PSYCHO FRIEND (Season-2) (Completed)

Part 6

🐺Unicode🐍

ကားထားရာနေရာရောက်တာနဲ့ ရှောင်းကျန့်က ကားတံခါးကိုဆွဲဖွင့်လို့ ရိပေါ်ရဲ့လက်ကို အတင်းဆောင့်ဆွဲပြီး အထဲဝင်စေတယ်။ ရိပေါ်ကလည်း ရှောင်းကျန့်အလိုကျ ကားထဲသာဝင်ထိုင်လိုက်ပြီး ကားတစ်ဖက်ခြမ်းကိုသွားနေတဲ့ ရှောင်းကျန့်နောက်ကိုသာ လိုက်ကြည့်နေလိုက်တယ်။ နှစ်ဦးလုံးရဲ့ မျက်နှာထက်မှာတော့ တည်တင်းခက်ထန်မှုတို့က အတိုင်းသား။

ကားစထွက်လာချိန်ကစလို့ လမ်းတစ်လျှောက်လုံး သူတို့နှစ်ဦးကြား လေထုက တင်းမာခက်ထန်လို့နေတယ်။ ရိပေါ်အနေနဲ့ကလည်း ရှောင်းကျန့် အတိတ်ကိုပြန်သတိရနေတယ်လို့ တထစ်ချယုံကြည်ထားတာမို့ ဖြစ်လာသမျှ အရာအားလုံး ရင်ဆိုင်ပစ်လိုက်ဖို့ ပြင်ဆင်ထားပြီးသား။ မသိချင်ယောင်ဆောင်ပြီး အဖြစ်မှန်ကို ရှောင်ပုန်းနေရုံနဲ့တော့ ရှောင်းကျန့်က ပြန်ချစ်လာမှာမှ မဟုတ်တော့တာပဲလေ။

ရှောင်းကျန့်မှာတော့ တည်တင်းနေတဲ့မျက်နှာထားနဲ့ ကားစတီယာတိုင်ကို အကြောစိမ်းတွေပေါ်လာတဲ့အထိ ခပ်တင်းတင်းဆုပ်ကိုင်ရင်း ကားကိုလည်း အကြမ်းပတမ်းမောင်းနှင်နေခဲ့တယ်။

ရိပေါ်ကိုယ့်အတွေးနဲ့ကိုယ် ရှောင်းကျန့်မျက်နှာထက် ဝမ်းနည်းမှုစိတ်အစုံ ငေးကြည့်နေမိတုန်းမှာပဲ ကားက ထိုးရပ်သွားခဲ့တယ်။ ရိပေါ်ဘက် တစ်ချက်ကလေးတောင်မှ လှည့်ကြည့်ခြင်းမရှိပါဘဲ ကားခါးပတ်ဖြုတ်ပြီး ကားပေါ်ကဆင်းဖို့ကြံနေသူကြောင့် ရိပေါ် ဘေးဘီဝဲယာကြည့်မိတော့ ရောက်ရှိနေတာက ရှောင်အိမ်တော်ကို။

ခေါင်းထဲ ပဟေဠိများစွာနဲ့အတူ ရှောင်အိမ်တော်ကို လှမ်းကြည့်နေမိချိန် ရှောင်းကျန့်က ကားတံခါးကိုဆွဲဖွင့်လို့ ရိပေါ်လက်ကိုဆွဲရင်း ကားပေါ်က ဆင်းစေပြန်တယ်။ ထို့နောက်တစ်ဖန် ခေါ်သွားပြန်တာက ရှောင်အိမ်တော်ထဲကို။

ရှောင်အိမ်တော်ထဲ သွားရာလမ်းတစ်လျှောက်လုံး ရိပေါ်ရဲ့ခေါင်းထဲ အတွေးပေါင်းစုံ ဝင်လာရတယ်။ ရှောင်းကျန့်က သူ့ကိုသတ်တော့မှာလား၊ ဒါမှမဟုတ် အတိတ်ကို မှတ်မိနေတဲ့အကြောင်း လူရှေ့သူရှေ့မပြောချင်လို့ အိမ်တော်ထဲ ခေါ်လာခဲ့လေတာလား။ ရိပေါ်ကိုသတ်ဖို့ရာအတွက်တော့ လုံးဝမဖြစ်နိုင်။ ဘာကြောင့်ဆို ရှောင်းကျန့်ဟာ သူ့ကိုယ်သူ ဒုက္ခရောက်အောင်လုပ်မယ့်သူ မဟုတ်သလို သူ့ကိုယ်သူ ဒုက္ခရောက်စေရလောက်အောင် ဉာဏ်တုံးတဲ့သူ မဟုတ်တာမို့။