قصص عراقية حقيقية بقلم ابو بغداد سائق التكسي المجموعة الثانية

ابو احمد

توفت أمي و اني عمري ١١ سنه …. صغير و كبرت بلحظة لان شفتها بعيني شلون انضربت جلطة بسبب أبويه … خواتي ثنين صغار ما صار بيهم الي صار بيا لان اني افتهم … ابويه چان مايهتم بأمي ويعتبرها لاشيء … واني من كل عقلي چنت متوقع هاي ذبة ابوي وي كل النسوان … … بعمر ١٣ تزوج ابويه و شفته بعيني شلون يداريها لزوجته و مدللها و امي خطيه يگومها بغلط و ينومها بغلط  ..
يعني ورى سنتين من وفاة امي تزوج … اول ما فاتت زوجة ابويه للبيت جانت تمثل هي تحبنه بس يوم ورى يوم كامت تعلم خواتي عالطبخ و التنظيف و تأهلهم لمرحلة الخدمة الها … و اني بديت اطلع وي ابويه لشغله … جان عنده محل مال بيع و شراء اثاث منزلي … و سنه تجر سنه كبرت اني و مرة ابويه صار عندها ٣ ولد من ابويه … خواتي زوجتهن بعمر صغير .. وحده ١٦ تزوجت و الثانيه ١٧ .. حتى بس تخلص منهن … و طبعا ابويه وضعه المادي تخربط بسبب ولد زوجته الي همه اخوتي … جان مدللهم دلال و اني بالنسبة الى تحصيل حاصل .. و بيوم من الايام و بدون سابق انذار قسما بعزة الله و روح امي اجاني بكل صلافة يكلي اريدك تطلع من البيت لان البيت صغير و اريد ازوج اخوك فلان بغرفتك … ضحكت گلتله تتشاقى يابه؟؟؟ گال لا ما اتشاقى انت رجال و تگدر تدبر روحك .. گلتله ليش ولدك مو رياجيل .. مو راح تزوجهم ؟؟؟
گال لا اخوتك ظرفهم يختلف عن ظرفك انت تعرف تدبر نفسك بس اخوتك ميدبروها  واني اعرف السبب هو زوجته متريدني بالبيت و قبل لان اطلع وي ابويه للشغل مچانت تشوفني هواي بس لان گعدنه متريدني بعد .. و صارت عركة چييره انتهت بطلعتي من البيت … و الله اكبر ذيج اللحظة شكد صعبه … من واحد يطلع يمشي و ميعرف وين رايح … ركبت سيارات بالفلوس الباقية بجيبي و رحت لأمي … نمت يمها لان ماعندي مكان ثاني و ما عندي وجه اروح انام ببيت وحده من خواتي لان اني استحي كلش … بيومها التراب الي يم كبر امي چان ارحم عليا من اسمع حجاية من بشر … و بقيت يومين بالنجف … و ثالث يوم فات رجال چبير (بدون ذكر اسماء) معروف كلش بالنجف … سلم عليا و گالي اني طريقي منا و شفت صار يومين تنام هنا مع العلم الگبر قديم و هالحالات تصير بس وي الناس المصابهم حار و ستوهم دافنين … و اني هالگبور و الناس الي بيها حافظهم و حافظ اساميهم لان صار سنين افوت منا و اسلم عليهم .. خفت منه بالبداية عبالي جني ياستار بس گلت هو شيصير اكثر من الي صار … ابوي و طردني من البيت و ماعندي مكان .. بچيت و اجه گعد يمي گال سولفلي شبيك .. حچيتله كل شي و گالي گوم وياي … وداني لمطعم وكلني و گالي راح اشغلك هنا و تبات فوگ المطعم وياك ولد ثنين وثنينهم مو من اهل النجف … و شغلني بالمطعم … و بقيت بالمطعم سنتين اشتغل و واحد من العمال صار صديقي كلش … چانت امنيته يسافر … و قنعني اسافر وياه تهريب بس فلوس ماكو … بوقتها رحت للي ساعدني و گلتله تعبت اني و اريد اسافر بس فلوسي متكفي … گال اني انطيك ومن توصل رجعهن الي و حتى اذا ما رجعتهن محالل و موهوب لان انت مثل ابني … و اخذت الفلوس و طلعنه اني و صاحبي و شبعنه سجون لحد ما وصلنه لالمانيا … سكنت بميونخ والحمدلله تجنست و تزوجت عراقية اهلها هنا … و رجعت للعراق خصيصا للرجال الي ساعدني لان تمرض و نام مستشفى … ولان الله وفقني كدرت اطلعه للهند اسويله عملية و صار زين و رجعت فلوسه .. طبعا هالرجل حلفني ما اجيب اسمه ابدا اذا بيوم من الايام احجي قصتي … لان يكول الي سواه هو وياي مو من نفسه سواه .. الله خلاه يكون سبب حتى اني تتعدل وضعيتي … طبعا ابويه مات و ما اعرف حتى گبره وين و لا اروحله اصلا … و اخوتي بعد ما شفتهم ولا دورت على اخبارهم بس خواتي ساعدتهن و لحد اليوم اني مستمر اساعدهن … و طبعا حاليا اني عندي بيت بالعراق بس سكني بميونخ بسبب عملي … بس رغم ما اني هسه مرتاح و مرت سنين على كل الي صار بس بعدني احلم اني بالمگبره بالشهر اقل شي اربع مرات و افز اشوف مرتي بصفي و ببيتي نايم … و دائما بالحلم ابچي لان ماعندي مكان اروحله .. و من افز من الحلم هم مرات ابچي و مرتي تگعد تگلي حلم حلم والله حلم … راجعت دكاتره و اخذت علاج بس العلاج يدمرني يخليني ما اركز و افكاري تتخربط … و الحمدلله على كل حال و الله عالظالم … يگولون الوكت ينسي بس اني ما نسيت …
(ابو احمد)
انتهى
اخوكم ابو بغداد سايق التكسي
#ابو_بغداد