قصص عراقية حقيقية بقلم ابو بغداد سائق التكسي المجموعة الثانية

ام حنين و اسراء

احلى شي چنت اسوي و احب اسوي هو الگعده بالحديقه و اباوع عالدجاج و خصوصا اذا وحده من الدجاجات مفرخه و كتاكيتها وراها يركضون ... چان عمري ١٦ سنه .. عائلتي مكونه من أمي و اخوتي ثنين و ابوي توفى واني عمري ١٤ ... اني الصغيرة چنت و المدلله لحد ما بابا مات و اخذ الدلال وياه وراح ... اخوتي متزوجين بالبيت بس ماعدنا مشاكل وي نسوانهم لا اني و لا امي ... بذاك الوكت چنت مبطلة من الدراسة لان اخوتي ميقبلون اكمل .. واني امنيتي چانت اكمل دراستي ... تقدملي واحد شافني صدفه اني وامي يم محل اسواق عالشارع العام و راح سأل و عرف وين بيتنا و وين گاعدين و طبعا هو مو من المنطقة و جاي يم اقاربه ... گبل تقدم و امي گالت بعدج صغيرة و موافقت بس اخوتي كلمتهم اقوى لان مسيطرين على ماما .. و تزوجت و الي تزوجته يا سبحان الله طلع مفصل عليا تفصال ... يحبني و دللني و حسيت بي صفات مشتركة من بابا هوووواي .. و طبعا عنده بيت وحده و شغله زين بس خارج بغداد ... و لان ارتاحيت لازم تطلع شغله تخرب الراحه .. جهال طلع ميصير عندي و الصوچ من عندي .. صار عمري ١٩ و ماعندي جهال .. و هو خطية يگلي ماريد جهال انتي كافي .. و بيوم من الايام طالع هو على طريق خارجي چان عنده شغل بذاك الوكت .. خطية مغفي بسبب التعب و انگلبت بي السياره و توفى ... بوقتها اني ردت اموت لان والله حبيته و دللني .. بس الله كتبلي ابقى عايشه ... اخوتي ورى الفاتحه اخذوني يمهم لان اهل المرحوم كل واحد ملتهي بروحه و علاقتهم وي المرحوم چانت مو قويه ... و طبعا البيت صار الي بس اخوتي حولوني لبيتهم .. البيت بأسمي زوجي مسجلة بأسمي لان يعرف ميصير جهال عندي و خاف لا يصير بي شي و اخوته يعادوني … اخوتي بمرور الايام كالو خلي نستفاد من البيت و ناخذ ايجار على الاقل يفيدج … وهمه عرضوه للايجار و بس جابولي اوراق مال ايجار و كعدو بي ناس .. الايجار جنت ما اشوفه اصلا … ياخذوه يصرفوه عالبيت … و طبعا بمرور الزمن جهال اخوتي بدو يكبرون كامت تصير مشاكل و رادو يبيعون البيت مال بابا … اني اقترحت عليهم ما اريد ورث بس بشرط انتقل اني و ماما لبيتي … كالو لا شنو و على اي اساس تكعدين انتي و امي لوحدكم … خوب نبيع بيتج و نسوي مشروع جبير و تخلص مشاكلنه لان كل مشاكلنه بسبب الحاله المادية … كلتلهم لا و طبعا صارت عركات و كامو حتى يتعاركون وي امي …
و امي خطية مريضه كالت يمه همه ادرى بمصلحتج بيعي و انطيهم الفلوس .. كلتلها زين اتنازل الهم بحصتي بورث بابا بس ما ابيع بيتي .. كالو ماشي … اخذو حصتي و عزلو كل واحد ببيت واني وامي كعدنا بغرفه ببيت اخويه الجبير … و فتحو محل مال ادوات احتياطية شراكة ثنينهم و خسرو بي و السبب ولدهم يبوكون من الوارد مال المحل و واحد يذبها براس الثاني و باعو المحل و الغراض الي بي و تقاسمو بيناتهم … و هم رجعو لسالفة البيت .. بيعي بيتج خلي نتنفس .. بيعي بيتج خلي يصير براسنه خير … بيعي بيتج خلي نحقق امنية امج و تروح للحج .. كل شي بهل الدنيا صار متعلق ببيعة البيت … هاي الدنيا كلها وكفت على توقيعي … و طبعا امي طابكة وياهم مو لان همه صح .. بس لان همه رياجيل و يعرفون مصلحتي مع العلم مصلحتهم نفسها ميعرفوها و الدليل خسرو بالمحل .. و اني قافلة و طبعا انضربت اكثر من مره و تفلو عليا (مكرم القارئ) و غلطو حتى على المرحوم رجلي و مابقوو شي ما سوو لدرجة كالو حتى اللكمة الي تاكليها حرامات ببطنج لان متفكرين باخوتج … و طبعا ما بعت و ما بعت و ورى سنتين من ما وزعو الورث و عزلو و خسرو بالمحل … امي توفت … و ورى وفاة امي بسنه وثمن اشهر تقدملي ابن خالتي و هو منفصل و عنده بنات ثنين و زوجته متزوجة و البنات يمه عايشات .. طبعا من البداية عرفت هو يريد يتزوجني علمود يكعد هو و بناته ببيتي و وافقت حتى بس اخلص من اخوتي … و تزوجته و طلع الي افكر بي صح .. كعدنا ببيتي و هو اكبر مني ب١٩ سنه .. و كعدنا سوى و طلع حاله من حال اخوتي و هم بسانه زفر و اسلوبه محلو مو بس وياي حتى وي بناته .. وعلاقتي وي بناته صارت كلش قويه و حبوني و تعلمت عليهم و تعلمو عليا و مرت سنين العمر و هو توفى و اخوي الجبير توفى و البنات زوجتهم و وحده منهم كعدتها وياي لان رجلها وضعه المادي مو زين خطية و فلشت الحديقه كلها وسويت بيها اسواق جبيره و رجل بنتي هو لزمها و طبعا همه كبال العالم كله بناتي … و الحمدلله عايشين و مناقصنه اي شي و صار عند بنتي جهال ٣ و الصغيره صار عندها توم و متقبل تسوي جهال بعد لان خبلوها هالتوم ههههه و هسه يوميا من الصبح ارفع راسي لرب العالمين و اشكره انو خلاني ما ابيع البيت لان لو بايعته جان هسه الله يعلم شنو وضعي و طبعا ترست السطح دجاج و كتاكيت وكل ما اگعد فوك اضحك وارجع لسطح بيتنا القديم بالذكريات و احاجي روحي اكول الحمدلله على كل حال …
(ام حنين و اسراء)
انتهى
اخوكم ابو بغداد سايق التكسي
#ابوـبغداد