قصص عراقية حقيقية بقلم ابو بغداد سائق التكسي المجموعة الثانية

الحلاق

الحلو بالموضوع من جيت اشتغل بالسوك ما استحيت ولا خجلت و لا خفت ... لان هالسوك بظهر بيتنا و المكان الي يوميا اروحله ... ابويه جان يشتغل سايق تكسي و السيارة مو مالته .. نزل منها و كعد بالبيت .. من كعد وضعنه المادي تخربط ... اني بذاك الوكت جنت طالب صف خامس ابتدائي ... و اشتغلت عامل بالسوك و شغلي چان ببسطية مال مواد غذائية و بقوليات .. يعني حمص و فاصوليا و عدس و دهن و شكر و هالسوالف .. الولد ابو البسطية يعرفوه ابويه و امي ... اخته صديقة امي و جوارين بيت جدي (اهل امي) .. يكرم الله بذاك الوكت جان نعالي مأكول من الصفاح و من چنت اروح للسوك الحصو الصغار ياذيني بس تعلمت عليه و جنت من صغري عبالك افتهم وضع اهلي ... و استحي من طلباتي لان بأذني اسمع وضعهم شلون تخربط و المشاكل بدت تزيد بالبيت بسبب المصرف ..و كلت بس استلم اسبوعيتي اشتري نعال جديد .. بس المشكله الاسبوعيه قليلة .. اول اسبوع انقهرت اشتري و كلت عالاسبوع الوراه و بدلته ثاني اسبوع من شغلي .. طبعا ابو البسطية چان يغش بالميزان و اني صغير و ماعرف هالشي حرام و عبالي لواته لو ذكاء ... و علمني شلون اغش الوزن .. و بيوم من الايام بالبيت اني و امي جتي متسوگه و حچيت عالوزن و گلتلها يجوز قشمروج و هذا مو كيلو .. گالت شلون يعني .. گلتلها فلان يسوي هيچ و يلعب بالوزن و علمني .. امي ضربت وجهها و كالت صدك تحجي .. كلتلها شبيج يمه .. و صاحت ابويه و كالتله و ابويه كالي بعد متطلع وياه هذا حرامي و حرام هالشي و صدك بطلني و فوكاها ضربني واني اصلا ما جنت اعرف هالشي حرام والله عبالي ذكاء .. و حتى بذاك الوكت ابويه راحله و تعارك وياه كاله انت شلون تعلم ابني يبوك بالميزان و تعلمه عالحرام و تزاعلو .. وراها اشتغلت عامل بحلاقة و طبعا ابويه رجع يشتغل بس اني خلص تعلمت عالشغل حتى لو ابويه مكفي و موفي و مطلع مصرف البيت .. بالحلاقه الوضع يختلف من السوك و الهوسه مال مخضر ... الحلاقة جنت متونس بيها لان اسمع سوالف الرياجيل و الشقى مالتهم ... و الحلاق بده شويه شويه يعلمني شلون ازين الناس ... و بقيت وياه و دخلت متوسطة و اعدادية واني اشتغل وياه .. بالاعدادية بديت اجيب الطلاب الي وياي للحلاقة واني ازينهم … و صرت حلاق درجة اولى … جنت لان اشتغل و الزم فلوس .. اصرف فلوسي على اللبس و الطلعات و جنت كل اصدقائي انطيهم لبسي من تصير عندهم مناسبات و صار عندي علاقات بالمنطقة مو طبيعية و اخذت محل وحدي و چانت احلى لحظات حياتي من افتح محلي ملكي الخاص الي متوقعت بيوم من الايام املك بي شبر والله العظيم … و صارت الحرب مال امريكا ٢٠٠٣ و طلعنه بوقتها لمحافظة من محافظات ابونه العراق … هناك محتاجينه شي و اجرت بيت لاهلي لان خير من الله عندي .. و بالصدفه جوي عائله ماعندهم امكانية و لا عندهم مكان .. جبتهم يمنا بالبيت .. تعرفت على ابوهم و جنت اني ازين ولدهم .. هالعائله عندهم بنية .. جان بيني و بينها نظرات متبادله .. و من خلصت الحرب و رجعنه بقيت اتردد عليهم و قررت اتزوج البنيه و خطبتها بس جان عندي كاع ٨٠ متر چنت ابني بيها .. كلت من اكمل البيت اتزوجها لان ما حبيت اكعد وي اهلي حتى لا تصير مشاكل و اني لان حلاق جنت اسمع مشاكل الناس بشكل يومي و اغلب مشاكل المتزوجين بسبب كعدتهم وي اهلهم .. الكاع جانت بنفس شارع بيت اهلي يعني هيج هيج اني باقي يمهم … و بذاك الوكت الاسود صار شي ضيع فرحتي لهذا يوم الله …. بذاك الوكت كامت تطلع عصابات اجرامية تك فيرية تكتل الحلاقين … طبعا هالحجي اني ما صدكته بس صارت بكم منطقة ببغداد بس بعيوني ما شفت شي … و ذاك اليوم الي ماراح انساه ابد … اني مفتح و صديقي حلاق يشتغل وياي بالمحل واكف يزين زبون و اني كاعد ارتب بالخاوليات … طبكت سياره و نزلو منها ثنين شايلين سلا ح و بعدني اريد ارفع ايدي و اكلهم … كامو يرمون عليا و فاتو ضربو صاحبي و صديقي هم .. اني بساعتها حسيت روحي متت .. طبعا المحل مالتي اكو كباله مثل الصعده .. اني مضروب ونايم بالكاع بس جسمي عالصعده و راسي بالكاع بالتراب .. من اتنفس لان اريد اچلب بالحياة و اريد اعيش .. التراب بالكاع كام يفوت بخشمي و الدم مال جسمي كام ينزل على وجهي .. اهل المحلات انهزمو من صار الرمي … و رجعو من سيارة القتله المجرمين راحت … جنت اسمع صوتهم يكولون حمودي بي نفس .. و شالوني بسياره و هنا اني فقدت الوعي … اقسم بالله و هالحجي مو بس اني اكوله .. كل واحد اتعرض للقتل يحس بي … اني و بالمستشفى و بالعناية المركزة جنت بين الميت و العايش … و جنت انتظر بس شغله وحده .. شراح اشوف من اموت … بس الله و دعاء امي نجاني … وعشت … و طبعا صديقي استشهد و واحد من الزبائن هم استشهد … الطلقات فاتت بيا حفرتني حفر و وصلت للحبل الشوكي … بحيث اثرت على اعصاب جسمي و مراح اخجل و احجيها لان هذا قدري بهل الدنيا .. اولا صرت مقعد .. ثانيا ماكدر اتزوج بعد … و من ذاك اليوم حياتي تغيرت … و هسه اني حياتي عباره عن عربانه ملتصقة بيا …
و الضحكة كل هالسنين بالكوه تطلع مني … طبعا البنية الي حبيتها تزوجت و صار عندها جهال و كبرو و قبل فتره بنتها الجبيرة تزوجت .. و اني على وضعي … المحل مالتي عزلته و اجرته بعدين .. و الكاع اخويه كمل بنائها و تزوج بيها هو و اخويه الثاني .. واني يم اهلي و ابويه توفى و محد بقالي غير امي … و هسه بيا خوفه لا امي هم تروح و اذا راحت اخاف من فكرة اعيش وحدي بهل البيت … والله العظيم كل ما افكر بهل الشي .. من انام احلم بذيج الايام من جنت صغير و نعالي الصفاح مالته منتهيه و الحصو ياذيني .. و بالحلم اضحك لان احس برجلي .. و من اكعد ادعي دعاء ادري بي ميتحقق .. اكول ربي رجعني لذاك الوكت و مستعد امشي حافي طول عمري بس المهم رجليناتي ترجعلي … (الحلاق)
انتهى
اخوكم ابو بغداد سايق التكسي
#ابوـبغداد