Parang Kailan Lang

PKL: Labing-Walo

----x

Kanya-kanya na ng pinagkakaabalahan ang mga kaklase ni Daisy matapos ang first periodical exam nila. Nagpl-plano ang mga itong magliwaliw kung saan habang siya'y tahimik nang naglakad sa hallway upang bumili ng pagkain sa canteen. Saka niya iisipin kung yayain ba niya si Berry sa bookstore.

"Saan ka pupunta, Daisy?" Napakurap si Daisy nang makasabayan niyang maglakad si John Dale. Kaklase nila ito at katabi niya sa Filipino time. "Di mo nakita ang announcement sa board kanina?"

Napatigil siya sa paglalakad. "Anong announcement?" Wala siyang ideya sa sinasabi nito sapagkat dinaanan lang niya ang board kaninang umaga dahil magre-review pa siya para sa gaganaping test.

"Tungkol sa study buddy. Program ng SSG na plano ni Shawn. May study buddy tayo sa batch natin at sila ang pipili kung sino. Nakapaskil na doon sa board ang magiging study buddy natin para sa school year. Graduating na kasi tayo at isa ito sa paraan para ma-maintain natin ang grades natin," paliwanag nito habang bumababa sila ng hagdan.

Nasorpresa naman siya doon. Bago pa man ito ianunsiyo, may ideya ba si Lirio at Noah sa planong ito ni Shawn? Hindi nakapagsalita si Daisy at nagmamadaling bumaba para tingnan ang board. Mangilan-ngilan na rin ang nagkukumpulan sa bulletin board ng RSD.

Sumingit siya roon at tiningnan ang mechanics ng study buddy. Nakasaad doon na buong school year ang magiging study buddy niya at every grading may prizes ang may improvement sa grades.

Magsisimula iyon sa second grading. Sabay na mag-aaral ang dalawa at kung ano man ang pagkukulang ng isa ay tuturuan ng isa. Hindi rin kailangan na magkita kayo lagi ng study buddy mo at ayos lang kung dalawang beses lang magkita sa isang linggo.

Hinanap niya ang pangalan niya sa listahan at nakita niyang ang kapares niya ay si Daphne Alcueza ng Section B. Ang transferee noong second year sila na galing sa isang prestihiyusong private school. Magkakasundo kaya sila ni Daphne? Iba ang katayuan nila sa buhay.

"Nakita ko kayong magkausap ni Daphne, John Dale. Puwedeng makisuyo?" pakiusap niya kay John Dale nang lumapit siya rito. Unti-unting kumunot ang noo nito na parang hindi nagustuhan ang narinig. "May problema ka ba kay Daphne?"

Minsan na kasi niyang nakikitang nilalapitan ito ni Daphne tuwing lunch at nakikisabay rito pero seryuso lang ang hilatsa ng mukha ni John Dale.

"Wala."

"Kung ganoon, ipakilala mo ako sa kanya," sabi na lamang niya saka ngumiti.

Nang tumingin siya ulit sa listahan para malaman kung sino ang study buddy nina Lirio at Noah.

Kara Jecille Tamayo. Ang study buddy ni Noah.

Ang first runner-up sa UN noong third year highschool sila at isa sa mga honors sa Section A? Morning session ang A at ito muna ang gumagamit sa classroom at pagpatak ng Afternoon session na siyang schedule nila sa RSD ay sila ang papalit sa classroom. Nakikita niya ang mga ito dahil naglilinis ang mga ito ng room bago sila pumasok.

Si Henry ng section G naman ang partner ni Lirio. Si Henry ang gumanap ng Aladdin sa school play nila noong third year highschool pa sila.

* * *

Kinabukasan, nakita na lang ni Daisy ang dalawa na magkasama sa canteen at tila nag-uusap nang masinsinan dahil hindi nakangiti ang mga ito. Napalaki tuloy ang kagat niya sa banana cue niya sa plant circle kasama si Raspberry.

Ang seryuso naman masyado ng dalawa. Parehong pala-aral? Sabagay, sa A galing si Kara Jecille.

"Sinong partner mo?" tanong niya kay Rapsberry na mukhang pinagsakluban ng langit at lupa.