قبل منتحول للنواب ضباط جان بيتنا جوى بالنفط مقابيل الشبكة مال الكهرباء .. چان عدنا ولد صاحبنه اسمه حاتم … حاتم كل مره يكعد يمنه يسولف عالعيشه و ميضحك و دائما كئيب … يحجي على ابو الايجار و عالحصه متكفيهم و على غلاء الاسعار …
هالحجي بالتسعينات قبل متطلع سوالف التنميه البشريه و سوالف الطاقة السلبية …احنه يوميا نواسي وهو كل مره يكعد يمنا يعيد نفس الحجي …
اخر مره كلناله تريد الصدك كلنه مثلك بس احنه نبدي يومنا بضحكة بشقه حتى نمشي يومنا ..ميصير تبقى هيج و احتمال انته فگر و كئيب لان ابد متضحك و لا تتشاقى و لا حتى تسولف عن الاشياء الزينه بحياتك مثلا ابسط شي الجو الحلو و صوت العصافير و ريحة الاشجار ..
كال والله حجيكم مقنع و راح (طبعا هو يشتغل تكسي بسياره مو مالته)
بيوت النفط قليل بيها كراجات (يعني السيارات تبات بره)ثاني يوم الصبح احنا چنه نداوم اعدادية و طريق الكوسترات من يم بيت حاتم ..
بدلنه و طلعنه چان نشوفه واكف يم سيارته يدخن ..
كلناله ها خير ..
كال البارحه رجعت للبيت اضحك بوجه امي و زوجتي و حتى تعجبو .. و اليوم الصبح طلعت مبتسم للحياة و شوفو شلگيت ( أشر بيده عالتايرات)
لگينه تايرات ثنين الورى حاطيهن على طابوك يعني بايكيهم هههههه و ركض ورانه و احنه بوقتها لابسين احذية (مكرم القارئ) و الحذاء وي الگير مال الشارع يزحلك اذا ركضنه عليه .. و ثنينه وكعنه بالكاع وهو اجه لزمني و اول مره نشوفه يضحك من كل گلبه رغم الي صار وياه و كال الچلاب (مكرم القارئ) بايكين التايرات الورى لان جدد و عايفين الاماميات لان ممسوحات و بقى يضحك على حظه مادري على قسمته ..
احنه هم ضحكنه و خطية راح اخذ تايرين اقساط من ابو الادوات الاحتياطيه الي بالمنطقه و من ذاك اليوم بعد ابد ما فتحنه وياه موضوع الكآبه ..و طبعا حجيت هالحجي كله لان اريد اكلكم صباح الخير و ابدأو يومكم بابتسامه و طاقة ايجابيه بس خفت لا يصير وياكم شي مثل حاتم الله يذكره بالخير و تذبو براسي ..
عالعموم صباحكم خير و عافية و رزق و راحة بال ..
انتهى
اخوكم ابو بغداد سايق التكسي
#ابو_بغداد

أنت تقرأ
قصص عراقية حقيقية بقلم ابو بغداد سائق التكسي المجموعة الثانية
Cerita Pendekننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة اقرأوها فعلا تستحق القراءة