محمود لحظة شافنا وشاف يمان ماسكني بي ياتو طريقة، عيونو بقت عبارة عن شرار ، جا علينا وملامح وشو ما بتبشر بالخير خالص وأول ما وصلنا طوالي فكاني منو بقوه ولو ما يمان ثبتني كنت ح أقع ، أتخلعت شديد من التصرف العملو ومن الطريقة العصبية الهاجمنا بيها لمن زاحاني من يمان .. يمان قعدني في السرير الكان موجود في الحوش وقال ليهو محمود دا شنو التصرف العملتو دا؟ ما معقولة معاك كنت ح ترمي البت ، محمود قال ليهو الفعلا ما معقول هو أني أخليك تمسكها كدا، أنت بي أي حق تسمح لي نفسك تمسك خطيبتي بي الطريقة دي؟ ما عشان احترمناك وخليناك تقعد في بيتنا تجي تعاين لي البنات الفيهو أحترم نفسك يا زول وتاني مره ما القاك مقرب منها فاهم ولا لا! .. يمان ما ردا عليهو وجا قعد جنبي ، مسك رجلي وقال لي ح أجرها ليك طيب! صاح هي ح توجعك شوية لكن تاني ما حاتحسي بي شي ، هزيت ليهو رأسي بمعنى طيب وهو جراها لي من أصعبي الكبير بقوة لمن قالت طق .. في الاول وجعتني شديد بس بعدها رجعت طبيعية وما كان فيها الم ، يمان قال لي كدي حركيها يمين وشمال، حركتها وكانت عادية ، قال لي وجعتك؟ قلت ليهو لالا، قال لي معناتو بقت كويسه الحمد لله ، طبعا دا كلو ومحمود كان بهرج وبكورك في يمان وبقول ليهو فك رجلها وما تهبشها، ويمان كان مصر ما يرد عليهو .. محمود قال ليهو أنا بتكلم معاك يعني عامل فيها أطرش وما سامع كلامي؟، يمان قام على حيلو وقال ليهو خطيبتك ح توريك كل حاجة وفات بدون ما يضيف ليهو أي شي تاني .. محمود قال لي بصوت عالي: كيف تخلي الزفت دا يمسكك كدا يا وسخة! قلت ليهو محمود ممكن ما تكورك فيني وتبطل تقول لي الالفاظ دي! وأتكلم بهدوء لو سمحت يعني وبعدين كل الحكاية أني وقعت وما قدرت أمش وهو ما لقى حل غير أنو يسندني، قال لي وقعتي ولا رجلك أتقطعت أنا ما عندي شغلة المهم أنو هو تاني ما يهبشك وما القاك قريبة منو ولو مسك يدك بالغلط ساي ما ح يحصل خيير سامعة كلامي دا ولا أخليك تسمعيهو بي طريقتي؟ .. لا يعني هو ما هماهو أنو انا وقعت ورجلي وجعتني وأتجاوز كل الكلام القلتو ليهو وبس ركز في حكاية أنو يمان مسكني؟ ... قلت ليهو عاين ما أنت البتقول لي أعملي شنو وما تعملي شنو أبوي هو الوحيد العندو الحق دا وأنا متاكده أنو هسي لو عرف اني وقعت ح يخاف علي ويجي يسالني من الحاجة الوقعتني مش يتكلم معاي بي طريقتك دي! وطيب دقيقة أنت دايرو يساعدني كيف غير انو يسندني! وبدل ما تكون خايف علي حاليا وبتسالني رجلك مالا ووقعتي كيف وهسي بتوجعك ولا لا! قاعد وبتشاكل فيني عشان غيرك ساعدني وانتبه لي أني وقعت .. زعلت شديد منو وقمت من السرير ورجلي ما وجعتني بعد ما يمان طاقاها لي .. مشيت المطبخ لي خديجة وأنا عايزة أطق من الزعل ، قالت لي وشك شوية ويقع منك مالك! ومالكم جايطين كدا في شنو؟ وريتها الحصل كلو وقلت ليها أنا أخوك دا صدقيني ح أقتلو يوم من الايام، قالت لي معليش ما تزعلي منو محمود دا أتجاهو واحد وما بغيرو، قلت ليها خلينا منو إنتي إنتهيتي؟ قالت لي لالا لسه فضل بسيط والعصيده تجهز قلت ليها طيب .. جهزتا الملاح وهي العصيده ووديناها ليهم وفطرنا نحنا وبعدها مشينا بيت ناس ريان عشان دق الريحة ، لقينا البيت هادي وريان لابسة نقابها وقاعدة ، قلت ليهم عليكم الله دا هسي جو بيت عرس! جيبو الجردل خلونا ندق الدلوكة ونفرفش شوية .. سارة بت عمي مشت جابتو وجات بقت تدق في الدلوكة ونحنا بنغني وبنرقص معاها ، رقصتا كتتير لمن فترتا وحسيت بالعطش فمشيت المطبخ عشان أشرب موية .. وأنا بشرب في الموية كدا فجأة لقيت يمان في وشي وشايل حاجات في يدو شكلو جابينهم أهل العريس ، ختاهم في الأرض وبدون أي مقدمات قال لي عايني تاني ما ترقصي بالطريقة دي قدام الناس وبعدين رجلك دي لسه من كم ساعة ما كنتي قادرة تحركيها أنتبهي ليها وبطلي ترقصي بيها عشان ما يحصل ليك فصل .. رفعتا ليهو حاجبي بي أستغراب وقلت ليهو عفوا؟ قال لي على ما أعتقد كلامي واضح تاني ما ترقصي قدام الناس بي طريقتك دي .. قلت ليهو والله يا أستاذ أرقص ما أرقص دي حاجة بترجع لي أنت ما عندك شغلة فيني وبعدين دقيقة أنت بصفتك منو جاي تمنعني؟ أختك أنا ولا بت خالتك ولا خطيبتك ولا مرتك عشان تمنعني! قال لي بغض النظر عن كلامك وصرفك الكتير للعربي دا تاني لو رقصتي كدا حتحصل حاجة ما ح تعجبك وأنا كلمتك من هسي، وفات بدون ما يسمع ردي دايما لازم يعكر علي مزاجي ويستفزني وما يسمع ردي، أتغظتا شديد منو لمن ملامح الغيظ ظهرت في وشي ، هو منو الاداهو الحق عشان يتدخل في خصوصياتي ويمنعي أرقص! ياااخ أنا القاها منو ولا من محمود...
