قصص عراقية حقيقية بقلم ابو بغداد سائق التكسي المجموعة الثانية

وضع خاص

بالدوام اكو موظفة صغيرة ويانه … هالموظفة صغيرة بالعمر و صغيرة بالحجم … لسانها كلش حلو وي المراجعين و حتى ويانه احنا الموظفين الي وياها بالقسم … ابد مترجع احد و تحاول تساعد الكل … و احلى شي بيها التواضع … كلش متواضعه … و الكل يحبها و هي شكلها كلش جميل و لبسها كلش بسيط … اني لان عاجبتني جنت مركز وياها بشكل مو طبيعي … يعني اشوف تعامل المراجعين وياها و احنا بمجتمع شرقي اكيد شبابنه ميكعدون راحه و هي البنية حلوة … بس هي ابد متنطي وجه لهل الامور … و طبعا لان اني جنت جاي جديد للدائرة و بعدني مداخل بمرحلة الميانه وي الموظفين … جنت متردد اسال عنها … بس يوم ورى يوم من تأقلمت وي الموظفين و صار بيني و بينهم ميانه و تلفونات … سالتهم عليها … كالو تدري ثنين تقدمولها موظفين ويانه و اكبر منها شوية بالعمر بس هي ما قبلت … كلتلهم ممعقولة ليش متقبل اكيد عدها علاقة لو تحب واحد … كالو والله ما ندري .. طبعا البنية ما بيها غلطة و الله العظيم شكلها كلش قريب من المطربة ماجدة الرومي بشبابها … اني هم تقريبا صرفت نظر عن الموضوع بس كلت خلي اجرب ادخل وياها بسالفة صداقة و اتقرب منها بس تقرب طبيعي … اني اصلا بيني و بينها حجي بس حجي قليل … و بديت احاول بس هي كلش ذكية من حست بهل الشي بدت تقلل كلامها وياي .. اني كلت بيني و بين نفسي خلص … خلي احتفظ بكرامتي لا تسمعني كلمة محلوة … و رجعت اتعامل وياها مثل قبل … و بيوم من الايام هي اختفت و الموظفات عرفو انو ابوها توفى .. رحنا للفاتحة و ورى الفاتحة بكم يوم بالدوام انفتح موضوع عليها و كالو خلص بعد مراح تجي للدوام … يمعودين يا ما تجي صدك جذب ليش … الموظفة الي نقلت الموضوع اسمها ام حسن … ام حسن مريه جبيرة بالعمر و كلش محترمة … رحت عليها و سالتها …. كالت ابني نور موضوعها جبير و الله يساعدها و يرزقها … كلتلها خير شكو ؟؟؟
كالت  نور عدها وضع خاص … يابه غير افتهم شنو الموضوع الخاص … كالت مو البنية متقبل احجي هالتفاصيل و لو ما رحت للفاتحة و شفت بعيني الوضع جان ما عرفنا … كلتلها احجي الله عليج … كالت ام نور متوفية قبل خمس سنوات … ام نور هي الي جانت تعتني بحمودي … و ورى ما توفت ابوها الي توفى قبل كم يوم هو الي لزم مسوولية حمودي و هسه ما بقى احد لحمودي … بس نور … كلتلها ليش شبي حمودي … كالت حمودي عنده خلل عقلي من الولادة و مينعاف وحده ابد … كلتلها يا ستار ياربي … و شلون راح تعيش البنية هسه … كالت الله يرحمه جان موظف طول عمره و راتبه التقاعدي زين و عدهم بيت صغير من عده هالبيت العايشين بي … مأجري و ايجاره زين … يعني البنية مراح تحتاج شي … بس احنا هم مراح نعوفها لان هي مثل بنتنه … طبعا بيومها بقيت بالدوام دايخ و كمت اربط التفاصيل براسي .. و عرفت هي ليش مجانت تقبل تدخل بعلاقة لو ترتبط لان متكدر تعوف ابوها و اخوها … لان مستحيل اكو واحد يتزوجها و يكلها ابقي داري ابوج و اخوج لو نبقى يمهم … و كمت بين فترة و فترة اروح وي الموظفين لبيتها و خطية تشيلنه بالصلوات من نروحلها و تحير شتسويلنه … واني جنت من الصبح لليل افكر بيها … ابد متروح من بالي و دائما اصفن بيها و اكول هاي صدك تسوى واحد ياخذها لان بنت اصول و حليبها طاهر .. و رحت لام حسن حاجيتها … كالت ابني متقبل لان مترهم … كلتلها اني قابل … طبعا بوقتها سالت ليش متجيب احد يداري تكول وصية امها قبل متتوفى منجيب احد يداري حمودي لان مستحيل احد راح يكون حنين عليه مثل امه و ابوه لو اخته … و بقيت ادز ام حسن بين فترة و فترة و متقبل … و طبعا هي جانت زعلانه على ام حسن لان كالتلي على موضوع حمودي … و كايلتلها هذا مقهور على وضعي مو حابني .. ام حسن كالتلها هو اصلا من البداية محاول وياج قبل ميعرف شنو وضعج الخاص … و مره مرتين اربعه .. و بالاخير قبلت بس شرطت شرط اني اكعد يمهم … و قبلت اني .. و اولا و اخيرا الحمد لرب العالمين اني تزوجتها و عايشين سوى هسه و حمودي ويانه … طبعا حمودي ميوكف و لا يمشي و ميحجي بس يأشر و يضحك و عمره جبير الله يحفظة … و اني تعلمت شلون اساعدها بحمودي و هو حفظ وجهي حبيبي … وهي من شافتني اعامله بحنيه مثلها قبلت نسوي طفل هسه لان هي جانت رافضه فكرة الجهال مبدئيا … تكول من احبل و اجيب شلون نداري حمودي … كلتلها نجيب وحده و نخلي كامره .. جانت مترددة بس من شافتني حنين عليه مثلها تماما اقتنعت … و هسه حبيبتي حامل و اني مرتاح و احس الله رازقني الدنيا و الي بيها بوجودها و بوجود بركة البيت حمودي …
(وضع خاص)
انتهى
اخوكم ابو بغداد سايق التكسي
#ابوـبغداد