PSYCHO FRIEND (Season-2) (Completed)

Part 18

🐺Unicode🐍

ယွဲ့မင်ရီရဲ့ဈာပနပွဲကြောင့် ရှောင်းကျန့်မှာ ရိုက်ကွင်းမလာနိုင်တာမို့ ရိုက်ကူးရေးကို နောက်ထပ်နှစ်ရက်ထပ်ရွှေ့လိုက်ရတယ်။ ရိပေါ်မှာလည်း အလုပ်ရှုပ်နေတာမို့ ရှောင်းကျန့်ထံလည်း မသွားနိုင်။ ဒီနှစ်ရက်အတွင်း ရိပေါ်ရဲ့စိတ်အစုံဟာလည်း ဈာပနပွဲနေ့ကတွေ့ခဲ့ရတဲ့ ရှောင်းကျန့်ရဲ့ပုံစံကိုပဲ ထပ်တလဲလဲတွေးတောနေမိတယ်။

'ငါ ရီလေးကို ဒီတစ်ခါလည်း ထပ်သတ်မိပြန်ပြီ။'

ရှောင်းကျန့်ပြောခဲ့တဲ့စကားတွေသာ နားထဲအထပ်ထပ်ကြားယောင်ရင်း ပြန်စဉ်းစားမိတာက ထိုနေ့ညက အကြောင်းကို။ ရိပေါ်တစ်ခါဆိုတစ်ခါမှ မမြင်ဖူးတဲ့ပုံစံနဲ့ ရှောင်းကျန့်ဟာ ရိပေါ်ရှေ့မှာ ရှိုက်ကြီးတငင်ကို ငိုကြွေးခဲ့တယ်။ ရိပေါ်ရဲ့ရင်ဘတ်ကအင်္ကျီစကို ခပ်တင်းတင်းဆုပ်ကိုင်ရင်း ရိပေါ်ရဲ့ပခုံးပေါ်နဖူးအပ်ရင်း တင်းထားတဲ့စိတ်တို့ အလုံးစုံလွှတ်ချလိုက်သလိုမျိုး၊ ရိပေါ်ထံ အားကိုးရာတစ်ခု ရှာတွေ့သွားသလိုမျိုး ရှိုက်ကြီးတငင်ကို ငိုကြွေးခဲ့တယ်။ ရိပေါ်ဘက်က ရင်ခွင်ထဲရောက်လုနီးပါးဖြစ်နေတဲ့ ရှောင်းကျန့်ကို ပြန်လည်မဖက်တွယ်နိုင်ခဲ့တာက ရှောင်းကျန့်ထံက ထွက်လာတဲ့ ထူးထူးဆန်းဆန်းစကားတွေကြောင့်။

'ငါ့မှာ မင်းတစ်ယောက်ပဲ ရှိတော့တယ် ရိပေါ်။'

'ငါကြိုးစားပါသေးတယ်။ ငါတကယ် မတတ်နိုင်တော့လို့ပါ။'

'ငါ့ကိုခွင့်လွှတ်ပါ။ တောင်းပန်ပါတယ်။'

'မင်းတစ်ယောက်ပဲ ငါ့ကိုကယ်နိုင်တော့မှာ။'

သက်ပြင်းတို့သာ အထပ်ထပ်ချရင်း အဓိပ္ပါယ်ဖော်မရတဲ့စကားတွေကိုသာ မရမကအဓိပ္ပါယ်ဖော်ဖို့ကြိုးစားရင်း ခေါင်းခြောက်လာတာမို့ 'ဟား' လို့သာ ဝမ်းတွင်းသံကြီးနဲ့ အော်မိတယ်။ မန်နေဂျာကတော့ ဘာဖြစ်တာလဲဆိုတဲ့သဘောနဲ့ လှည့်ကြည့်လာပေမယ့် ရိပေါ်ပြန်မဖြေဖြစ်ခဲ့ဘူး။

အခုအချိန်မှာ ရိပေါ်သိချင်တာ တစ်ခုပဲရှိတယ်။ ရှောင်းကျန့်က သူ့ကို ဘယ်လိုသဘောထားတာလဲဆိုတာ။ သူငယ်ချင်းပဲလား။ ဒါမှမဟုတ် အားကိုးရာလေလား။