قصص عراقية حقيقية بقلم ابو بغداد سائق التكسي المجموعة الثانية

يمه احبج

يگول : چان بيها سكر و ضغط و مفاصلها تعبانه و عيونها متشوف بيها زين و مرات تعتمد على اللمس من تلزم شي بيدها .. و عدها ضعف بعضلة القلب .. و عدها رجفه بيدها ابد متروح منها و بالگوه تمشي .. و كل يوم اصبح على ريحة الريوگ الي تسوي .. و من اگلها ليش يمه انتي تعبتي نفسج مو مرتي و مرة اخوي موجودات و ممقصرات .. تگلي يمه ما ارتاح اذا ما اوكلكم من ايدي ..

هالشي الي تسوي امي قديم .. قديم من ايام ما جنت ملفلف بقماش و اخوتي بعدهم اصلا ما جايين للدنيا ..

من توفت امي بطلت اتريگ .. و گمت اكره الصبح و گعدتي .. لان امي مموجوده ..

و المشكلة الي ملاگيلها حل و بنفس الوقت عاجبتني رغم ما كل مره تصير وياي افز من النوم خايف .. هو حلم ..

الحلم مبني على حاله حقيقية صارت وياي بالطفوله و اتذكرها .. چنت وي أمي بسوگ شعبي بمنطقتنه .. امي لابسه عباية و وگفت تتسوك من ابو المخضر و هدت ايدي .. اني لان صغير و لان كل النسوان لابسات عبي سوود .. لزمت ايد مريه غيرها و من شفتها مو أمي گمت ابچي و اصيح بصوت عالي يمه يمه .. اجتي امي ركض بوستني و اعتذرت من المريه و كملت مسواگ و رجعنه .. هالشي حقيقي و ورى وفاة امي گمت احلم بهل الشي هواي و افز من النوم خايف و بنفس الوقت فرحان لان شفت أمي ..
(يمه احبج)
انتهى
أخوكم ابو بغداد سايق التكسي
#ابو_بغداد