جريت جري رديت على التلفون وكنت متلهفه شديد لاني عارفاهو دا يمان .. قلت ليهو يمان!، قال لي هلا بي حبيييبي، كيفك كويسة؟ قلت ليهو إيوه بقيت كويسة بعد ما قريت كلامك الكاتبو لي، بالجد أنا ما عارفة أقول ليك شنو غير أنو ربنا يخليك لي يا يمان وما يحرمني منك خالص، قال لي ويخليك يا رب، قلت ليهو المدير شاكلك؟ قال لي لالا ما تخافي عرفت أتعامل معاه، قلت ليهو الحمد لله .. أتكلمنا شوية وكنت عايزة أقفل الخط بس هو قال لي ميامن إستني، إستني ما تقفلي، قلت ليهو في شنو؟ قال لي بحبك.. أبتسمت براي وقلت ليهو وأنا كمان .. بعد قفلت منو بقيت طول اليوم لافه في البيت وحاولت كذا مرة أفتح تلفونو لكن هو كان قافلو بي باسورد وما قدرت أعرفو .. قريب لي العصر قلت أطبخ حاجة لانو يمان أكيد ح يجي راجع جعان، كفاية أني قبيل الصباح ما قمت بدري وهو عمل القهوة والشاي براهو .. لقيت في بطاطس ففكرت أعمل قيمة وأظبطها بي الخضروات .. جيت عايزه أبدا أقشر البطاطس كدا تلفون يمان تاني رجع رن، أعتقدت أنو دا هو ضرب لي المرة التانية لكن لمن شلتو وعاينت في الشاشه لقيت مكتوب " نيڤين" بالانجليزي، من شفت أسمها عرفتها دي بت خالتو ديك .. ما بعرف لي بس أتغظت شديد لمن شفت مكالمتها وقلت لازم أرد عشان أخليها تسمع صوتي وتعرف أني مرت يمان كان تخلينا في حالنا .. رديت وقبل ما أتكلم هي قالت لي الوو يمان كيفك! لي يومين بحاول أتصل ليك لكن تلفونك أبا يخش معاي أنت كويس؟، رديت عليها بكل برود الدنيا وقلت ليها يمان كويس الحمد لله ماف داعي تخافي عليهو، ولويت خشمي .. قالت لي عفوا إنتي منو؟ وكيف سمحتي لي نفسك تشيلي تلفون يمان وتردي على مكالماتو؟، قلت ليها أنا مرت يمان وطبيعي ح أشيل تلفونو وأرد عليك لانو هو راجلي .. قالت لي نعمم؟ إنتي أكيد جنيتي وما عارفة نفسك بتقولي في شنو لانو يمان أستحالة يعرس ونحنا ما نعرف يا بت هيي أديهو التلفون وقولي ليهو يبطل المقلب البعمل فيهو، قلت ليها أنا جادة معاك دا ما مقلب، قالت لي وأنا المطلوب مني أصدقك مثلاً؟ قلت ليها بي كيفك تصدقيني ولا لا دي حاجة بترجع ليك وقفلت الخط في وشها .. والله دا الكان ناقصني تجي بت خالتو وتعمل نفسها خايفة عليهو غااايتو.. قبل ما أخت التلفون من يدي سمعت صوت المفتاح وهو بتحرك في الباب وقتها عرفت أنو دا يمان .. فتح الباب وجا داخل، وأول ما شافني قال لي مياامن.. ما رديت عليهو وغيرت ملامح وشي لي ملامح زعل، قال لي بسم الله مالك؟ قلت ليهو ما مالي، قال لي الجن ولا النفسيات .. أديتو التلفون بعصبيه وقلت ليهو بت خالتك الاسمها نيڤين ولا منو ما بعرف دي أتصلت ليك هنا وأنا رديت ليها قال عايزه تتطمن عليك نينينيي، وعملت ليهو حركة بي وشي .. ضحك فيني وقال لي اها وإنتي قولتي ليها شنو؟، قلت ليهو وريتها أننا معرسين ولمن أبت تصدقني قفلت الخط في وشها، قال لي بصوت عالي: شنوو؟ قلت ليهو خير مالك إتخلعتا؟ قال لي بنفس النبرة والحدة: ما كان تعملي كدا يااخي أنا لسه ما جبت ليهم سيرة عرسنا عشان كنت عايز أفهمهم الموضوع بهدوء لكن إنتي هسي خربتيها وهما أكيد ما ح يرضو يفهموني بعد دا.. أخخخ يا ربي ح تكون زعلت لانك قفلتي الخط في وشها هسي أنا أراضيها كيف؟ قلت ليهو بي بضيق: ما تكورك فيني هي براها سالتني وأنا جاوبتها عاملة نفسها خايفة عليك الأستاذه بس يلا هسي أرجع ليها وراضيها ما أنت ما بترضى زعلها وأنا كورك فيني كويس وما تشغل بي أصلو ما مشكلة يا يمان .. ومشيت منو المطبخ تابعت باقي شغلي وأنا مغيوظة شديد لانو كورك فيني عشان وريتها أني مرتو ولا كمان زعل لاني قفلت في وشها! .. كنت بشتغل بي زهج ومكشره وشي وأخلاقي خلاص بقت في نخرتي، يمان بعد كم دقيقة جا لاحقاني وقال لي ميامن.. ما رديت عليهو وبقيت بكب في البهارات لي اللحمة المفرومة وعاملة نفسي ما شايفاهو .. مسكني من يدي وقال لي بتكلم معاك أنا ردي، قلت ليهو لو سمحت ما تتكلم معاي وأمشي راضي بت خالتك أنا ما مهمة، قال لي ما قصة مهمة ولا لا بس ميامن إنتي فاهمه أنو خالتي هي الربتني من وأنا صغير! وما كنت حابب أوريهم أني إتزوجت بالطريقة دي لانو أكيد ح يتصدمو وما يصدقو فقلت أحسن أخليهم ينزلو السودان وأتفاهم معاهم بهدوء وأوضح ليهم كل حاجة بس إنتي.. قلت ليهو أنا شنو؟ خربت عليك مخططاتك صاح!، قال لي أخخخ المهم عايني أنسينا من الموضوع دا أنا أسف بالجد أسف لاني عليت صوتي عليك معلش ممكن ما تزعلي مني يا بت قلبي؟ .. سكتا مسافه طويلة وبعدين قلت ليهو أممم أنا كمان أسفة ما كنت عارفة أنك عاوز تكلمهم بطريقة معينة لكن بت خالتك دي أنا ما حبيتها ليه تقول لي ما أشيل تلفونك غياظة ياااخي، قال لي صراحة ليك حق تغاري منها لانو هي سمحة شديد وكمان بتهتم بي أهتمام خرافي لمن تشوفيها براك ح تعرفي هي سمحة كيف وتجنن، حمرت ليهو وقلت ليهو يماااان أحسن ليك.. قعد يضحك وقال لي فديت حبييبي الغيور أنا، ضربتو في صدور وقلت ليهو أنننن أنت واحد سخيف زيها وأنا بكرهكم الاتنين ، ثبتني من يديني وجراني عليهو وقال لي بس أنا بحبك، قلت ليهو وأنا ما دايره حبك دا أحتفظ بيهو لي نفسك يا يمان يا مستفز .. قال لي برضو بحبك، وبقى بيقرب مني زياده وأنا خلاص قلبي ضرباتو بدت تتعالى وحسيت أطرافي أتجمدت وما قدرت أتحرك وارتبكتا شديد .. كان عاوز يبوسني كدا لكن الجرس ضرب طوالي زحيت منو بسرعة وقلت ليهو ف..في زول في الباب أمشي شوفو دا منو.. عاين لي بي بضيق وقال لي يعني الزول دا ما لقى وقت يجي فيهو الا هسي؟ .. ضحكت في شكلو وقلت ليهو بالعكس توقيتو مناسب جداً، قال لي يا شيخة مناسب شنو؟ قطع لي أكتر موقف رومانسي ظابط في حياتي كلها .. قلت ليهو سيب الكلام وأمش شوفو منو .. طلع يفتح الباب وأنا أتنهدت وهديت قلبي الكان بضرب كتتير ومشيت الغرفة جبت توب لبستو ومرقت الصالة ، لقيتو واقف ومعاهو ولد شاب بكون قدرو في العمر، قلت السلام عليكم ، الشاب قال لي وعليكم السلام.. يمان قال لي طبعا يا ميامن دا ولد الجيران التحت الأنا مستاجر منهم الشقة دي أسمو عبدالعزيز وأمو ياها خالتو سعاد الكانت قاعدة معاك أمبارح، قلت ليهو صحي!، قال لي أيي، ويا عبد العزيز دي ميامن زوجتي.. الولد قال لي أهلين فيك نورتينا، قلت ليهو البيت منور بي أسيادو .. عاين لي يمان وقال ليهو ما وريتيني عرست متين وليه ما عزمتني يا زول؟ ، يمان قال ليهو معليش ياااخ لكن تقول شنو كل حاجة حصلت بسرعة وفجأة قبل يومين العرس تم في البلد وما لحقت أكلم الناس وأعزمهم ، عبد العزيز قال ليهو ما مشكلة المهم ربنا يهنيكم ، يمان قال ليهو أميين وعقبالك كدا .. خليتهم بيتكلمو ومشيت طفيت النار وجبت ليهو ضيافة .. الولد قعد مده بسيطة وبعدها قال لينا يلا يا جماعة أنا أستأذن منكم وبتأسف على الازعاج عارف وقت الزياره ما مناسب .. يمان قال ليهو أزعاج شنو يا زول! مافي أي أزعاج والله، أقعد شوية مالك ماشي بي السرعة دي الغدا جاهز ، عبد العزيز قال ليهو لالا فل الحمد لله سبقتكم قبيل وأتغديت، بعدين أنا أصلا جيت عشان أطمئن عليك لاني قبل يومين جيت راجع من صلاة الصبح شفتك طالع بي العربية وكنت مستعجل وبالك مشغول فقلت أسالك لمن ترجع وهسي شفت عربيتك برة قلت بتكون رجعت وجيت أسالك الحاصل شنو لكن ياهو عرفت أنك كنت ماشي عشان العرس في البلد وكدا، يمان قال ليهو تسلم ياااخي ما بتقصر ، عبد العزيز أبتسم ليهو وقال لي ما عندي أخوات بس ممكن تنزلي لي أمي تحت ح تونسك هي وانسة شديد، قلت ليهو ايوا عارفها ظريفة وأن شاء الله ح أنزل ليها في أقرب وقت، قال لي طيب وطلع ويمان مشى معاهو .. جهزت الاكل وأنتظرتو، جا راجع وقال لي الله الاكل باين من شكلو أنو حلوو، قلت ليهو أكيد حيكون حلو لاني أنا العاملاهو يا بيبي ، قال لي أي صاح نسيت أنو يدينك سكر وبتحلي كل حاجة تلمسها، قلت ليهو أحم أحم الله يحفظني، قال لي خلاص يا شيخة بطلي تمدحي نفسك وخلينا ناكل أنا جعان شديد .. بعد خلصنا أكل رفعت العدة غسلتها ومشيت لي يمان لقيتو بيحضر في قناة سودانيه24، أديتو عصير وبقيت بحضر معاهو ، شوية وقلت ليهو يمان.. قال لي عيوني، قلت ليهو أنت مؤاجر البيت دا ليك كم سنة؟ قال لي تقريبا لي زيي أربعة أو تلاتة سنة لي مالك بتسالي! قلت ليهو لالا سااي مجرد فضول، قال لي أممم ، قلت ليهو والحتة الساكنين فيها دي أسمها شنو؟، قال لي أم درمان المهندسين، قلت ليهو كاني سمعت بي أم درمان دي من قبل كدا، قال لي إيي بتكوني سمعتي بيها لانو هي كبيره شديد ومعروفة .. قلت ليهو ايواا طيب برضو عايزه أسالك سؤال لكن ما تتضايق منو إذا ممكن؟ قال لي أسالي ساي ما ح أتضايق.. قلت ليهو الليلة أتلاقيت مع بدر الدين؟ على حسب عملي أنو هو شغال معاك في نفس الشركة .. قال لي إيوه أتلاقينا وحتى أني كمان حاولت أتكلم معاهو لكن هو رفض وإتجاهلني ، قلت ليهو أنا أسفه.. قال لي ميامن كم مرة ح تعتزري؟ إنتي ما ليك ذنب الحصل حصل وخلاص، سكت وفي قلبي قلت لازم أصالحهم بي أي طريقة وفي أسرع وقت ممكن لانو هما أتشاكلو بي سببي ، أنا مفروض أوضح لي بدر الدين الحقيقة وأوريهو أنو يمان ما عندو علاقة بي الحصل وأنو أنا الاصريت عليهو أننا نهرب، يمان بحترم بدر شديد ومن المؤكد أنو هو راعى لي مكانتو عندو بدليل أنه ما خلاني أهرب ورجعني بيتنا.. قلت ليهو بي سيرة بدر صحي هما ساكنين وين! قال لي قربيين مننا ساكنين في بداية حي الدوحة يعني بعد ظلطتين من هنا، قلت ليهو ااا تمام .. قلت طالما هما قربيين شديد مننا فدي فرصتي لازم أمشي ليهم وأتفاهم مع بدر...
