قصص عراقية حقيقية بقلم ابو بغداد سائق التكسي المجموعة الثانية

ورود

كل الاشياء الي نحبها راح نشوف بيها صورة للي نحبه … مثلا جنت اشوفها بالشوارع المبلله بقطرات المطر … جنت اشوفها بأوراق الاشجار الي توكع بفصل الخريف .. جنت اتخيلها موجوده من اشتم ريحة التراب المختلطة بقطرات المطر … حتى الشوارع الي احبها و احس كلبي ينفتح من افوت بيها جنت اشوفها هناك … بكل صورة بحر جنت اشوفها لان احب البحر بس ابد مرايحله … يوميا ورى ساعة ثمانية ونص اكوم ابدل عبالك رايح لحفلة مسويها على شرف حضوري .. و اخلي عطر و اطلع اتمشى لنهاية الشارع تقريبا ١٦ دقيقة … اوصل لمحل ينشاف من بعيد .. المحل صغير كلش و الكلوب الاصفر مالته واضح من بعيد … هالمحل مال رجال جبير بالعمر .. دائما يكعد جوى بالمحل و لاف يشماغ على ركبته و لابس سترة رصاصية و جوى السترة دشداشة نيلي … و مناظر طبيه … جان اسمه ابو حسن … يبيع شغلات بسيطة .. لفات حب و جكاير و علوجه و حلويات مال اطفال و نساتل وحلقوم و ليف مال سبح و سفنجات مال غسل مواعين و سيم مواعين .. و طوبات نايلون … و برى اكو خشبة مدكوكة عالحايط هاي هدفي بهل الروحه .. لان فوك هالخشبة اكو جهاز تلفون ابيض .. التلفون بي مربع صغير مثل الكزازة .. بس هالكزازة جانت عبارة عن بلاستك شفاف و جواها ورقة  .. ينكتب رقم التلفون عليها و تتشكل هالبلاستكه فوك الرقم .. جانو اغلب العراقيين بذاك الوقت يخلون بي صورة شخصية لشخص فاقدي او لطفل صغير .. جان اكو صورة لأخو لابو حسن متوفي هو وصغير .. سبب وفاته الغرق .. الف رحمه على روحه صورته لحد هاللحظة براسي هلكد ما استخدمت هالتلفون … جان يعرفني اسلم عليه و شوية احجي وياه و اسأله عن صحته و الزم التلفون و اخابرها … احجيلها مقتطفات عن يومي … و اخذ جرعتي المتعود عليها … جانت عبارة عن احبك ..
هاي اذا اسمعها منها يومي كل الخير يصيبه … ولو هو نهاية يوم بس هم هالجرعه تمشيني و تخليني انام على حلم هي بيوم من الايام راح تصير وياي … ورى ما اخلص التلفون يسألني ابو حسن .. ها شلونها و وي السوال ابتسامة خفيفة … اكله زينه … بيوم من الايام سألني ابو حسن كالي انته ما تمل يوميا تجي من يم صيدلية الاخلاص لهنا مشي علمود تحجي بالتلفون ؟؟
كلتله لا ما أمل … كال هيج تحبها .. كلتله اي والله … كالي تزوجها اذا تحبها … كلتله حاليا ما اكدر بس كاعد ارتب نفسي على هالموضوع .. كال الله يفتحها بوجهك .. ولان رجال جبير يعجبه يسولف .. سألني شلون تعرفت عليها … كلتله جنت اشتغل بحلاقة بالمنصور .. حلاق .. مقابيلنا اكو عمارة بيها فوك دكتور و مركز مال تحليل … هي جانت شغل بالمركز مال تحليل .. جان عدها برازيلي .. هي مال والدها بس معلمها سياقة و تروح وتجي بيها للدوام … جنت اباوع عليها من بعيد لبعيد و كل متجي اطلع برى اوكف احاول اشوفها نفسي بس جانت عبالك انسان ألي مبرمجه تنزل من السيارة و كبل تصعد فوك … لا تباوع يمين و لا تباوع يسار … و جربت هالشي اكثر من مرة و ولا مرة دارت وجهها عليا … أخر شي كمت اخذ يوميا ورده من حديقتنا و اخليها بالضبط يم الماسحة مال الجامة الامامية مال سيارتها … و خلصت الورد مال حديقتنا انوب انداريت على حدايق الجوارين … جنت اراقبها من تنزل من العمارة ورى نهاية الدوام … بالبداية جانت تباوع يمين يسار و تشمرها … بعدين كامت تبتسم و تاخذها وياها للسيارة … فد يوم تشجعت و كتبت ورقة و لفيتها على ورده … كتبت بيها .. تصدكين هالشي اول مرة اسوي بحياتي … و انتي ترى اصلا متعرفيني و خليت حرفي … طبعا المكان مال السيارة الحلو بي مينشاف ابد عن طريق العمارة الي هي تداوم بيها … يعني متكدر تراقب من فوك واني جنت اسوي هالشغلة بسرعة بسرعة ..
يعني افوت اسوي نفسي داتمشى و اخليها و اكمل طريقي .. هالحركة اني اصلا شفتها بفلم اجنبي قديم بس جان يسويها مقابيل باب بيتها و يدك الجرص … اني كمت اسويها على سيارتها … و بيوم من الايام جتي مشي .. اني اعرف وقت دوامها شوكت و اعرف وقت نهاية دوامها شوكت … قبل ميبدي دوامها بقيت اراقب شوكت تجي بالسيارة … بس شفتها جتي مشي … عرفت هاليوم جانت مغيرة مكان السيارة .. استأذنت من ابو المحل و رحت من طريق المكان الي جتي بي و شفت سيارتها … طبعا الحلو بهل المكان جان بعيد عن عيون الناس .. هالمرة شسويت رفعت وحده من الماسحات و شديت الوردة بالماسحة … طبعا بس هالشي سويته حتى اثبت انو اني موجود و اطلعلها حتى لو غيرت مكان السيارة و طبعا بالبداية من اندليت مكان السيارة رجعت للمحل بسرعة جبت خيط من بكرة الحف و رجعت … سويت الموضوع و رجعت و خليت ورقة كتبت بيها (الي يهتملك يوصلك ميهمه لا الزمان و لا المكان) و هم كتبت حرفي … و طبعا هالحجي اني خلصت ورد حديقتنا و كمت استحي اطلب من الجوارين .. انوب صار عندي شغل ثاني هو اطلع اتمشى بمكانات بيها حدايق خارجية و هالشي مجان صعب بس الصعب من اروح اكطع الوردة .. شوية جان الموقف بالنسبة الي مخيف على مخجل .. بس هم علمودها سويته .. و ثاني يوم رحت اخلي وردة لكيت هالمرة هي مخليتلي ورقة … كاتبتلي انت منو و ما تمل ؟؟؟؟؟؟؟؟؟
طبعا اني جنت كاتب بالورقة اصلا كلام بس من لكيت ورقتها رجعت للمحل كتبت ورقة ثانية .. كتبت بيها اني ما امل و لو ابقى اسوي هالشي طول العمر بدون منحجي هم قابل المهم ازرع الابتسامة بوجهج .. و رجعت كتبتلي ورقة سوي الي تسوي بس نهايته شنو ؟ … و هم جبت ورده و كتبتلها خير نهايته خير … و اخير شي قررت احاجيها .. و رحت انتظرها بنفس المكان الي تطبك بي السيارة لان غيرت مكانها نهائي … طبكت السيارة و شافتني واكف .. الغريب ابتسمت من شافتني عبالك تعرفني .. واني اصلا لا كتبت راح اجي اوكف بنفس مكان الي تخلين بي السيارة و لا اي شي .. اصلا هيج مفاجاة قررت .. و نزلت من السيارة كالت اعرفك اني اعرفك .. اني بساعتها فد خجلت .. كلتلها منين تعرفيني .. كالت انته الحلاق الي بالمحل الي كبالنا .. كلتلها يعني شايفتني .. كالت هو انت كل ما اجي جنت توكف برى و اصلا شكيت اني بيك و بثنين بعد .. كلتلها منو الاثنين ؟؟ كالت واحد ويانا يشتغل و الثاني ابو المحل مال غذائية الي مرات اتسوك منه من ارجع للبيت و هم قريب من حلاقتكم .. كلتلها لا اني .. كالت شوف الوقت ضيق و لازم اروح .. نهاية الي دتسوي شنو ؟؟؟
كلتلها خير والله خير .. بس اريد اطلب تسمعيني .. كالت زين شلون تريد نسوي هالشي ؟؟
كلتلها تلفون  … كالت انطيني رقمك .. كلتلها ماعندي تلفون ارضي بالبيت بس اريد رقمج انتي اذا امكن .. كالت زين خلي نشوف نهايتها وياك بس اهم شي تخابرني ورى تسعة بليل .. لان تكون مخلصة دوامها .. و طبعا هالوقت الي يناسبني هم لان اني حدي للتسعة و ارجع للبيت .. كلتلها زين و اخذت رقمها .. و ثاني يوم اتصلت بيها .. عرفت انو هي عدها خوات ثنين بعد وهي الجبيرة .. و عرفت انو ابوها رجل مثقف كلش و متقاعد و يكظي يومه دائما برى البيت يم جماعته بالمنطقة .. و والدتها متوفية .. وطبعا وضعهم المادي نكدر نكول متوسط .. و عرفتها عن نفسي .. وكلتلها اني معجب بيها صار فترة و جنت اراقبها و طلعت اصلا شايفتني اباوع من تجي و من تروح بس متخليني انتبه .. و عجبها اهتمامي بهل التفاصيل و كالتلي بصراحة اني عبالي اغلب الشباب حمشين مو مال سوالف رومانسية و هيج تفاصيل … و طبعا اذا تذكر عمي ابو حسن جنت قبل اجي يمك ورى التسعة و هسه كمت اجي قبل التسعة .. كالي صح .. كلتله مو اول شي اني بطلت من الحلاقة و داشتغل غير شغلة و ثاني شي هي هم تركت شغلها و كاعدة بالبيت حاليا … كالي و الحل شنو .. كلتله اني داجمع حتى افتح حلاقة لوحدي هنا بالمنطقة .. و بس ابدي اشتغل اروح اتقدملها حتى ابين كبال ابوها عندي مصدر رزق ثابت و اكدر افتح بيت … كالي زين عندي اقتراح .. كلتله شنو ؟؟
كال ابني حسن مدوخني و مدوخ امه .. كلتله اي و طبعا بيني و بين نفسي كلت هذا يمكن مخرف المسكين اني وين داحجي و هو وين يحجي بس بقيت اجاري بالحجي .. كلتله زين ؟؟ كال يلتقي وي شباب يشربون وهو هم يشرب مرات و اني و امه كبار و هو الجبير و ما فالح لا بشغل و لا بدراسة … كلتله اي ؟؟ كال شنو رأيك نسوي اتفاق .. كلتله شنو .. كال انته مجمع فلوس حتى تفتح بي الحلاقة ؟؟ كلتله اي يعني مبلغ بس مو جبير لان يرادلي محل سر قفلية .. كالي زين .. كلي شكد عندك و اني اخلي فلوس فوك فلوسك و انته بعدين على كيفك رجعلي الفلوس من المحل يبدي يشتغل و يصير عندك معاميل بس عندي شرط واحد .. كلتله شنو ؟؟ كال حسن امانتك اريد منك تعلمه حلاقه و تطلعه حلاق … كلتله انته صدك تحجي .. كال اي والله .. لا عبالك اني مفتح هالمحل علمود اعيشه منه .. اني مسوي هالمحل حتى بس التهي .. ترى اني الحمدلله عندي راتبي و راتب زوجتي و عندي الحمدلله بيت ثاني ورثته من ابوية و البيت الثاني مأجره و ايجارة زين و عايشين بس اني ممتعلم اكعد .. ورى التقاعد سويت هالمحل حتى التهي … كلتله يله اني قابل بس خلي اشوف حسن .. و التقيت بحسن .. طبعا حسن خوش ولد بس مشكلته عود من ذولة النافخين روحهم و يشمرون بالحجي بس هو عبارة عن سماعة .. يعني متروس هوى … و التقيت بي و حاجيته بس طلع يسمع كلام الغريب بس اهله ميسمع كلامهم و هالشي وي هواي شباب اشوفه حتى وي ناس اشتغلت وياهم … كلام اهلهم ابد ميهتملوه بس خلي غريب يكلهم نفس كلام اهلهم يسمعووووه و يطبقوووه حرفيا … و الولد سمع كلامي و بدينا صدك بموضوع المحل و فتحتا و خليت بي اربع كراسي … و بدينا نشتغل ولان اني ابن المنطقة و اعرفها من الطول للطول … كامو يجون مرات يسلمون لو يكعدون و من هالباب بديت اجمع زبائن و معاميل و طبعا حسن طلع ذكي تعلم شغل … بالمناسبة ابو حسن جان ذكي كلش .. ابد ما كال لحسن هو مكمل على فلوس المحل حتى لا يحس هو يملك المحل حاله من حالي …
و طبعا بديت شوية شوية اوفي الدين و الحمدلله كدرت اوفي الدين بزمن قياسي .. و رحت تقدمت للبنية .. ابوها بالبداية جان عنده رفض بس مو قطعي و نهائي على موضوع الشهادة .. بس كال اول و تالي هالشي يخصها .. و طبعا هي وافقت .. و بطلت اروح يوميا لأبو حسن حتى اخابر .. بس جنت اروحله زيارات شبه اسبوعية اني و زوجتي و طبعا اخذها مشي .. اكلها جنت يوميا اقطع هالمسافة .. و بكل خطوة امشيها احظر كلمات و جمل حتى احجيها الج .. و مرات ابقى ادندن بكلمات اغنية الي راح اكلج اذا طلعت بالتلفزيون عود سمعيها و تذكريني …
جنت كل ما احجيلها هي تفاصيل تحضن ايدي قووي .. و تكلي احبك .. و حتى من عبرت السنة الاولى زواج و صار عدها حمل .. هم جنت اخذها نمشي و نسولف .. و جنت احاجي علاوي الي مجان جاي للدنيا و بعده ببطنها.. اكله  شوف حبيبي ابوك شكد تعب .. جان يوميا يمشي هالمسافة حتى بس يحاجي امك .. اريدك تطلع مثلي .. اذا ردت شي لا تهتم للظروف .. اذا حبيت لا تتهتم للتفاصيل الجانبية ركز بلي تحبه .. اقفل عليه .. عوف الجوانب السلبية و لا تطلع مشاكل و حجج .. ركز و بالنهاية راح يصير من نصيبك .. (اذا) انته رايده من صدك راح يصير الك .. و اخيرا .. الله يرحم عمي ابو حسن و يرحم اخوه لان هالحجي قديم كله  … و يحفظلي ام علي و علاوي و باقي الجهال .. و يرزقني و يرزق كل الناس بالخير و البركة و الصحة …
(ورود)
انتهى
اخوكم ابو بغداد سايق التكسي
#ابوـبغداد