قصص عراقية حقيقية بقلم ابو بغداد سائق التكسي المجموعة الثانية

(الخوف من الصور)

يعني من الصور و قيسوها … احنا حتى من الصور نخاف …  الاجنبي من يشوف صوره يتذكر سفرته للصين لو سفرته لاستراليا لو لتركيا .. لو لحظة تخرجه .. لو وظيفته الجديدة … احنا من نكلب بالصور نكول هاي الصورة قبل ميموت فلان … لو هاي الصورة من فلانه تطلكت ..

لا وشوفو المواضيع ..
مثلا بنات ثنين ديشوفون الصور وحدة تكول لصديقتها باعي هنا شكلج شلون مورد و بشرتج شلون صافية .. اكيد هاي الصورة قبل ميستجلب (مكرم القارئ) تكلها قبل ميستجلب وياج فلان خطيبها السابق .. من جان زين وياج …
لو هاي الصورة قبل متتطلكين … لو هاي الصورة قبل ميوكع شعرك … يعني صور ذكريات .. صور المفروض احنا نطلعها حتى نمارس عليها يوغا الراحة النفسية و نسترجع الذكريات .. لا و اكو صور .. بيها وجع .. يعني اني بس اريد افتهم شي واحد .. بيوم الطهور ياخذون صور ليش ؟؟
يعني حتى الطفل بيوم طهورة من تباعون على وجهه منكلب اصفر .. ضغطة و سكره نازل من الفزه و انته جاي ماخذله صورة و الله هاي صورة فلان بيوم طهوره .. زين ما فكرت هاي الصورة باجر عكبة راح تصير ورقة ضغط و مساومة طبعا للمزح كتبت هالسطر ..
بس للامانة اكو صور ابد ممريوده .. مثلا اني اهلي ماخذيلي صورة بيوم زياني اكرع .. يعني ماعرف وين الحكمة .. مزينيني اكرع و ماخذيلي صورة .. عبالك جنت بسجن التسفيرات و فوكاها من سألتهم بوقتها كالولي هاي الصورة جنا اول مرة نزينك بيها اكرع !!!!! اي وبعدين !!! اي هاي هي .. شنو هاي هي … مزينيني اكرع و ماخذيلي صورة ليش .. قابل اني ست اشواق ام القانونية حتى تخوفون بيا الموظفين و الكوادر الادارية …
وفوكاها قبل التصوير جان مو مثل هسه .. هسه الصورة المو حلوة نكدر نمسحها .. قبل من تنداس الدكمة مال الكامرة خلص الصورة صارت راس مال .. راح تبقى وياك طول العمر …
عالعموم …
هالحجي كتبته لان قبل كم يوم جانت عندي مراجعة يم دكتور نفسي .. لان تعرفون و كايللكم قبل فترة عندي حالة اسمها بانك اتاك … الدكتور يكلي حاول تطلع صورك القديمة و تسترجع لحظة التقاط الصورة شلون جنت مرتاح و نفسيتك حلوة .. باوعت عليه نظره هو مفتهم معناها .. كالي شبيك .. كلتله و انته شلون عرفت لحظة التقاط الصورة جانت نفسيتي حلوة .. كال هو الصورة القديمة كلنا اخذناها بلحظات سعادة و فرحة و كل منريد نرتاح و نتنفس بسعادة نطلع الالبومات حتى نشوف ذكرياتنه الحلوة .. كلتله تصدك احنا الشعب العراقي كلنا نخاف من الالبومات .. كال شلون ؟ كلتله نتحاشى الصور و الالبومات لان كل الي بيها موذي و دائما الالبومات نضمها بمكان بعيد مو تحت متناول اليد حتى منكلب بيها و نبجي  .. كال لعد عوف الصور … كلتله ترى اني مكاعد اتشاقى .. و لا ازيد و اهول بحجم الموضوع .. احنا شعب بالظاهر قاسي .. بس بالباطن الصور و الذكريات تنزل دموعنا و نخاف منها … صور بيها ناس ماتت .. بيها ذكريات موجعه ببعض الاحيان .. و بيها ضحكات و اوقات حلوة بمرور الزمن ما استمرت مثل غير شعوب ..
(الخوف من الصور)
انتهى
اخوكم ابو بغداد سايق التكسي
#ابوـبغداد