قصص عراقية حقيقية بقلم ابو بغداد سائق التكسي المجموعة الثانية

(العينتين)

قبل ميطلع لالمانيا … جان عنده دلالية ببغداد …. فد يوم جتي مريه اسمها ام احمد رجلها ضابط بالجيش بذاك الوقت … بيتهم جان بالمشتل و هي جاي وياها ولد شاب صغير تدور على مشتمل للأيجار … الي افتهمته الولد جان صديقها … و تريد تأجر مشتمل وياه حتى يلتقون بي لان هي عدها جهال بعمر شوية جبير و يفتهمون … العينتين من شافها قرالها و صادقها و خلاها تعوف هالولد وهو صار صديقها …. بقى بعلاقة وياها و طبعا لان دلال هو قنعها تسوي سالفة كلش غلط … قنعها تبيع البيت الي ساكنه بي و يطلع هو وياها و الجهال للخارج يعيشون بالفلوس … ام احمد صدكت و هو كام يطلع مشتريه عالبيت بالوقت الي يكون ابو احمد ممتواجد … و قنع ناس يشترون و دفعو عربون قيمته جبيرة … و كالها خلي الفلوس يمي حتى اطلع جوازات الي و الج و للجهال … و هو بليله ظلمة طفر بالفلوس للشمال و من الشمال عبر لتركيا و من تركيا لليونان و من يونان لالمانيا بفلوس العربون الي اخذوه … و طبعا طلعة ريحة السالفة و ام احمد اندلت بيت اهله الي اصلا لا ناقه و لا جمل بالموضوع و كامت تروح عليهم … ابوه الله يرحمه من عرف السالفة تبرى منه … لان خطية ما يقبل العوجه … وبعدين حتى مركز شرطة الرشاد تدخل و زوج ام احمد عرف بس العينتين طفر بعد … و صارت سمعة على بيت اهله و كامو يكولون عليهم بيت فلان القفاص … و بالمانيا تعرف على مرية تركيه … حبها و تزوجها …
بذاك الوكت ابو احمد لان عرف زوجته الصوج منها دفع الفلوس للناس و علمود الجهال بقاها … يعني عايشين سوى بس منفصلين …

المهم .. الام و ما ادراكم ما الام … مشكلة الام لو تعرف ابنها قاتل لو حرامي لو اسفل السافلين (مكرم القارئ) تبقى تحبه و تحاول تتواصل وياه … و بذاك الوكت جانو كاعدين بالايجار بس عدهم قطعة ارض … العينتين خابر على امه كالها بيعو الكاع و اني ادزلك فلوس و اشترو بيت .. و طبعا بالتسعينات الدولار يعتبر كنز … و الام قنعت الاب يقبل و كالتله هو استعدل و كل فلوسه حلال و صار انسان ثاني … و خطية الاب اقتنع … و باع الكاع و دز العينتين مبلغ حطو على فلوس الكاع و اشترو بيت … و طبعا هو ميكدر يرجع للعراق لان عليه القاء قبض بذاك الوكت و تهمته نصب و احتيال … لان حق القانون يختلف عن حق ابو احمد … و مشت السنين و رجع ورى سنة ٢٠٠٣ … رجع جايب سيارات وياه منفيست .. تقريبا عشر سيارات … احنا عبالنه سياراته و من فلوسه طلعت السيارات مال ولد يزيديه جماعته كالوله بيعهن و دزلنه فلوسهن حتى نرجع ندزلك سيارات و هسه العراق عطشان سيارات من الخارج …. و هو شعباله .. عباله لان هذولة يزيدية و مو من بغداد ما راح يوصلوله مع العلم جان صاحبهم هناك بالمانيا … و راد يبلع فلوس السيارات بس الشباب كدرو يوصلوله و اخذو فلوسهم منه … طبعا هالحجي زوجته بتركيا و بعدها ما جايه للعراق … وراها فتح مكتب عقارات و بقى فتره يشتغل و طبعا جتي زوجته من تركيا كعدت وي اهله بنفس البيت الي اشترو من فلوس الكاع … و هو بالمكتب اشتغل و من صارت احداث يكتلون بيها الدلالين و الحلاقين قرر يطفر لتركيا و طبعا هو ما اخذ الجنسية الالمانية جان مجرد مقيم و هم باع جوازه الي اجه بي لولد و راح بي الولد و وصل … و مثل ما كلت قرر يروح يستقر بتركيا بس شسوي هنا ؟؟؟
كال لابوه بيع نص البيت و انطيني حصتي من هسه … لان اني دزيتلكم من المانيا (بالمناسبة المبلغ الي دزه من المانيا ميجي شي بكد فلوس الكاع بس تكماله حتى يشترون بيت) … و خطية الاب باع نص البيت و انطاه الفلوس … بذاك اليوم الاب  راد يخلي العينتين يكتب ورقه بس الام ما قبلت …كالتله ميصير هالحجي و خطية … و راح العينتين بدون ميكتب ورقة .. بتركيا فتح محل تلفونات و كام شيسوي … عن طريق المعارف الي كسبهم بالدلالية قبل ميسافر و لان الوضعية طائفية و الناس تريد تهج … كام يكلهم اكدر اسفركم عن طريق الامم المتحدة لامريكا بس اخذ مبلغ من المال … و بذيج الفترة اصلا الامم المتحدة مال تركيا تسفر الناس بالجملة لامريكا و استراليا و كندا بسبب الاوضاع الطائفية الي بالعراق … و كامو الناس يجون و هو مجرد يلكالهم شقة و يكعدهم و يوديهم لمركز الامم المتحدة الي بانقره بحجة هو عنده معارف جوى بالدائرة … و هو جذب ماعنده احد .. و الناس مصدكة … و فترة صدك اكو ناس سافرت بس اكو ناس اجاهم رفض … و طبعا هو يكون ماخذ فلوس منهم و لان بتركيا ميكدرون ياخذون منه لا حق و لا باطل … و كامو يدورون على اهله بالعراق … و خطية ابوه و امه ماكلين المصايب … و كالو للناس هالمره والله تبرينه منه صدك …و بقى على هالحال وبعدين تعرف على مهربين و كام يطلع الناس تهريب لليونان و انعرف و صار عنده صيت .. بس جان اكو مصيبة بذاك الوكت …
الي يطلع من تركيا و ينلزم باليونان … و يبصموه الشرطة اليونانية لو يبقى بتركيا احسنله و اشرفله لان وين ما يسافر و يكمل طريقة يرجعوه لليونان يرجعوه … و اليونان لجوئها من اسخف البلدان بالعالم … و هو جان يتفق وي الناس بدون بصمة بس الناس تنلزم خطية و تتبصم … و طبعا واحد من الناس جوارين بيت اهله … دفعله كومة فلوس و من انلزم باليونان بصموه و كمل طريقه لبلجيكا و ببلجيكا طلعت بصمته و خطية المسكين ما جان يفتهم بهل الامور … و رجوه لليونان و رجع للعراق بعدين و راح لاهل العينتين … تخيلو من امه للعينتين تتصل بأبنها و تكله حل الموضوع الناس جوارين و عيب .. يكلها انتي حليها و طرديهم !!!
كوليلهم خلي يجون ياخذون حقهم مني و هو اصلا بتركيا محد يكدر يسويله شي … الحاصل … الام و الاب ماتو ناقصين عمر من وراه … من ورى هبطات ابنهم الي يوميا داكين ناس غربة عليهم الباب و يكولولهم ابنكم هيج سوى بينا و هيج سوى ويانه … و هو لحد الان يدور وين ماكو شغلة بيها تقفيص يروح يركض عليها مع العلم رجل بالكاع و رجل بالكبر و بي امراض الدنيا كلها بسبب دعاوي الناس … و تالي ما تالي يريد هم حصته من النص الباقي … يكول اريد حصتي و اخذها … و هو اصلا ماخذ حصته قبل … ما اعرف الفلوس شراح تفيد هيج بشر … راح تفيده باجر عكبة من يوكف بيد رب العالمين و يتحاسب على كل فلس اخذه بدون حق … و طبعا هو من يروح للعراق ميطلع بره البيت هواي لان يخاف لا احد من الي مقفص عليهم يشوفه و يسويله مصيبه … عالعموم هاذا واحد من العارات الي ينولدون بنص عائلة تخاف الله و ماعدها مشاكل بس من وراه تصير عليهم سمعه محلوه … بسببه و بسبب مشاكلة … (العينتين)
انتهى
اخوكم ابو بغداد سايق التكسي
#ابوـبغداد