حملت و جانت فرحتنه اني و زوجي متنوصف .. و بكل ليله من نخلي راسنه عالمخده نتخيل شلون راح يجي الطفل و شلون يخطي خطواته الاولى … و قررنا اسم الطفل .. و چنه نتعارك اني وياه بالشقى لان هو يريد اسم واني اريد اسم … و چنه نتخيل شلون راح يفززنه من النوم بصياحه و بچيه و گمنه نوزع الواجبات … و كل هالحچي چان من باب التخيلات و الاحلام … و اجتي نور … نور انولدت بشلل رباعي .. صدمه چبيره اليا و لزوجي بس شنسوي هاي قسمتنه … و بدينه رحلة علاجها و العلاج الطبيعي من الصفر … اول سنتين چانت عادي بس من بدت تكبر نور زوجي يوم ورى يوم گام يتحسس خصوصا هي تقضي حاجتها جواها (مكرم القارئ) و طبعا اكو فرق بين حاجة الطفل و حاجة الي يكبر .. المصاريف زادت و اني لا شغل و لا عمل و بيتنا ايجار … و طبعا بعد نور سبحان الله عبالك رب العالمين يعرف راح يصير شي … بحيث الحمل بكل مره يخرب … و صار عند زوجي برود تجاهي و گام ينام بالصاله لان نور تبچي هواي و هو ما يتحمل صوتها و يكول عندي شغل … و وصلت بي يضربها اكثر من مره و هي خطية حبيبتي لا فهم و لا علم و يضربها وهي تضحك … و اني چنت ادافع عنها و يضربني … الى ان اجه يوم طلگني و هو عاف البيت و راح تزوج وحده و سكن وياها … اني بقيت وحدي بهل البيت لا شغل لا عمل لا شهادة و اهلي ١١ نفر ببيت مساحته سبعين متر و ابويه حارس عقار و جانو يساعدوني بس كلش قليل … زين شسوي و شلون اعيش و شلون ادفع ايجار البيت و تكاليف نور .. اهل الخير بالمنطقه گامو يساعدوني … و بديت اخبز للناس و مرات اروح انظف بيوت والله العظيم و ايدي على گلبي نور شلون باقيه وحدها … وتعبت كلش لان وحدي وياها وهي خطية متفتهم شي … بس چنت اعرف هي تحس بيا و تحس بتعبي و لان تحس بيا راحت نور … راحت حتى تخلصني من هالتعب … والله العظيم ماتت وهي تضحك … و روحها الغالية تضحك … تضحك لان راح تخلصني من هالتعب و المسؤولية … من ماتت يومين اني حاضنتها و ما اقبل ادفنها بس نسوان المنطقه جروني جر منها و حبسوني و طلعوها من البيت … كمت ابوس ايدناتهم اگلهم اني اغسلها لان متعلمه على ايدي و لهذا عمرها اني اسبحها فدوه عوفوني اغسل نور … و خلوني اغسلها … اجه ابوها يبچي و اني اضحك اگله راحت نور راحت … راحت مو چنت تضوج من صوتها و عفتني و تزوجت .. يله راحت … و دفنوها لحبيبتي … و رجعت لبيت اهلي … و حاليا اني عباره عن بشر ينتظر شوكت يموت حتى ارجع التقي بيها و الي مفرحني بهل الدنيا يكولون نور فوك رجعت طبيعية يعني راح تحاجيني و نكعد سوى و نسولف …
(نور حمامة الجنه)
انتهى
اخوكم ابو بغداد سايق التكسي
#ابو_بغداد