LOVE MAZE ||KOOKJIN|| [Completed]

Episode:11

Unicode & Zawgyi

Unicode

ဝိဉာဉ်မဲ့စွာလှဲလျောင်းနေတဲ့ခန္ဓာကိုယ်လေးရယ်၊ပူပန်ကြောင့်ကြမှုအပြည့်နဲ့လူတစ်ယောက်ရယ်၊နွမ်းခြောက်နေတဲ့နှင်းဆီဖြူလေးတစ်ပွင့်ရယ်တည်ရှိနေသောဆေးရုံခန်းလေးထဲတွင်တိတ်ဆိတ်ခြင်းကြီးစိုးလာလေသည်။

ဖြူနုနုလက်ချောင်းလေးတွေပေါ်ကပန်းနုရောင်သမ်းနေတဲ့လက်သည်းခွံရှည်လေးတွေကိုလက်သည်းညှပ်လေးဖြင့်ညင်သာစွာညှပ်ပေးနေမိသည်။မခံစားနိုင်တာကိုသိပေမဲ့သူလေးနာသွားမလားဆိုတဲ့အသိစိတ်လေးကြောင့်တတ်နိုင်သမျှဖွဖွလေးညှပ်ပေးနေမိသည်။

ထို့နောက်မျက်လုံးနားရောက်နေတဲ့ရှေ့ဆံပင်အချို့ကိုကတ်ကြေးဖြင့်ညှပ်ချလိုက်သည်။ပေါ်လာတဲ့မျက်နှာနုနုကိုဂျီမင်းကိုယ်တိုင်ရေနွေးလေးဖြင့်ပွတ်သပ်ပြီးသန့်ရှင်းရေးလုပ်ပေးလိုက်သည်။သန့်ရှင်းစင်ကြယ်သွားတဲ့မျက်နှာချောချောပေါ်ကိုအနမ်းတစ်ချက်ချွေပြီးသည့်နောက်မှာတော့သန့်ရှင်းရေးလုပ်ငန်းစဉ်ပြီးဆုံးသွားခဲ့လေပြီ။

မနက်ဝယ်လာတဲ့လာဗင်ဒါစည်းလေးကိုညိုးခြောက်နေတဲ့နှင်းဆီဖြူလေးနေရာအစားထိုးလိုက်တော့အခန်းရဲ့အခြေအနေကအသက်ဝင်လာပြီးလာဗင်ဒါရနံ့တွေဟာလည်းသင်းဖျဖျလေးဖြင့်အခန်းတစ်ခုလုံးကိုလွှမ်းခြုံထားလေသည်။

ဝယ်လာတဲ့စားစရာအချို့ဟာဂျင်လေးရဲ့လက်ရာလောက်မကောင်းပေမယ့်ကျိတ်မှိတ်ပြီးစားလိုက်ရသည်။ဘယ်လောက်ပဲစားချင်စိတ်မရှိဘူးဆိုဆိုဂျင်လေးအတွက်ကိုယ်ရှိနေမှဖြစ်မယ်မဟုတ်လား။

"မင်းနိုးလာရင်တစ်ခုပြီးတစ်ခုမနားတမ်းချက်ကျွေးခိုင်းမှာ"

မေးရိုးတွေပေါ်လာရင်မင်းကအရမ်းချောသွားမှာဆိုတဲ့အကြောင်းပြချက်နဲ့ကြိုက်တဲ့အစားအစာမှန်သမျှကိုတစ်ခုပြီးတစ်ခုချက်ကျွေးတတ်တဲ့မင်းကိုယ်တိုင်လုပ်ထားခဲ့တဲ့အကျင့်ကြီးကြောင့်ငါအခုဆိုဘယ်သူ့လက်ရာမှစားမဝင်တော့ဘူး။