كنت مشتاقه ليهو شديد لدرجة إني بكيت بكى وأنا في حضنو لمن الله غفر لي، وكل ما يجي في بالي إني ما شفتو لمدة شهر كامل بحضنو زياده .. فجأه إتذكرت الحصل واللي بي سببو نحنا وصلنا لي المرحله دي، غمت واحده من يديني وبقيت بضربو بيها في صدرو بكل قوتي .. وقلت ليهو لييه عملت كدا يا يمان؟ لي ضربتني وما إشتغلت بي كلامي لمن قلت ليك منذر حاول يتحرش بي؟ لييه هنت عليك شهر كامل يا يمان وما فكرت إنك تجي وتصالحني حتى؟ ليييه بس يا يمان؟ .. قال لي ميامن إنتي عمرك ما هنتي علي ولا ح تهوني خالص بس صدقيني في كل مره كنت بجيكم فيها عند ناس بدر الدين عشان أصالحك في حاجة كانت بتمنعني وما بتخليني أدق الباب ومؤخراً إكتشفت إنو دا كان بي سبب العمل .. ميامن أنا أسف، حقيقي يعني أسف على كل حاجة حصلت وأسف لاني رفعت يدي عليك، وما تقولي إني ما اشتغلت بي كلامك عن منذر لا يا ميامن إنتي ما عارفه أنا يومتها إتمليت منو كيف لمن سمعت كلامك وكنت ح أقتلو بي يدي بس لو ما خالتي إتدخلت وجات حجزتو مني وقتها كان هسي حيكون في خبر كانه، وما حبيت أشوف خلقتو هنا بعد مشيتي عشان كل ما أشوفو بتذكر الحصل معاك فحجزت ليهو في أقرب طيارة كانت راجعة الإمارات وسفرتو تاني يوم طوالي .. ميامن أنا عارف نفسي غلطان وبعتزر وح أفضل أعتزر منك لمن ترضي عني، أنا أسف على كل حاجة حصلت وكانت السبب في إنها تخلينا ما نكون مع بعض..
سكتا ما رديت عليهو بس قعدت في السرير وبقيت خاته يديني على وشي وبتنهد من كتر البكى .. يمان جا قعد قدامي ونزل لي يديني من وشي وقال لي ليه البكى بس! ميامن أعرفي إني لا يمكن أفكر مجرد تفكير أطلقك أو أخليك بعيدة مني بعد اليوم خالص وإنتي غصب عنك ح ترجعي لي، أنا ولهان بيك يا ميامن عارفه يعني شنو ولهان بيك؟ قلت ليهو هئه ما عارفه.. ضحك وخت يدو في خدي وقال لي يعني مشاعري تجاهك واصله ليفل بعيد شديد والحاجه البحسها تجاهك حاجة أعمق وأكبر من إنها تتسمى حب وبس، قلت ليهو طيب معناتو أنا زاتي ولهانه بيك .. ضحك زياده وضماني عليهو وقال لي بي تنهيده: أخخخ يا ميامن ما تصدقي أنا إشتقت ليك قدر شنو، قلت ليهو برضو ما أكتر من شوقي ليك، بتمنى لو إنو الحصل معانا كان حلم وما إضطرينا نبعد من بعض في يوم لانو أنا ممكن أتحمل اي حاجة الا إنك تسيبني، يمان أنا ما عندي غيرك أنت الحاجة الوحيده الانا بقيت عايشه عشانها ولو خسرتك في مره أعرف إني خسرت نفسي، قال لي إطمنئي إنتي عمرك ما ح تخسريني، قلت ليهو حتى ولو أنا غلطت في حقك ونكدت عليك حياتك إنت ح تستحملني؟ قال لي إيوه في أبو ما بستحمل تصرفات ونكد بتو؟ نسيتي إنك بتي؟ قلت ليهو يمان يااخي ربنا ما يحرمني منك أبدا.. قال لي ولا منك يا ست البنات وباسني في خدي، قلت ليهو لحيتك الخنشه دي ما ملاحظ ليها بقت كثيفه شديد؟ قال لي ما هي براها كل شي فيني بقى باهت وحزين لانك كنتي ماف عشان تهتمي بي، قلت ليهو وأنا هسي جيت بكره من الصباح عايزاك تمش الحلاق وتخففها وتظبط لي نفسك، قال لي حاضر من عيوني أي أوامر تانيه يا عسل؟ قلت ليهو جعانه وعايزه أكل من قبيل ما أكلت لاني كنت برسم في الحنه.. لمن قلت ليهو حنه قومني على حيلي وبقى يعاين لي من فوق لي تحت وكان بتفحص فيني، قال لي ما شاء الله دي كلها حلاوه؟ قلت ليهو أحمم بخجل، قال لي دي أول مره ترسمي صاح؟ قلت ليهو إيوه أول مره عجبتك؟ قال لي عجبتني ساي وكفى يا بتي الحنه ح تاكل منك حته حتى كمان لاحظت ليك صحتك زادت شويه وبقيتي كلبوظه تتاكلي بس، قلت ليهو خمسيين🤣، .. ضحك وقال لي غاايتو إنتي ، قلت ليهو أنا جعانه يااخي أرح وريني عندك شنو بياكلوهو ، قال لي طيب تعالي .. مسكني من يدي ومشينا المطبخ، قال لي تاكلي إندومي؟ عارفك بتحبيها ، قلت ليهو هو في زول برفض الاندومي وخصوصي لو كانت من يدك، قال لي دا حنكك عشان أعملها ليك صاح؟ قلت ليهو صح ، قال لي أممم ماشي حنكتيني ح أعملها ، عمل لي الاندومي وجا هو زاتو أكل معاي .. أثناء ما نحنا بناكل كده قال لي ميامن، قلت ليهو عيون ميامن، قال لي ممكن إتكلم معاك في موضوع بس ما تتضايقي؟ قلت ليهو أحكي، قال لي أنا كنت حابب أتكلم معاك في الموضوع دا قبل ما نتشاكل ويحصل الحصل لكن حسيت أنها خصوصياتك وما مفروض أتدخل فيها لانها حاجة بينك وبين ربك لكن بعد الحصل ضروري أتكلم فيها معاك ، قلت ليهو قول كلامك سااي وما تخاف أنا ما ح اتضايق منك، قال لي هو بصراحه الموضوع بخصوص صلاتك، لاحظت ليك كم مرة بتقطعي صلاتك بين كل فتره والفتره التانيه والحاجة دي ما صاح أنا داير مصلحتك وعشان كده بتكلم معاك في الموضوع دا حاليا، ميامن أنا يمان القدامك دا فيني مليون عيب وعيوبي تحصى ولا تعد وأولها إني بشرب سجائر وما قادر أخليها رغم إني عارف إنها غلط وحرام وقاعد أجاهد وأعافر عشان أخليها بس بي الرغم من عيوبي دي وشربي لي السجائر أنا في نفس الوقت قريب من ربنا وبصلي صلاتي في وقتها وبقرا قرأن كل يوم حتى ولو قريت كم أيه صغيره المهم إنو يومي يدخل فيهو قرأن لانو أنا عارف إنو كل حاجة في الدنيا دي هينه إلا موضوع الصلاة .. عارفه إنو البخلي الصلاه متعمد وبقطعها بكون زيو زي الكافر الواحد؟ ميامن صلاتنا يعني قربنا من ربنا وكل ما كنتي قريبه من ربنا كل ما إرتحتي أكتر وكل ما بعدت عنك الحاجات السيئه، مثلا نيڤين والعمل العملتو هسي لو إنتي كنتي ملتزمه في صلاتك وبتقري قرأن وبتواظبي على سورة البقرة وبتتحصني كل يوم كان العمل مشى فيك؟ سكت ما رديت عليهو قال لي جاوبيني، هزيت رأسي بمعنى لا ما كان مشى .. قال لي طيب معناتو إنتي عرفتي غلطتك وين ومفروض تصلحيهو صاح! قلت ليهو إيوه، قال لي إنتي ح تبدي من الليله وهسي بعد تخلصي أكل ح تمشي تصلي العشاء وعشان ما تنسي تصلي أعملي ليك منبه في تلفونك يرن وقت ما الاذان يأذن ويذكرك بالصلاه وحاولي أول ما تسمعي الاذن طوالي قومي إتوضي عشان ما تكسلي، أوعديني إنك ح تواظبي على صلاتك وحيكون عندك ورد يومي من القرآن وبين كل فتره والتانيه ح تقري سورة البقرة وتتحصني كل يوم، قلت ليهو بوعدك ح أحاول يا يمان.. قال لي أنا أسف لو كلامي ضايقك لانها دي حاجة بينك وبين ربك لكن أنا ما عايز الحصل يتكرر مره تانيه وعاوز أشوفك قريبه من ربنا لانك وقتها ح ترتاحي في حياتك وراحتك من راحتي، قلت ليهو أبدا ما إتضايقت منك بالعكس يا يمان أنا حسيت بي مكانتي عندك يعني كونك بترشدني لي الطريق الصاح وبتوريني أهميه الصلاه والمواظبه عليها الحاجة دي بتثبت لي إنو مصلحتي عندك في التوب، قال لي أصلا مصلحتك مهمه بالنسبه لي .. كملت أكلي ومشيت صليت العشاء وأنا خاته في بالي إنو صلاتي من الليله حتكون دايما في وقتها عشان زي ما قال يمان صلاتي يعني قربي من ربنا وكل ما كنت قريبه منو كل ما إرتحت في حياتي والاذى كان بعيد مني .. بعد خلصت صلاه لقيت رساله من ننو بتسالني إنتي وين وريتها إني مع يمان وكده وبعد إتكلمت معاها ختيت صورة يمان في الاستوري بتاعي وكتبت فيها " وسنداً صالح يا الله إن إعوجت الخطوات إقامها"...
