ما هان علي أقول الكلام دا لي يمان بس ما كان عندي حل تاني أنا ما بقدر أملو على الفاضي وأخليهو يدخل في علاقه نهايتها معروفه شنو وهي أني ما حكون نصيبو، وأني بعد كل الحب الحايحبني ليهو أثناء علاقتنا أنا في النهايه حكون مرت واحد غيرو.. يمان بعد كلامي معاهو ما عرف يقول شنو وفضل ساكت لمسافه طويلة وبعدها يالله قدر ينطق وحسيت لسانو تقيل وهو بقول لي " ميامن" .. قلت ليهو يمان أنا أسفه حقيقي يعني أسفه لانك حبيت واحدة زيي عمرها ما ح تقدر تبادلك نفس مشاعرك ولا يمكن أنها تكون ليك في يوم من الايام ، قال لي بس يا ميامن .. قاطعتو وقلت ليهو يمان أنا ما نصيبك ولا يمكن أني أكون نصيبك، بتمنى تلقى البتستاهلك بالجد وبتستاهل حبك، عارفة أني في اللحظة دي جرحتك وشديد كمان بس للاسف حبك لي ما ح يديك شي غير وجع القلب معليش أنت حبييت البت اللغط يا يمان... قلت ليهو كدا وأتحركتا من جنبو وكنت حاسه بكمية من الاحساسيس المخلبطة وشعوري الوقت داك ما كان بيتوصف، ما بين مبسوطه لانو هو طلع بحبني، يعني أنا محظوظة شديد لانو في واحد زي يمان حباني، وما بين زعلانه لاني ما ح أقدر أبادلو نفس المشاعر حتى ولو أنا عايزه أخخخ بس .. خطواتي حسيت بيهم تقال وأنا ماشة وبالعافيه كنت قادرة أتحرك وكلمتو ما زالت بتردد جوا مسامعي وكانها أتقالت في اللحظة دي ما قبل مدة من الزمن ، وقفت قدام المدخل بتاع خيمة العرس ومسحت دموعي الكانت نازله على خدي وحاولت أخلي ملامحي طبيعية وأرسم أبتسامه مزيفه على وشي ، دخلتا جوا ومشيت ورا أخر شي، فتشت لي كرسي قعدت فيهو .. وما كنت فاهمة شي من بااقي الحفله بس بفكر في يمان وفي كلمة بحبك القالها لي .. شوية وحسيت بي خديجة بتخت يدها في كتفي وبتقول لي ميامن مالك؟ ، أبتسمتا وقلت ليها مالي طبيعية، قالت لي لو غشيتي على الناس القاعدة دي كلها ما بتقدري تغشي علي أنا وريني في شنو! حضنتها قوي وقلت ليها خديجة.. قالت لي مالك يا قلبي؟ قلت ليها أنا ما قادرة أقعد في المكان دا زيادة سوقيني منو، قالت لي طيب ح أسوقك بس إنتي هسي أمسحي دموعك، خلاص ح نمش بيتكم ومنها تحكي لي الحاجة المخلياك تبكي ، مسحت لي دموعي وساقتني بدون ما زول ينتبه لينا .. مشينا بيتنا ومن وصلنا دموعي تاني نزلت، خديجة قالت لي بسم الله خوفتيني مالك يا بت؟ قلت ليها يمان يا خديجة يمان، قالت لي مالو؟ قلت ليها أعترف لي وقال لي أنو هو بحبني إنتي متخيله معاي! ، عاينت لي وهي منططه عيونها وقالت لي شنووو؟ .. حكيت ليها الحصل كلو وقلت ليها قلبي واجعني شديد يا خديجة أنا بالجد ما كنت عاوزة أجرحو بس ما كان في حل قدامي تاني والفكرة دي مضايقاني لدرجة بعيدة، طول عمري كنت بتمنى أنو يحبني واحد زي يمان وهسي لمن الحاجة دي أتحققت أنا ما ح أقدر أحبو لانو مصيري أتحدد من زمان، خديجة أنا لي مكتوب كدا لي بس وريني؟ يعني أنا ما من حقي أحب الزول الانا عايزاهو؟، قالت لي ما عارفة أقول ليك شنو يا ميامن لكن أتاكدي أنو كلو لي خير وربنا ح يديك البستاهلك سواء كان محمود أو غيرو، ولو إنتي من نصيب يمان أعرفي أنو حتى محمود ما ح يقدر يعارض النصيب دا، إنتي خلي أملك في ربنا كبيير وهو ما بظلم زول صدقيني، قلت ليها ونعمة بالله .. بقت تهدي فيني لحدي ما ناس أمي جو من الحلفه، أمي أتفاجات لمن شافتنا في الغرفه وقالت لينا بسم الله إنتو جيتو متين! خديجة قالت ليها جينا قبل شوية، قالت ليها اها، ح تنومي هنا ولا ماشه بيتكم! خديجة قالت ليها لالا قاعدة قالت ليها سمح تصبحو على خير، قلنا ليها وإنتي من أهل الخير .. الليل كلو ما نمنا وفضلنا مساهرين ، أنا دموعي جاريه على خدي وما راضية تقيف نهائياً وخديجة بس بتعاين لي وما قادرة تسوي أو تقول حاجة....
