قصص عراقية حقيقية بقلم ابو بغداد سائق التكسي المجموعة الثانية

الحصار

يگول / بيوم من الايام بالتسعينات بالحصار طلعت اشتغل عامل ببسطية ببغداد جديدة … البسطية مال سوالف بيوت (فرفوري على ساعات جدارية على خلاط على مثرامة مال لحم على سماور و قواري ستيل و خواشيك) من الاخير اي شي يشتري صاحب البسطية و يبيعه بنفس الوقت ..

بس چان ابو البسطية ياخذ شغلات الغالية يوديها لمحل بالكرادة يبيعهن مرات ..

الحاصل .. البيت الي بصفنا لزك بيت جوارينه جوارين العمر .. امهم اسمها ام ناصر ..

بذاك اليوم اني چنت اشتغل يم ابو البسطية صارلي يومين … رحت اكل لفه فلافل و رجعت لگيت ام ناصر واگفه يم ابو البسطية والله العظيم انصدمت المريه من شافتني .. گالت ها يمه علاوي شتسوي هنا .. گلتلها خاله اشتغل .. گالت وين .. گلتلها يم ابو البسطية … و طبعا هي چانت جايبة سيت مواعين فرفوري والله العظيم شايفه و حافظه لان چانو مخلي بالمعرض الخشب الي بالصاله .. و جايبه وياه مكينه مال ثرم لحم و مكينه من هاي الي تطحن الهيل  .. و اشتراهن منها ابو البسطية و انطاها الفلوس و كلي سفطهن .. اني و اسفط صاحتني بس وكفت بعيد .. گالت تعال يمه علاوي .. رحت يمها .. گالت يمه ديربالك تگول لاحد بالمنطقة لو لأهلك شفتني هنا  و جيت بعت من غراض البيت .. لان انت هسه رجال و چبير و تعرف حچي الناس يمه و انت سبع و اني امنتك امانه متسولف .. حلفتلها بيومها ما اسولف و راحت .. بيومها حسيت روحي چبير و شايل امانه من صدك و ابد ما سولفت لأي بشر لان صدك الناس كلها طاگها الجفاف بس بوكت الغيبه و النميمه يركضون ركض لهل السوالف ..

و راحت سنين و جتي سنين وقبل اسبوع من اليوم چنت بفاتحة ام ناصر .. طبعا احنا انتقلنه من بيت لبيت و سافرنه فتره و امي بقت على تواصل وياها ابد ما گطعت ..

طبيت للفاتحة و كملت الفاتحة و اخذت امي و مرتي و خواتي و رجعنا لبيتنا بس قبلها اذب خواتي كل وحده لبيتها .. بالطريق فتحت الموضوع لأمي .. گلتلها تذكرين يمه من اشتغلت ببغداد جديدة يم ابو بسطية الغراض .. گالت اي اتذكر .. گلتلها ورى يومين من شغلي جتي خاله ام ناصر الله يرحمها و جابت سيت فرفوري و مثرامه و طاحونه مال هيل كهربائية باعتهن و حلفتني ما احجي و اني ما حجيت ..

چان امي تبچي بصوت عالي .. گلتلها شبيج ؟؟
گالت يمه بذاك الوكت انت هستوك مشتغل و ابوك چانت سيارته عاطله و محتار يم الفيتريه ماعدنا نصلح و خمسين دينار ماكو بالبيت و البيت مابي اكل و غاز ماعندي .. هي جتي يمي و حجيتلها و راحت و المغرب بنفس اليوم جابتلي فلوس و كلتلها ارجعهم الج ما قبلت كالت ممحتاجين حبيبتي ..

خطية مرادت اعرف هي بايعه غراض من البيت وكالتلك لا تحجي و اصلا هي متدري انت وين تشتغل و حتى اني من سالتني بس كلتلها اشتغل صارله يومين و بس ياخذ اسبوعيته ارجعلج …

من كالت هيج امي اني هم بچيت .. بچيت على ام ناصر و على هالناس الطيبة الي مثلها ..

شكد اكو گلوب طيبه بهل الدنيا مستعدين كل شي يسوون لأجل الخير ..
اللهم ارحم خاله ام ناصر و ارزقنا ناس مثلها بحياتنه يارب..
(الحصار)
انتهى
اخوكم ابو بغداد سايق التكسي
#ابو_بغداد