قصص عراقية حقيقية بقلم ابو بغداد سائق التكسي المجموعة الثانية

(ام الصالون)

يكول جنت اطلع ادور شغل و ما الكه … و ارجع اكعد بالركن … يم صديقي … اكو ام صالون بنفس شارعنه اتخبل منها … لان عليها سمعه … كل متفوت الشباب اذا موجودين يكصوها … الي يكول تجيب بنات للزناكين … و الي يكول شفت رجال فات للصالون … و الي يكول مره شفت من الشباك مال المحل كاعده هي و بنات يشربون … و دك حجي كله محلو بحق هالمريه و اني جنت اتخبل منها مو لان هي عليها سمعه … بس لان تجي لبيتنا هواي و ابوية جان عايش بس ما بي حيل يمشي …. و من اجي اتعارك وي اختي ابوية يرزلني ويكلي انتظر ما بقالي شي بهل الدنيا من اروح عود انت سوي الي تريده … و طبعا كل هالحجي و اني بيني و بين اختي اكلها شتريد منج لج احجي … اختي تكلي والله ماعندها شي … هي تجي تكعد يمي شوية وتروح … و بيوم من الايام ابوية انطاني فلوس مال جكاير جمله … وهو خطية مادري منين جاب الفلوس لان عايشين على راتبه و لو بيتنه مو ملك جان الله يعلم شصار بينا … كلتله يابه هاي منين كالي اهل الخير انطوها اليا … و المبلغ جان زين و اني بذاك الوكت جان عمري صغير … رحت جبت جكاير من الشورجة … انواع الجكاير … اسبين على كريفن على فايسوري على سومر و رشيد … و فتحت بالركن بسطية مال جكاير بس شويه بعيد عن بيتنا … و لان بيتنا صاير قريب على كراج صغير بمنطقتنه … السواق كامو يوكفون يمي يشترون جكاير و يطلعون … و شوية شوية مشى الشغل و جبت ببسي و تفاهمت وي ولد يبيع ثلج يوميا يذبلي ثلج … و الحمدلله رزقنا اختلف و من ورى هالمكان الصغير … كدرت اتعرف على هواي ناس بس اغلبهم سواق كوسترات … و تعلمت اسوق كوستر بعد ما صرت ميانه وي ولد الله يذكره بالخير اسمه اياد عليوي … و كعدت اخوية الاصغر مني بالبسطية و اشتغلت سايق على الخط … و بيوم من الايام رجعت للبيت لكيت ابوية متوفي و جان انكس و اسود يوم بحياتي … صح اني تعلمت عالمسوولية و كمت ادخل وارد للبيت بس ابوية جان نفسه بالبيت كافي … و ورى فترة من وفاة ابوية رجعت من الشغل و لكيت ام الصالون بالبيت … و طردتها … اختي كامت تبجي و من طلعت المريه ام الصالون اختي كالت تتذكر فلوس الجكاير الي بديت بيها … كلتلها اي ؟
كالت هاي فلوس فلانه الي تكول عليها (…….) من كالت هيج اني انصدمت … كلتلها انتي صدك تحجين … كالت والله و حتى اذا تذكر من ردنا نرجع الفلوس هي كالت ما اريدهم اهم شي اخوج يبقى يشتغل و ميكعد بالركن لان الركن ميفيده و مينطي لا مصرف و لا فلوس … بيومها اني بجيت و فكرت بكلام الناس جان كله مجرد حجي و كل واحد يكول شفت اني متاكد هو مشايف بس يعجبهم يحجون على بنات العالم و عرفت قصة هالبنية ام الصالون … جانت طالبة و الوحيدة لابوها و امها … ابوها زوجها بعمر ١٥ سنة … رجلها لان يعرف ماعندها ظهر و لا اخوة … جان يكتلها و اصلا هي طفله و مو جبيرة و تزوجت … جان يكتلها و تنهزم حافية لبيت اهلها … و ابوها يرجعها بيده … اخر شي قبلت و ورى وفاة ابوها كتلها زوجها و هي اخذت جهالها (عدها بنات ثنين و ولد) اخذتهم و راحت لمركز الشرطة و رفعت دعوى و كبرت السالفة و رجلها طلكها … هي رادت تعيش امها و جهالها وطبعا زوجها مينطيها فلس احمر و لا يصرف على جهاله … بدت تحف لنسوان المنطقة و تسوي شيره و هيج سوالف مال نسوان … وحده من النسوان كالتلها ليش متفتحين صالون … و ساعدتها ببدايتها … و فتحت الصالون الي عليه سمعه و يكولون عليه انواع و اشكال بس كله جذب … و من شافتك كاعد بالركن و شافت وضعنه عايشين بالقدرة … قررت تساعد و شوف كل الخير حاليا بالبيت من وراها … من كملت حجيها اختي بجيت اني و اخذت اختي و رحنا لبيتهم … دكينا الباب طلع امها … و حلفت الا نطب … طبينا و هي جتي و خطية ولا عبالك صاير شي … طبعا جهالها مرتبين و كلش حبابين .. و اعتذرت منها و كلتلها اني الله منطيني اخوه ثنين و اخت و هسه صار عندي خوات ثنين و اخوه ثنين … و من يومها صارت اختي و الي يفتح حلكه و يجيب طاريها بسوء افرك حلكه فرك … والله العظيم من عاشرتها طلع همها الاول و الاخير امها و جهالها … و خطية فد محترمة … جنت يوميا الوم نفسي اكول شلون قبلت على نفسي اسمع هالحجي عليها و اسكت … و كلها جماعتي و اعرفهم جذابين … و الحمدلله مشت سنين العمر و اني تعينت و اختي تزوجت و حتى ام الصالون هم جتي قسمتها و تزوجت و تحولت هي وامها لغير منطقة و اني و اخوتي تزوجنه … و لهذا يوم الله .. علاقتنه بيها و من تحتاج شي او رجلها يحتاج شي نركضلهم اني و اخوتي … و طبعا اني ما اكول كل الصالونات زينات .. لا .. اكو الزين و اكو المو زين بس المصيبة حجي الناس …
(ام الصالون)
انتهى
اخوكم ابو بغداد سايق التكسي
#ابوـبغداد