قصص عراقية حقيقية بقلم ابو بغداد سائق التكسي المجموعة الثانية

الخياط

ابويه چان يشتغل يم وكيل مال حصه و اسواق غذائية … شغله يوزع الحصه للناس و يبيع بالمحل … اني چنت صف ثاني متوسط .. مرات اروح وياه للأسواق حتى اساعده بالبيع .. ابو الاسواق چان بخيل جدا و لسانه محلو .. كل ما يشوفني بالمحل يستدرجني بالحچي عباله اني اكل نساتل لو حلويات بلاش … و يگول لابويه ليش جايبه وياك .. ابويه خطية چانت كلمة صار و حاضر و تدلل و على راسي متفارق لسانه .. لان المسكين برگبته عائله و بس يريد يعيشنه .. چان فقير و يتجنب المشاكل .. و حاول يربينه على هالاساس … مره من المرات كتلوني ولد ثنين اخوه .. و الله العظيم الولد همه الي تحارشو بيا و سمعوني حچي و الصوچ منهم و فوگاها كتلوني … ابويه فوگ ما كتلوني ما دافع عني و حاول يلم الموضوع و امي گالتله كله ما عبدالله يفوت بشارعهم يسمعوه حچي و يغلطون عليه بدون سبب عبالك شارع الخلفوهم .. ابويه گالها اي خلي يفوت من غير شارع و من يومها عرفت ابويه حتى لو انضرب گبال عيونه ماراح ياخذ حقي مثل باقي الاباء الي يصارعون الدنيا مصارع علمود جهالهم … و من ذاك اليوم گمت افتر شوارع ثنين حتى بس ما افوت بشارع الي ضربوني … و احاول اتجنبهم بس المصيبة همه وياي بالمدرسة و هم ضربوني مرتين بالمدرسة … ومن خوفي من ردة فعل ابوية من سألني المدرس ضربوك گلتله لا چنه نلعب … من هالموقف تغيرت ردة فعل هالاخوه و صارو اصدقائي و گامو همه يدافعون عني اذا احد تقرب مني لو سمعني حچي … و مو بس هيچ گمت اروح العب وياهم دائما و حبوني و حبيتهم و سبحان الله صدگ ابو المثل من گال ما محبه الا بعد العداوة … ابو هالولد چان يشتغل بسوگ القماش الي بشارع النهر .. عنده محلات … مال البسه و اقمشه … ولده چان بالعطلة ياخذهم وياه يشغلهم و لان اني صادقتهم گلتلهم اريد اشتغل وياكم .. و بالعطله گام ياخذنه ابوهم للشغل و بسيارته يعني لا اركب كوسترات و لا اصرف كراوي … و چان هواي يسألني عن عيشتنه و عن وضعنه و گالي انت ميفيدك شغلك هنا وياي ابني .. لان بمحل القماش مراح تتعلم صنعه بس تعال وياي … اخذني لخياط معروف كلش اسمه سيد حسن طبعا توفى هسه لان هالحجي قديم كلش (الله يرحمه و يرحم والديكم) .. سيد حسن علمني الخياطة من الالف للياء .. و چان يگلي اني اعلم الصنعه بس للي يستحقوها .. گلتله شلون يعني ؟؟؟ گال ولد ابو شيماء (يقصد على ناصر و محمود) گال ولده اصحاب ملك .. عدهم محلات و هالصنعه اصلا متفيدهم و ما تساعدهم برزقهم و حتى لو يجيبهم و يگلي علمهم همه راح يتعاجزون و ميحبون السالفة .. بس انت وضعك و وضع اهلك المادي يخليك تتعلم و تحب الشغل هم … و صدگ حچايته اني تعلمت بسرعه و گمت افصل و اخيط و حتى اصمم … و الله سبحان تعالى و بفضله خلاني اصير خياط درجة اولى .. بس چانت امنيتي السفر … فكرة السفر چانت معلگة براسي و لان عندي صنعه گلت وين ما اروح هي تعيشني … وبيوم من الايام ابويه تمرض كلش و حتى يقضي الحاجتين على فراش و اني بطلت من الشغل حتى بس اداري لان امي من السكر عيونها تعبت و عندي خوات ثنين و ابويه رغم ما بناته و طالعات من ضهره بس يستحي منهم .. اني بطلت و گعدت اداري بس اخذت الصالة مال بيتنا و نصبت بيها مكينه مال خياط و گمت اخذ شغل من سيد عمار ابن سيد حسن و اجهزه و اسلمه من البيت و طبعا حچيت ظرفي للولد و تفهم الوضع و قبل اشتغل بالبيت لان اني صرت المعيل الوحيد لاهلي بعد ما ابويه تمرض … و بيوم من الايام قبل وفاة ابويه باسبوع صاحني ابويه و عبالك حاس هو راح يروح المسكين … گالي اوصيك بامك و خواتك گلتله اهوووو حبيبي ابويه انت عمرك طويل لا تحجي هيج .. گام يبچي و گالي اني اعرف ما چنت اب مثالي و عيشتنه ما چانت زينه و ما دللتك مثل باقي الاباء بس والله چنت يوميا ابچي بسكوت بطريق رجعتي للبيت من الشغل .. لان اني ما عندي صنعه و ما دارس و اخاف من المشاكل حتى رزقي الي معيشكم بي انت و امك و خواتك ما ينگطع و چنت ابچي اكثر من اشوف الجهال فرحانين بهدايا اهلهم واني بالگوه مطلع ايجار البيت و المصرف بس شسوي ما انولدت زنگين ولا عندي شهاده ولا حتى صنعه … چنت انزل راسي للرايح و الجاي بس علمود تعدي الايام و نعيش .. و تعرف شگد چانت صعبه عليا من تجيني متعارك و اني ماريد مشاكل و ماروح اتعارك … چنت انعصر عصر … گلتله يابه اعرف والله و رجع وصاني بأمي و خواتي و حلفني ما اسافر و اعوف خواتي وامي .. و حلفتله و ورى اسبوع راح المسكين الي عاش عمره يگول نعم و صار و تدلل و على راسي و تأمرني … و بيوم فاتحته جوي ناس ماعرف اصلا منين يعرفهم و شوكت لحگ يعرفهم وهو مخلص كل عمره بالشغل … و كل الناس تمدح بي و يحچون بوگفاته … و راح ابويه … و ورى سنه من وفاته گدرت اسوي محل خياطه صغير بسوگ شعبي .. هالمحل انعرف و چنت اخيط كل شي … كل شي حرفيا … و انعرفت و الله و دعاء امي و خواتي خلاني بمدة قصيره اخذ محل اكبر و بمكان افضل و سنه ورى سنه المحل صارو ثنين و مشت سنين العمر و امي هم ودعتني وراحت يم ابويه بس احمد الله اخر سنين عمرها عيشتها احلى عيشه و خليتها تحج و تعمر و سفرتها سفرات سياحية لتركيا و لبنان و مصر .. و خواتي زوجتهم لاصدقائي بالشغل و مطمئن عليهم و اني هم الله رزقني بزوجة صالحه ..و طبعا حاليا اني اسمي معروف عن كل الفنانين و المطربين و اسمي مشهور كلش و عندي افرع للخياطة بكل بغداد .. اني من حجيت هالقصة دموعي ما وگفت لان تذكرت وگفتي بالوكاله و الاسواق و شكل ابويه من يحجي عليه ابو الاسواق و تذكرت شكل ابويه اخر ايامه و الي كتبته ابد محاجي لبشر لان ما احب اذكر تفاصيل عن ابويه لذلك اختاريت ان تنشر القصة بدون ذكر اسمي الحقيقي و اسم ابويه ..
والحمدلله على كل حال و الله يرحم ابويه و امي و يرحم والديكم
(الخياط)
انتهى
اخوكم ابو بغداد سايق التكسي
#ابوـبغداد