قصص عراقية حقيقية بقلم ابو بغداد سائق التكسي المجموعة الثانية

خيرها_بغيرها

اتذكر بالمدرسة جان عدنا واحد اسمه عماد رسن يرسم .. يرسم وجوه لكابتن ماجد و دوق فليت و جورجي و سالي و يرسم سيارات بطريقة كلش حلوه .. مرت سنين و التقيت بي صدفه بمطعم جان يشتغل بي … من باب الذكريات المشتركة كلتله عماد بعدك ترسم ؟؟
كال لا والله بطلت … و حجالي شغله (للضحك) كالي  من جنت اشوف الرسمات لاخوتي الاكبر مني لو لكرايبي يكولون هذا اكيد نقل (يعني مخلي ورقه بيضه فوك الصوره الاصلية و على خيال الصورة الاصلية مخطط رسمته) بس هو جان ميسوي هالشي … يعني من الاخير مصنفين عليه و يكولوله انته دتنقل مو رسمك هذا .. مره مرتين متكرره الحاله و هو اصلا عايف الموضوع و تارك الرسم لان اذا اقرب الناس منه شكك بمصداقية موهبته ..
عاف الرسم .. و يمكن لو مشجعي جان هسه عماد رسام ..

هالشي للاسف احنا هواي نسوي … والمنتخب العراقي ابسط مثال .. من يفوزون نشجعهم و من يخسرون نبقى نقلل من قيمتهم و همه بشر اولا و اخيرا و ترى يقرون التعليقات و يشوفون التصنيف و الكلمات و الغلط الي عليهم ..
من باب اولى نكلهم يله خيرها بغيرها و نشجعهم ..

اني عن نفسي اكلهم خيرها بغيرها و اي لعبة بالعالم مبنية على اساس الخسارة و الربح و اذا خسرتو اليوم مو معناها خلصت الدنيا .. تبقون اخوتنه و ناسنه و اتمنالكم كل الخير و الموفقية …
انتو سباع ..
#خيرها_بغيرها
#ابوـبغداد