PSYCHO FRIEND (Season-2) (Completed)

Part 21

🐺Unicode🐍

မြို့အပြင်ဘက် အဝေးပြေးကားလမ်းမပေါ် အရှိန်နဲ့ ဖြတ်သန်းမောင်းနှင်လာတဲ့ ကားတစ်စီး။ ကားလမ်းမပေါ် ကားတစ်စီးတစ်လေမှမရှိတာမို့ ကားမောင်းသူက စိတ်ကြိုက်အရှိန်တင်မောင်းနှင်နေဟန်။ ထိုအချိန် ကားလမ်းမပေါ် ရုတ်တရပ်ထွက်ပေါ်လာတဲ့ လူတစ်ဦး။ လမ်းလယ်ခေါင်တည့်တည့်ရပ်နေပုံက ထိုကား သူ့ဆီတည့်တည့်လာဖို့ရာ မျှော်လင့်နေဟန်။ ကားမီးအကူနဲ့ လမ်းလယ်ခေါင်ပေါ် ရပ်နေတဲ့သူကို တွေ့တဲ့အချိန် ဘေးကနေရှောင်ဖို့ရာ ဟန်ပြင်လိုက်ပေမယ့် ဘယ်သူမှမထင်ထားတာက ထိုလူဟာ ကားရှိရာဆီတည့်တည့် ပြေးဝင်လာခဲ့ခြင်း။ အရှိန်နဲ့မောင်းလာတဲ့ကားဖြစ်တာရော မထင်မှတ်ထားတာပါပေါင်းပြီး ကားဟာ လမ်းဘေးကို ထိုးချသွားခဲ့တယ်။ ကားလမ်းမပေါ် မတုန်မလှုပ်နဲ့ မတ်တပ်ရပ်နေဆဲလူရဲ့ ရည်ရွယ်ချက်ကို မသိလိုက်ရသေးခင်မှာပဲ ကားထဲကလူကတော့ သွေးအလိမ်းလိမ်းနဲ့ သတိလစ်နေခဲ့ပြီ။ mask တပ်ပြီး ရုပ်ပါဖျက်ထားတဲ့ ထိုလူကတော့ ကားပေါ်ကလူကို စူးစိုက်ကြည့်လို့ စိတ်ကျေနပ်မှုရသွားတဲ့အခါမှာ နေရာကနေ ထွက်သွားတော့တယ်။

မြင်ကွင်းအားလုံးက ရိပေါ်ရဲ့ အိပ်မက်ထဲမှာ ရှင်းရှင်းလင်းလင်းကို ထွက်ပေါ်လို့နေတယ်။ ကုတင်ထက် အိပ်ပျော်နေတဲ့ ရိပေါ်မှာတော့ ချွေးတလုံးလုံးနဲ့ အိပ်ရာခင်းကို အတင်းဆုပ်ကိုင်လို့ အိပ်မက်ဆိုးရဲ့ဒဏ်ကို အလူးအလဲခံနေရတယ်။

'ခင်ဗျား ရှောင်းကျန့်ကို နောက်တစ်ခါထိရဲထိကြည့်။ ကျုပ်အကြောင်းကောင်းကောင်းသိစေရမယ်။ သတိထားနေ။'

Bar ရဲ့ သန့်စင်ခန်းအတွင်း ချန်မင်းတစ်ယောက် ရှောင်းကျန့်ကို အတင်းအကြပ်ဖက်နမ်းနေခဲ့တဲ့ မြင်ကွင်းက ရှင်းရှင်းလင်းလင်း။ ထိန်းမရတဲ့ ဒေါသနဲ့အတူ စီနီယာချန်မင်းထံ ပြောခဲ့ဖူးတဲ့ သတိပေးစကားတွေ။ နောက်တစ်နေ့ မနက်မှာပဲ ပြန်ကြားခဲ့ရတဲ့ စီနီယာချန်မင်းရဲ့ နာရေးသတင်း။ တူညီနေတဲ့ တစ်ချက်က စီနီယာချန်မင်းရဲ့ သေဆုံးမှုနှစ်ခုစလုံးဟာ အများအမြင်မှာ ယာဥ်တိုက်မှုဖြစ်နေပြီး သေဆုံးတဲ့နေရာဟာလည်း တစ်နေရာတည်း ဖြစ်နေရတာပဲ။