قصص عراقية حقيقية بقلم ابو بغداد سائق التكسي المجموعة الثانية

ابو حامد

دائما اسمع ابوية و ابو عامر يحجون بواحد اسمه ابو حامد … و من يحجون يسكتون و ميكملون حجي … ابوية جان نجار … و ابو عامر صاحب اسواق غذائية … بس ابو حامد ما اعرف اصلا شنو يشتغل … اول مره شفت ابو حامد جنت واكف يم ابوية اساعده بالمحل .. يعني اناوشه شغلات لو يدزني على شغلات … اول مرة شفته كلبي انقبض مع العلم جنت جاهل بالابتدائية … رجال جبير بالعمر و لحيته بيضه و شعره ابيض وملابسه على كد الحال … يمشي عبالك مكسور ظهره .. منزل راسه .. اجه وكف يم ابوية و ابوية ركض جاب كرسي كاله اتفضل .. و كعد ابو حامد و رأسا ابوية صاح ابو عامر و ابو عامر مخلي قوري مال جاي و صوبة بمحله .. رأسا سوى جاي … بذاك اليوم جانو ابوية و ابو عامر مهتمين بالرجال هواي … ما افتهمت هالشي و مرت سنين العمر و كبرت و توفى ابو حامد و ماعرف شلون صار كبالي مقطع من فلم و تذكرته و سألت ابوية .. كلتله يابه تذكر من جنت اجي يمكم بالمحل ايام النجارة … جان اكو رجال اسمه ابو حامد انتو تحبوه و تساعدوه … ابوية الله الله ذكرتني .. كلتله بله احجيلي شنو قصته …
كال من جنه صغار جان اكو دكان واحد بمنطقتنه … الدكان مال ابو حامد … كل طلاب مدرستنه الابتدائية يروحون يشترون من عنده … جان يحب يحجي وي الجهال و يسألنه على اهلنه … و دائما ينطينه شغلات اكثر من فلوسنه … و بقى يسوي هيج دائما … قبل من جان رجال و بحيله ولده جانو شباب صغار … و احنا حتى من كبرنا بقينه نمر عليه … دائما نروح يمه و نسأل عنه … جهال المدرسة اكثرهم يحبوه حتى بنات المدرسة من كبرو و تزوجو بقو يمرون يسألون عليه بمحله … و اكيد اكو شي اسمه لعنة العمر … لعنة الكبر تمشي عالكل … و كبر ابو حامد و بقى يسوي هالشي …. ابنه ما عجبه هالشي لان كبرو و صارو رياجيل … و هو حجالنه كال ولدي معاجبهم الوضع و ميقبلون اوزع شغلات من المحل للمدرسة و مو بس هيج … جان اي واحد محتاج بالمنطقة يروح عليه و هو ينطي مسواك … دهن و شكر و تمن و جاي … ولده طلعوه من المحل و هو روحه بالمحل … كام شيسوي .. يشتري مرات شغلات و يروح يم المدرسة يوكف ينطي للجهال … اكثر من مره نكله حجي ابقى بالبيت ميقبل … يكول احس روحي اختنك من البيت والوقت واكف … احب اشوف الجهال … طبعا منطقتنه كلها تعرفه و اغلب الجهال من كبرو و تزوجو كامو يحجون قصة الحجي ابو حامد لجهالهم … يعني وين ميمشي الناس توكفه و تسلم عليه و هو يحب هالشي … و ولده كلش مو زينين .. كلش ماديين … هو بعده عايش و كالوله خلي نبيع البيت و المحلات لان همه عدهم بيت و مقابيل البيت اربع محلات ملكه للحجي … و من ورى المشاكل قبل يبيع البيت و المحلات و وزع الحصص على ولده …
و ولده بقو بنفس المنطقة و هو بقى يم ابنه الجبير .. من جان يجي يمنا و احنا نكيف بي .. جان يحجيلنه على وضعه واحنا ابد ما تخيلنه هو هيج متأذي .. يكول دائما من جانو ولدي يتعاركون وياي لو يتعاركون بيناتهم اكول بيني و بين نفسي ليش هذولة ولدي و ليش مصارو الجهال الي بالمدرسة القريبة من المحل جهالي مع العلم الله شاهد و رقيب و اني ما بقالي سنين بهل الدنيا والله والله والله مدللهم  …
و جنت احمد ربي و اكول هسه يتعدلون … بس ما تعدلو و رادو حصصهم و وصلت بيهم يكولولي كله من وراك … يعني هالنساتل الي اوزعها لو الاكل لو الامور الي اساعد بيها عبالك هي الي وصلتنه لهل الحال … ما ذكرو فلوس ايجارات المحلات الي ياخذوها بس مشكلتهم الازليه انته ليش توزع بلاش … يكولولي الناس تضحك عليك و باجر عكبه اذا تموت محد يذكرك الناس مثل البزازين تاكل و تنكر … و طلعوني من المحل .. طلعوني من الشغلة الوحيدة الي اني احبها .. نسو اني الي سويت المحل و اني الي سويت البيت الي نايمين بي و نسو المحلات هم اني سويتهم … بعدني عايش و فوك الكاع و خلوني ابيع كل شي … اني بعت مو خوف .. بس كرهت المشاكل و خصوصا من تزوجو يوميا عركات و وصلت بيناتهم للدم .. نسو تعبي عليهم و نسو شلون ظهري انكسر بالمحل ونسو كل الدلال و علمود اني اساعد الناس و احب اشوف الضحكه بوجوه الجهال و انطيهم هالقاسمة الله ما عجبهم هالشي …
و راح عمي ابو حامد و مرات جان يختفي و احنا ندور عليه … و نكيف و نفرح من نشوفه بالشارع … والله العظيم مو مبالغة جان من يفوت للشارع عبالك المنطقة تصير بيها روح … عبالك الشوارع تبتسم و الحياطين تضحك … عمي ابو حامد روح المنطقة و ذكرياتها الحلوة … تحس بي لوحده قاموس و بكل سطر من سطورة ابتسامة فقير و ضحكة ناس محتاجة ساعدهم هو … من جان يختفي احنا نروح نسأل عنه … حتى مره زوجة ابنه كالت لو مختار المحله هم ميجون عليه هلكد ناس …  و توفى ابو الخير … توفى و هو زعلان من الدنيا … من وصلنه خبر وفاته اتحدى واحد من طلاب مدرستنا القدامى و حتى الجدد ما بجى .. بجيت بجي بيومها عبالك ابوية مات مره ثانية … اني ورى وفاة ابوية محد ما كالي شمحتاج … بس عمي ابو حامد الغريب الي متربطني بي صلة رحم لا من بعيد ولا من قريب جان يسألني شمحتاج .. مو بس الي .. لكل الجهال .. ابني اكو ناس خلف الكواليس … خلف الحياطين مينشافون … ميدورون شهرة .. ميدورون كامرات … هالناس ميحتاجون احد يسويلهم تمثال لو يسمون اسم شارع بأسمهم … لان ناس من اهل الله .. هالناس يحبون يزرعون الابتسامة و الامل بوجوه الداير مدايرهم … و ابو حامد واحد منهم … و هواي اكو مثله بس مثل ما كلت بس محد ميعرفهم … ناس ناذره ارواحهم لعمل الخير … طبعا الشغلة الحلوة … ابن ابو حامد الي كاله (من تموت محد يذكرك) وين ميمشي بالشارع الناس توكفه و تترحم على ابوه … اكثر من مره اشوفه يبجي من واحد من الناس الي ساعدهم ابوه يوكفه يترحم على ابوه … لان اغلب الناس ميعرفون هالحجي و بس اني و ابو عامر نعرف و كم واحد … جان يبجي لان وين ميمشي الناس توكفه تترحم على ابوه … و راح روح المنطقة … راح و ماكو واحد بمنطقتنه اذا يفوت من يم محله القديم ميترحم عليه … و كل ذكرياتنه المدرسية هو بيها .. يعني توقع اجيال فاتت و طلعت بهل الابتدائية .. من يكعدون يتذكرون بينهم و بينهم نفسهم اول شي يجي براسهم عمو ابو حامد و يكعدون يترحمون عليه .. من عده العوائل المحتاجه و من عده الي اصلا احنا ما نعرفهم ..
الف رحمه على روحك ابو حامد ..
(ابو حامد)
انتهى
اخوكم ابو بغداد سايق التكسي
#ابوـبغداد