صحيت تاني يوم بصوت الباب وهو بدق، عاينت لي يمان كان لسه نايم وماسكني من خصري أتفكيت منو براحة وحاذرت أنو ما يصحى ، لبست توبي ومشيت فتحت الباب لقيتهم ديل بدر وريان .. قالو لي صباح الخير، قلت ليهم صباح النور يا هلا أتفضلو خشو.. دخلو جوا وبدر سالني وقال لي يمان بقى كيف؟ ، قلت ليهو هسي أحسن من الاول بكتير حتى الحمة خفت، قال لي الحمد لله .. ريان قالت لي سلامتو ما يشوف شر يا رب، قلت ليها الله يسلمك حبيبتي .. شوية ويمان صحى وجاهم ، بدر قام سلم عليهو وقال ليهو شنو يا زول كفاره ، يمان قال ليهو كفر الله سيئاتك ، قال ليهو بقيت كيف؟ يمان قال ليهو تمام والله حتى الحمه خفت، بدر قال ليهو الحمد لله .. قعدو معانا شوية وبعدين أستاذنو مننا وفاتو...
وقت الفطور يمان أكل ليهو كم لقمة بس وبعدها قام .. قلت ليهو على وين؟ قال لي شبعت الحمد لله، قلت ليهو كدا ما ينفع أنت ما أكلت زي الناس؟ ، قال لي حبييبي ما تضغطي علي كفاية الاكلتو، قلت ليهو الاكل دا ما حلو صاح؟ أنا عارفة لكن ما تخاف هسي ح أعمل ليك حلا ظابط ح تاكل يدينك وراهو، قال لي ما قصة حلو ولا لا بس مال لي نفس أكل ، قلت ليهو أن شاء الله الحلا ح يفتح شهيتك ، أبتسم لي وطلع بره...
لقيت المكونات كلها موجودة ما عدا الكاكاو كان مخلص فمشيت برة لي يمان .. وقلت ليهو حبيبي لقيت كل المكونات في بس ناقصني كاكاو ح أمشي أجيبو من الدكان سريع وأجي طيب؟ ، قال لي إنتي خليك هنا أنا بمشي بجيبو ليك ، قلت ليهو لا أنت عيان ما مشكلة بجيبو برااي ، قال لي أسمعي الكلام يا بتي .. قلت ليهو يمان ما تعناد لاني ما ح أخليك تمش وبعدين هو الدكان قريب بجيب الكاكاو في خمسه دقائق وبجي راجعه، قال لي ميااامن.. ما رديت عليهو ودخلت الغرفة جبت قروش ونزلت تحت رغم أنو هو كان بينادي لي بس ما أشتغلت بيهو كتتتير..
لقيت عبد العزيز جنب الباب ، سلمت عليهو وسالتو من خالتو سعاد قال لي أنها كويسه .. قلت ليهو سلم لي عليها، وكنت عايزه أمشي كدا لكن هو وقفني وقال لي ميامن صحي.. إتلفت عليهو وقلت ليهو نعم! قال لي نسيبة كيف؟ ليها كم يوم ما جات الشركة وحتى ما طلبت إجازة بس فجأة أختفت هي كويسه؟ العارفو أنك صحبتها..
قلت ليهو والله يا عبد العزيز حتى أنا زاتي لي كم يوم منها وما عارفة مالا لكن أن شاء الله بعد شوية ح أمش ليها في بيتهم أشوفها مالا وبطمنئك، قال لي أي عليك الله ومشكوره ، إبتسمت ليهو وأستاذنتو .. مشيت الدكان جبت الكاكاو وجيت قلت أعمل الحلا وبعد أدي يمان منها أشيل لي ناس خالتو أسيا وتكون حجة عشان أشوف بيها نسيبة مالا..
عملت الحلا سرعه وأديت منو يمان وكلمتو أني ح أشيل لي ناس خالتو أسيا ، وهو قال لي طيب .. ختيت منها في صحن ومشيت ليهم .. فتحت لي الباب أمها زاتها..
سلمت عليها وقلت ليها خالتو كيف صحتك؟ قالت لي تمام التمام وإنتي؟ قلت ليها في نعمة الحمد لله، أديتها الصحن وقلت ليها دا حلا عملتو وقلت أجيب ليكم منو تضوقوهو ، شالتو مني وقالت لي تسلمي يا بتي لكن مالك معزبة نفسك؟ قلت ليها بالعكس ماف أي عذاب .. فضلتني جوا وبقت تنادي لي نسيبه وقالت ليها يا بت يا ننو تعالي عندنا ضيفة.. لمن ما ردت عليها أمها قالت لي والله البت دي هسي تلقيها ماسكة تلفونها وما سامعاني ، قلت ليها خليها أنا بمش ليها مش هي في غرفتها؟ قالت لي إيوه، قلت ليها طيب .. قمت منها ومشيت لي نسيبه في غرفتها ، لقيتها قاعدة في الأرض وماسكه المخده وسرحانه ، قلت ليها ننو.. ما ردت علي ، قعدت جنبها وطقطقت ليها أصابعيني وقلت ليها هيي أنا بتكلم معاك .. أنتبهت لي وقالت لي ميامن إنتي هنا؟ قلت ليها إيي هنا لكن سرحانة وين لدرجة ما سامعاني؟ قالت لي ما في محل.. قلت ليها ما علي يا أستاذه يلا سريع وريني مالك؟ ، حضنتي عليها وبقت تبكي قلت ليها بسم الله في شنو؟..
قالت لي ميامن أنا عملت غلط وكبير كمان وفوق لي دا أكتشفت حاجة سئيه شددديد عنو هو لي عمل فيني كدا؟ أنا بالجد حبييتو وكنت منتظراهو متين يجي يتكلم مع أبوي وأبقى مرتو بس للأسف هو خذلني، خذلني يا ميامن.. قلت ليها أهدي شوية وأحكي لي الحصل كلو لاني ما فاهمه شي .. قالت لي نحنا بنعرف بعض لينا زي تلاتة سنة يعني أتلاقينا في الجامعة هو كان خريج وأنا توب سنير، أتعرفنا على بعض عن طريق الصدفة وبقينا أصحاب وأستمرينا كده لحدي ما أعترف لي، دا كان أول ولد أنا أحبو في حياتي وأرضى أرتبط بيهو.. في الاول كان محترم معاي شديد يا ميامن حتى هظارو كان في حدود ودي الحاجة الخلتني أحبو وأتعلق بيهو زياده، لكن جات فترة بعد ما هو أتخرج بقينا بنطلع مع بعض كتتتير وهو عادي كان بمسك يدي وأنا أتعودت على الحاجة دي وخالص ما أعترضت.. وشوية وشوية بقى بتحكم فيني ما تلبسي كدا وما تفعلي كدا وما تتطلعي مع صحباتك ولا تتكلمي مع ولد وحتى الشغل حماني ليهو وأنا الغبيه كنت بعمل أي حاجة بقولها لي عشان مفتكرة أنو هو بحبني وبيغار علي وتصرفاتو دي كلها ناتجة من كتر الحب البحبني ليهو لكن في الفترة الاخيره مشاكلنا بقت كتتيرة شديد وفي أقل شي هو بهيج وبقوم الدنيا وبقعدها وطبيعي نحنا في حالة مشكلة جديده وفي حاله زعل ، وقبل أربعة يوم هو عرف أني إتوظفت في شركة ناس عزيز طوالي هاج فيني وسمعني كلام زي السم وقفل الخط في وشي وقتها زعلت شديد منو وبقيت ما برد على مكالماتو ولا رسايلو وهو بس كان بيضرب لي لمن زهجت منو حتى رديت ليهو ، طلب يقابلني وكان مصر جداً على الحاجة دي ، واقفت بعد تعب ومشيت قابلتو في شارع النيل ، قعدنا في العربية وأتفهمنا وهو أعتزر مني وقال لي ح يبطل البعمل فيهو وأنا صدقتو خلاص وقررت أديهو فرصه تانيه .. بس فجأة يا ميامن بقى بقرب مني وباسني إنتي متخيلة معاي؟ ، أتخلعت شديد من تصرفو وقلت ليهو أن.. أنت عملت شنو؟..
ردا وقال لي بكل برود " أهدي دي حاجة عادية بين البحبو بعض وحتكرر كتتير بينا " إنتي متخيلة معاي أنو هو قايلاني عادي ح أرضى بي العملو وح أقبل أنو يتكرر مره ومرتين وتلاتة؟ متخيلة أنو هو مفتكر الحب مجرد رغبات ومسكة يد وتافهات بالشكل المقرف دا؟ .. أنا ما عارفة كيف نزلت من عربيتو بعد الحركه العملها ، رجعت بيتنا وأنا ببكي وبتذكر في العملو ، وقتها حسيت أني خنت ثقة أهلي فيني يا ميامن هما جابوني على الدنيا دي وربوني وكبروني وما قصرو معاي و وروني الصح من الغلط ما عشان أجي أنا وأخلي واحد غريب يمسك يدي في نص الشوراع وأركب معاهو العربية عادي وأنسى أنو " ما خلا رجل بامرأة إلا وكان الشيطان ثالثهما " ولا كمان أخليهو يبوسني ويفتكر أني عادي ح أرضى أعمل كدا وممكن أكررها تاني .. كنت حاسة بي القرف شديد بعد الحصل وقعدتا أفكر وأكتشفت أنو هو ما كان بحبني وعمرو ما حباني وكل الكان بعملو وتحكمو فيني تحت مسمى الحب والغيره هو في الحقيقه سيبل أو طريقة عشان يوري أصحابو أنو هو بيقدر يمشيني على كيفو وأنا الهبله كنت بمشي وين ما يوديني، أكتشفت أنو علاقتنا كانت مجرد وسيله عندو عشان يرضي بيها هرموناتو الذكورية ما أكتر ، ميامن أنا حاسة نفسي كسرت ثقة أهلي فيني ، وبقت تبكي زيادة..
قلت ليها نسيبه أنا ما بقول ليك إنتي ما غلطتي عشان أهديك أو كدا بالعكس ح أقول ليك الحقيقة حتى ولو كانت مره، ننو إنتي غلطانة ومليون غلطانة لمن خليتو يمسك يدك عادي وكانو ما فيها حاجه أعرفي أنك لمن خليتيهو يمسكها وبحرية كمان إنتي أديتيهو فكره عنك يعني طالما أنك رضيتي تخليهو يمسك يدك عادي كدا ف تاني ح ترضي بكل تصرف هو يعملو معاك حتى ولو كان غلط إنتي ما ح تعارضي أبدا، من الاول كان توقفيهو عند حدو وتقولي ليهو حتى ولو أنت حبييبي وأنا بحبك لكن يدك دي ما تصلني ولو عايز تمسكها فبيت أبوي شارعو واحد .. بعدين هو لو كان بحبك بالجد ما كان رضى يلمسك قبل ما تكوني حلالو ودخل معاك في علاقة من بدايتها مبينة على الحرام تحت مسمى الصحبه والحب، من البداية علاقتك معاهو كلها على بعضها غلط وحرام يا نسيبه فكيف دايره ربنا يرضى بي علاقة حرام ويوفقكم فيها؟ مفترض كان تبعدي منو وتقولي ليهو لو عايزيني بالجد تعال لي أبوي وما شرط نتكلم مع بعض أو نطلع ونضحك ونبسط مع بعض عشان نتزوج لا طالما أنت بتحبني ما ح ترضى يدخل بينا حرام وبعد ما تعقد علي وقتها ممكن نعمل أي شي وعادي.. نسيبة الحقيقة بتبقى حقيقة والحرام بفضل طول عمرو حرام ماف علاقة بين ولد وبت أسمها صداقة أو حب هي في الحقيقة علاقة حرام بس مزينة بي أسم الصداقة والحب ربنا قال " مؤمنات غير مسافحات ولا متخذات أخدان " وهنا قصدو علاقة الولد والبت البقولو عن نفسهم أصحاب وبست فريند و.. بس هما سواء رضو أو أبو علاقتهم بتفضل حراام وحاجة ما بترضي ربنا وعمرها العلاقة دي ما ح تجيب ليهم شي غير السيئات حتى ولو كانت بتهظر عكس كدا تماماً ، وهسي يا ستي أمسحي دموعك دي وقومي أتوضي وصلي ركعتين وأدعي ربنا يغفر ليك وأنك ح تحاولي وتجهادي عشان ما تعملي غلط وحرام تاني وربنا غفور رحيم.. قالت لي فعلا كلامك كلو صح وربنا غفور كريم .. قامت مشت صلت وقعدت كتتير في المصلاية وكانت بتدعي .. أنتظرتها لمن خصلت وهدت شوية بعدين قلت ليها يلا أنا بعد دا لازم أرجع بيتي الكلام جرا وما أنتبهت لي الزمن ، قالت لي أقعدي لسه مالك ماشة بسرعه؟ قلت ليها كان الود ودي أقعد بس مواعيد الدواء بتاعت يمان جات ، قالت لي مالو سلامتو! ، قلت ليها عيان شوية لكن هسي بقى أحسن ، قالت لي ايواا ربنا يواليهو بالعافيه ، قلت ليها الله يعافيك حبييبتي .. ختيت يدي في كتفها وقلت ليها نسيبة ما تخلي غلط واحد يأثر عليك وعلى حياتك أمشي أعتذري من أهلك حتى ولو ما عرفو السبب ورا أعتذراك شنو المهم تريحي ضميرك وركزي علي شغلك وحياتك المهنية عشان تقدري تفيديهم وأنا عارفه أنك قويه وح تتجاوزي كل دا ، قالت لي أن شاء الله..
قدمتني لحد الباب وقالت لي ميامن بالجد شكرا شديد على جيتك وعلى كلامك الحلو، قلت ليها العفوا حبيبتي وبالمناسبة عبد العزيز قبيل سالني منك قال ما قاعدة تجي الشركة وكمان ما قدمتي على إجازة ، قالت لي عزيز؟ ، قلت ليها إيوه قالت لي طيب بعد شوية بكلمو بخصوص الشغل ، قلت ليها أوكي بالتوفيق ليك قالت لي أمين حبيبي...
