PSYCHO FRIEND (Season-2) (Completed)

Part 39

🐺Unicode🐍

လတ်တလောထွက်ပေါ်လာတဲ့ ရိပေါ်ရဲ့ ဇာတ်လမ်းတိုကြောင့် အင်တာနက်တစ်ခွင် ထကြွလာတဲ့ဂယက်ပေါင်းများစွာ။ ဇာတ်လမ်းတိုအတွင်း အလွန်တရာဆိုးသွမ်းလှတဲ့ လမ်းဘေးသရဲစရိုက်မျိုး သရုပ်ဆောင်ထားတဲ့ ရိပေါ်ရဲ့ သရုပ်ဆောင်ချက်တွေကြောင့် media တွေက အမျိုးမျိုးချီးကျူးဝေဖန်နေကြပြီး နိုင်ငံတကာပရိတ်သတ်တွေကြားမှာလည်း ရိပေါ်ရဲ့ မတူညီတဲ့သရုပ်ဆောင်ချက်တွေကြောင့် နာမည်ကြီးရေပန်းစားလို့နေတယ်။

ဇာတ်လမ်းတိုနဲ့ပတ်သတ်ပြီး ထွက်ပေါ်လာတဲ့ ရိပေါ်ရဲ့ ဓာတ်ပုံတွေကြောင့် လတ်တလောမှ ဖြစ်ပေါ်ထားတဲ့ fandom သုံးခုရဲ့ ရန်ပွဲဟာလည်း မီးကိုရေနဲ့ငြှိမ်းလိုက်သလို ငြိမ်သက်တိတ်ဆိတ်သွားခဲ့သလို လူကွယ်ရာမှာ စီးကရက်ခိုးသောက်နေတဲ့ရိပေါ်ရဲ့ ဓာတ်ပုံတွေဟာလည်း ယခုအခါမှာ သရုပ်ဆောင်ပြောက်မြောက်ပါတယ်ဆိုတဲ့အကြောင်းပြချက်နဲ့ ချီးမွမ်းထောပနာပြုခြင်းကို လုံးလုံးလျားလျား ခံနေရတော့တယ်။

အများသူငှာမသိရှိခဲ့တာက ရိပေါ်ရဲ့ စီးကရက်ခိုးသောက်နေခဲ့တဲ့ ပုံတွေဟာ ဇာတ်လမ်းတိုနဲ့ လုံးဝသက်ဆိုင်ခြင်းမရှိခဲ့တဲ့အပြင် ထိုသတင်းထွက်ပေါ်လာစေတဲ့ အကြောင်းပြချက်ကိုတော့ ကာယကံရှင်ဖြစ်သူနဲ့ ကာယကံရှင်ရဲ့ ချစ်ရသူကလွဲ မည်သူမျှ သိနိုင်တော့မှာမဟုတ်တော့ဘူး ဆိုတာကိုပါပဲ။

---------------------------------

ကျယ်ဝန်းလှတဲ့ အိပ်ခန်းကျယ်ကြီးအတွင်း အဆုံးစွန်အထိ ချဲ့ထားတဲ့ ဖုန်းစပီကာအသံကလွဲ အရာအားလုံးဟာ တိတ်တိတ်ဆိတ်ဆိတ်။ ဖုန်းမျက်နှာပြင်ထက် သက်ဝင်လှုပ်ရှားနေခဲ့တာက ရိပေါ်ရဲ့ လတ်တလောထွက်ရှိထားတဲ့ မိနစ်နှစ်ဆယ်စာ ဇာတ်လမ်းတို။ ဇာတ်လမ်းတိုအတွင်း လမ်းဘေးသရဲဇာတ်ရုပ်ကို ပီပီပြင်ပြင်သရုပ်ဆောင်ထားတဲ့ ရိပေါ်ရဲ့ပုံရိပ်ဟာ အသက်ဝင်လှုပ်ရှားလျက်သား။

နှုတ်ခမ်းပါးထက် စီးကရက်တစ်လိပ်ကိုခဲထားရင်း အိမ်တစ်အိမ်ရဲ့နံရံကို ကျောမှီထားရင်းက လောကကြီးတစ်ခုလုံးကို ဂရုမစိုက်သလို ပြုံးလိုက်တဲ့အပြုံးမှာ အရွဲ့တိုက်လိုမှုတို့က အပြည့်။ မျက်လုံးအစုံကိုမှေးစင်းရင်း စီးကရက်ကို မီးညှိလို့ ကျွမ်းကျွမ်းကျင်ကျင်ရှူရှိုက်လိုက်တဲ့အခိုက်မှာ တစ်လောကလုံး အမှောင်ဖုံးသွားသယောင်ယောင်။