لقيت أنو ماف حل قدامي غير أني أكلم يمان، إيوه يمان هو الوحيد الحا يقدر يساعدني، أنا بحبو وحاسة أنو الحل عندو .. لو فضلتا باقي عمري كلو بدون عرس أنا ما عندي مشكلة المهم أني ما أعرس زول غير يمان .. صاح أنا ما عارفة هو ح يساعدني كيف وبي ياتو طريقة لكن المهم عندي حاليا أني أقدر أصل ليهو وفي أسرع وقت ممكن...
خديجة جات لقتني قاعدة في الأرض سرحانة بعيد ودموعي جاريه على خدي، حضنتني عليها شديد وقالت لي ميامن.. قلت ليها خديجة أبوي أبا يسمعني، خديجة أنا ممكن أموت لو عرست محمود.. قالت لي طيب ح تعملي شنو في الورطة الوقعتي فيها دي؟ قلت ليها ما عندي غير حل واحد يا خديجة واحد بسس وماف غيرو .. قالت لي واللي هو؟ قلت ليها أني أتكلم مع يمان وأوريهو الحصل كلو، قالت لي يمان! قلت ليها إيوه يمان.. قالت لي كيف ما فهمتك هو ح يقدر يساعدك بي شنو؟ قلت ليها ما عارفة ح يساعدني بي شنو بالظبط لكن في شعور قوي شديد جواي بقول لي إنتي بتحبيهو وهو بحبك وريهو حايعرف يتصرف، قالت لي طالما حاسة كدا جربي كلميهو يمكن فعلاً زي ما قلتي يقدر يحل الموضوع، قلت ليها المشكلة ما عندي رقمو أو طريقة توصلني ليهو .. سكتت شويه وبعدها قالت لي أنا عندي فكرة، قلت ليها قولي سرعه، قالت لي ح أمشي بيتنا وأسرق رقم يمان من تلفون بدرالدين أخوي أكيد ح يكون فيهو وأجيبو ليك.. قلت ليها بالجد فكرة طيب أمشي جيبيهو سريع وأمي عندها تلفون ريبيكا بتكون رامياهو ساي ح نضرب منو لمن تجيبي الرقم، قالت لي خلاص تمام هسي بمشي بجيبو وبجيك، قلت ليها سمح .. مشت هي وأنا بقيت منتظراها وكنت متوتره وخايفه أنو يقبضها زول، غابت زي مسافه ربع ساعة كدا حتى بعد داك جات راجعة، قلت ليها اهااا بشري أن شاء الله جبتي الرقم؟ قالت لي للاسف تلفونو قافل بي رمز وما قدرتا أفتحو، قلت ليها لا ياااخي وكشرت وشي .. قالت لي هيي بهظر معاك جبتو، قلت ليها قولي والله، قالت لي والله العظيم جد طبعا حنكتو وقلت ليهو عايزة أشوف صورك أنت وريان في شهر العسل وهو أداني ليهو وأنا براحة كتبت الرقم في يدي وجيتك جري، قلت ليها بحبك يا بت عثمان، قالت لي وأنا كمان بس هسي ما عندنا وقت يلا أضربي ليهو، قلت ليها سمح .. مشيت جبت تلفون أمي ولحسن الحظ لقيت فيهو رصيد، كتبت الرقم بسرعه وضربت فيهو .. خديجة قالت لي خشى معاك؟ قلت ليها إيي جايني صوت جرس .. ومع كل رنه جرس كانت بترن قلبي كان بيدق معاها، وبقيت على الحال دا لحد ما الخط فصل وهو ما ردا لي .. خديجة قالت لي دي معضه ياااخ، قلت ليها أخخ من حظي الزفت بعد دا إلا يرجع هو، قالت لي ننتظر بس .. فضلنا منتظرنو يرجع وأنا من التوتر لمن كنت ماسكه التلفون وبضرب فيهو بي يدي التانية ، بعد خمسة دقائق بالظبط كدا جانا أتصال منو ، قلت ليها بلهفه وفرح: خديجة .. خديجة يمان رجع، قالت لي ردي سريع، قلت ليها أنا متوتره، قالت لي حاسه بيك بس يلا ردي عشان ما يقفل، هزيت ليها رأسي ورديت .. ختيت التلفون في أضاني بيد ومسكت خديجة بي يدي التانية ، جاني صوتو وهو بقول ألوو، قلت ليهو أنت ييم...يمان! قال لي إيوه بس منو معاي معليش ما عرفتك؟ قلت ليهو أنا.. أنا ميا... قاطعني وقال لي ميامن؟ قلت ليهو إيي ميامن، قال لي أووو يا هلا بيك كيفك كويسة! قلت ليهو بصراحة ما كويسة خالص ودا السبب الخلاني أتصل بيك، يمان عقدي أنا ومحمود بعد بكرة.. أول ما قلت ليهو كدا سكت مسافه طويله وكانو بستوعب أنا قلت شنو ، قلت ليهو ألوو.. قال لي إيوه معاك، قلت ليهو يمان أنا محتاجة مساعدتك شديد ما عارفة أنت ح تساعدني كيف وبي شنو لكن ما لقيت زول غيرك ألجأ ليهو.. يمان أنا ما عايزة أعرس محمود عليك الله أتصرف، عليك الله يا يمان، وبقيت ببكي .. قال لي بتحبيني؟ قلت ليهو ما عارفه أنا بحس تجاهك شنو بالظبط لكن بعد ما أنت مشيت من هنا ما فارقت مخيلتي خالص وأتاكدت أنك ما ح تفارقها أبدا، صاح قلت أني لا يمكن أحبك في يوم من الايام حتى ولو أنا عايزة بس طلعت غلطانة ومليون غلطانة لمن أفتكرت أني ممكن أقفل على مشاعري دي بي طبلة وأدسها جوا قلبي وهي ح تتمحي مع مرور الزمن وكانها ما كانت بس أكتشفت أنو المشاعر قدر ما تدسها أكيد ح يجي يوم وتطلع فيهو حتى ولو أنت ما عايز.. إيوه أنا بحبك لي شهرين أو يمكن أكتر لاني ما كنت معترفة بي حبي ليك بس عرفت أنو الحب ما بتقاس بالمدة خالص وبتقاس بعمق المشاعر ومقدرة تضحيتنا عشان الزول البنحبو، بقولو أنو الطمأنينة بتجي قبل الحب دايماً ودا الحصل معاي بالظبط، في كل مرة أكون فيها جبنك أو قريبة منك بحس بي الامان والاطمئنان، يمان أنت حببتني فيك وأنا هسي ما عايزة أعرس زول غيرك لو سمحت أتصرف وأمنع عرسي منو يا يمان لو سمحت.. وقعدت أبكي لانو بعد الحب دا كلو أحتمال ما أكون نصيبو وأتزوج محمود اللي عمرو ما يفهمني .. يمان قال لي أول شي أمسحي دموعك دي وما تخافي أنا ح أتصرف وح أحاول أخلي أبوك يغير قرارو، قلت ليهو بس ما أعتقد أنو أبوي ممكن يغير قرارو، قال لي ربك كريم وقادر على كل شي والكاتبو هو البيحصل .. أتكلمت معاهو شوية وبعدها قفلت، مكالمتو دي هدت الحرب الكانت شغالة في دواخلي وللحظه أتزرع جوااي أمل أنو كل شي ح يتصلح، حتى ولو كان الامل دا شوية المهم أنو هو في وأني أتكلمت مع يمان...
