မီးအိမ်ငယ်ရဲ့ အလင်းရှင်

မီးအိမ်ငယ်ရဲ့ အလင်းရှင်.11

~~၁၁~~
Unicode

''လင်္ကာ ခုတလော နင် ငြိမ်နေသလားလို့...နေမကောင်းတာလား...ဒါမှမဟုတ် အဆင်မပြေစရာ စိတ်အနှောင့်အယှက် ဖြစ်စရာတွေ ရှိနေလား...ငါကူညီနိုင်တာရှိရင် ပြောနော်...''

ကာကာ ထိုင်နေတဲ့ ခုံဘေးလာရပ်ပြီး ပြောနေတဲ့ ဖိုးခေါင်ကို မော့ကြည့်ပြုံးပြလိုက်သည်။

''ကျေးဇူးပါ ဖိုးခေါင်...ငါဘာမှမဖြစ်ပါဘူး...ဒီလိုပဲ ငြိမ်ငြိမ်လေး နေတတ်လို့ပါ...''

''နင် အေးအေး ငြိမ်ငြိမ်နေတတ်တာ ငါသိပါတယ် လင်္ကာ...ဒါပေမဲ့ အခုအနေအထားက မတူဘူး...နင့်မှာ စိတ်ညစ်စရာ တွေးစရာ တစ်ခုခုရှိနေတယ်မလား...''

ကာကာမဖြေ ။ ရှေ့မှာ ဖွင့်ထားတဲ့ စာအုပ်ရဲ့ အနားစွန်းလေးတွေကို လက်နဲ့ပွတ်ဆွဲရင်း ငြိမ်နေလိုက်သည်။

''အေးလေ...အခု မပြောချင်လည်း ပြောချင်တဲ့ အချိန်ကျရင် နားထောင်ပေးမဲ့သူ ရှိတယ်ဆိုတာ မမေ့နဲ့နော်...''

ခေါင်းညိတ်ပြလိုက်ပေမဲ့ ကာကာစိတ်ထဲကနေတော့ ဟင့်အင်းဟု ​ငြင်းလိုက်မိသည်။ စိတ်ထဲမရင်းနှီးတဲ့လူတွေကို ဘာလို့များ ရင်ဖွင့်ရမလဲ ။

''သင်တန်းဆင်းရင် ဟော့ပေါ့ သွားစားကြမလို့...ဒီတစ်ခါတော့လိုက်မှရမယ်နော်...အရွှေနဲ့ ပြည့်လေးနဲ့ လိုက်မှာ ...အလိမ္မာကိုရော ခေါ်ထားတယ်...နင်ပါလိုက်ရင် ငါတို့ငါးယောက်သွားကြမလို့...''

''ငါပါမှ ငါးယောက်ဆိုတော့ ယောကျ်ားလေးက နင်တစ်ယောက်ပဲပါမှာလားဖိုးခေါင်...''

''ဟုတ်တယ်...''

''မိန်းကလေး တစ်အုပ်ကြားထဲ နင် အဆင်ပြေပါ့မလား...''

''နင်လိုက်မယ်ဆိုမှ ငါလည်းလိုက်မှာ လင်္ကာ...နင်မပါရင် ငါသူတို့နဲ့ မလိုက်တော့ဘူးလေ...''

ဒီလောက်အထိ ပြောလာတော့ ကာကာမလိုက်လို့ မကောင်းတော့ ။ ကြီးမိကို နောက်ကျမှလာကြိုဖို့ပြောပြီး သူတို့နောက် လိုက်ရတော့သည် ။ အမှန်အတိုင်းပြောရရင် ကာကာ ဘယ်မှ မသွားချင် ။ သင်တန်းချိန် ပြီးတာနဲ့ အိမ်မှာနေပြီး စာအုပ်တွေဖတ်လိုက် ၊မီးဖိုခန်းထဲမှာ ကြီးမိတို့နဲ့အတူတူ ဟင်းတစ်မည်လောက် ဝင်ချက်လိုက်၊ တီဇော်ပြန်လာမဲ့အချိန်ကို ခရေပင်အောက်ကနေ ထိုင်မျော်လိုက်သာ လုပ်ချင်သည်။