يمان قال لي بسم الله مالك فجأة سكتي؟، مديت ليهو التلفون وقلت ليهو أقرا الرسالة دي وبعدها أقرصني وريني إذا هي حقيقة ولا لا؟ .. شال مني التلفون قراها وقال لي الليله يا ميامن بت أحمد نتيجتكم بكرة ، قلت ليهو واااي جاني وجع بطن من الخوف ، قال لي قولي الحقيقة ح تنجحي ولا لا؟ والله لو وريتيني ما بكلم زول بس عشان ما أشتري حلاوة وأخسر قروش سااي، وقعد يضحك .. قلت ليهو يمان ما تتظراف معاي لاني متوتره شديد، قال لي معناتو ما ح تنجحي يا خساارة، وعمل لي حركة بي يدو، قلت ليهو ما كانك أوفر دراما زياده عن اللزوم؟ قال لي الدراما في جهه وأنا في جهه تانيه خالص لكن معليش عشان أنا قلت الحقيقه وعرفت أنك ما ح تنجحي طوالي إنتي شفتي الموضوع على أساس أنو هو أوفر دراما ، قمتا من رجلينو وقلت ليهو أننننن سخيف.. وطلعت برة ، بقيت شغالة أمشي وأجي في الصالة وبطقطق في أصابعيني من التوتر، يمان قال لي ما ممكن ياااخ دوشتي رأسي معاك خلاص كفاية قلنا ما ح تنجحي يعني ما ح تنجحي ، قلت ليهو يمان ما تتكلم معاي أنا قطعتها معاك ستة صفر يلا .. وباقي اليوم كلو برضو فضلتا مقلقه كدا وبالليل نهائي ما نمت وكل دقيقة والتانية بتقلب في السرير ويمان دا كرهتو حياااتو وكل شوية بصحيهو وبقول ليهو أنا ما قادرة أنوم .. أخر مرة صحيتو وقلت ليهو يمان شكلو كلامك ح يطلع صاح وأنا ما ح أنجح ، قام على حيلو وقال لي يا بت إنتي هبله؟ أنا عارف كويسس أنك أنسانه طموحة شديد يا ميامن وعارف أنك عايزه تحققي حلم أبوك فاكيد لمن كنتي بتقري كنتي بتتذكري الحاجة دي وبتقري بي تركيز عشان تحققيها ومتاكد أنك قريتي وتعبتي شديد وح تلقي مقابل لي تعبك دا ربنا ما بظلم زول يا ميامن والزول على حسب ما يتعب بيلقى وإنتي كانسانة أبوك خاتي كل أمالو وأحلامو فيك أكيد حتكوني قريتي قرااية جد وح تجيبي نسبة ترفع رأسو ، قلت ليهو يمان يااااخي والله ما عارفة أقول ليك شنو، قال لي ما ضروري تقولي شي أنا حاسي بيك ودا المهم ، قلت ليهو يعني ح أنجح؟ ، قال لي ميه في الميه وممكن تتزاعي في التلفزيون برضو، قلت ليهو هيي أنت كمان ما تبالغ.. قال لي ما مبالغة ولا شي أنا جادي لانو أيام كنتو ممتحنين بدر الدين كان بيسال خديجة بي تلفون أبوهو وبقول ليها كيف أمتحنتو وكيف مع القراية! وهي كانت بتقول ليهو أنك بتقري كتتتير وما بتنومي بليل خالص وبتحفظي الحاجة وبتجي تراجعيها مليون مرة وبتقري لمن تقولي كفايه يعني بي إختصار إنتي قريتي قراية ممكن تخليك تتزاعي... قلت ليها يماااان، قال لي فاهمك يا عمري بس حاليا خلينا ننوم عشان نكون جاهزين لي بكره، قلت ليهو طيب...
تاني يوم يمان قال ما ح يمشي الشغل عشان حابب يفضل جنبي وما يسيبني في يوم زي دا برااي .. وطول الوقت كان بغيظني وبقول لي ما ح تنجحي يا بتنا فما تقلقي على الفاضي أنا أمبارح كنت بطمئن فيك ساااي عشان تخليني أنوم وما تزعجيني وأنا هسي شايل هم يا ربي ح أقول لي الناس شنو لمن نتيجتك تظهر؟ .. طبعا دا كلو عشان ما يخليني أتوتر زياده وأحاول أشاكلو وأنشغل بيهو وأنسى التوتر شوية .. ناس بدر الدين وريان جوانا من بدري عشان يحضرو المؤتمر معانا .. زي الساعة واحده كدا المؤتمر بدأ وأنا خلاص قلقتا وأتوترت شديد وقلبي بقى في يدي وكنت منتظراهو متين يخلص عشان أعرف نتيجتي .. فجأة أسمع أسمي في التلفزيون " ميامن أحمد حماد، النسبة.. "، لحظة سمعت أسمي أتخلعتا خلعه لدرجة أني قومتا على حيلي وأنا ما مستوعبة شي ودموعي طوالي جو جاريين على خدي .. ريان بقت تزغرذ وأنا بس ببكي ومن الفرحة ما لقيت نفسي إلا وأنا بحضن يمان وببكي في حضنو حتى ما ركزت مع بدر وريان القاعدين معانا ، وكل ما أتذكر أنو أبوي كان منتظر اليوم دا من وأنا صغيره ببكي زياده .. يمان قال لي حبيبي ألف ألف مبرووك كنت واثق أنك قدرها وأنك ح ترفعي رأس أبوك ورأسنا نحنا كمان، قلت ليهو يمان أنا ما مصدقه.. قال لي لا صدقي إنتي بالجد تستاهلي .. بكيت بكى وأنا في حضنو وكنت ضاماهو علي شديد ويالله رضيت أهدى شويه وأفكو .. ريان جات باركت لي وقالت لي مبرووك يا قلبي عمي أكيد حيكون فخور بيك شديد اللحظة دي ، قلت ليها حبيبتي تسلمي .. بدر قال لي ألف مبروك ليك وأن شاء الله من تفوق لي تفوق.. قلت ليهو الله يبارك في عمرك ، قال لي عاوز أضرب لي ناس أبوي أشوف خديجة جابت كم، قال لي أيي عليك الله...
ضرب وردت ليهو خديجة زاتها وقالت ليهو أنها جابت 87,7 .. قلت ليهو بدر، بدر أديني أبارك ليها ، قال لي هااك .. شلت منو التلفون وقلت ليها خديجة عثمان، قالت لي مياااامن ، قلت ليها حبيبي مشتاقين شديد أقسم بالله، قالت لي كتتير كتتير كيفك كويسة! قلت ليها كويسة الحمد لله وإنتي كيف وأبوي وأمي كيفهم! قالت لي كلنا كويسين الحمد لله، قلت ليها مبروووك النجاح، قلت ليها ومبروك ليك كمان، قالت لي ناس عمي هسي كانو هنا وحضرو معانا المؤتمر، قلت ليها بالجد؟ قالت لي أيي ولمن زاعو أسمك لاحظت لي عمي عيونو كانو مدمعين وحسيت بنظرات الفخر فيهم صدقيني صاح هو زعلان منك لكن الليلة هو فخور بيك شديد وأنا عارفة أنو كان متمنى لو كنتي قدامو هنا لحظة ما قالو أسمك ، بكيت لمن قالت لي كدا وقلت ليها أشتقت ليهو نفسي يسامحني وأرجع أحضنو، قالت لي قريب يا ميامن، قلت ليها عليكم الله يا خديجة خلو بالكم منو، قالت لي ما بتوصينا عليهو.. أديت التلفون ريان عشان تبارك ليها بسرعه وجريت الغرفة ، قعدت في السرير وبقيت ببكي .. شوية وحسيت بي يمان وهو بحضني وبقول لي ميامن كفااية بكى الليلة مفروض تكون في ضحكة بس على وشك ، قلت ليهو كيف ح أضحك وأبوي ما جنبي في يوم زي دا؟ .. زحا مني ومسح لي دموعي وقال لي كلو لخير حبييبتي وصدقيني هو حاليا حيكون مبسوط بي نتيجتك شديد وح ينبسط أكتر لمن يشوفك بقيتي دكتوره ، قلت ليهو يمان أنت بتفتكر أنو ممكن يجي يوم وأبوي يرجع يتكلم معاي؟ يجي يوم وأبوي يسامحني ويرضى عني! تفتكر أنو ممكن أبوي يرجع ويقول لي " بتي" ، بتعتقد أني في يوم من الايام ممكن أرجع أحضن أبوي تاني وأبكي في حضنو بعد العملتو، بعد ما كسرت ظهرو؟ .. قرب مني أكتر وخت يدو في حنكي وقال لي ما عارف والله بس كل العارفو إنو ربنا كريم شديد ولطيف بعبادو وعارف أنك لو دعيتي عشان أبوك يسامحك ويرضى عنك ربنا أكيد ح يستحيب لي دعائك ، قلت ليهو بتعرف أنو اليوم دا أبوي كان منتظرو وبفارغ الصبر، كان حابب يشوفني وأنا ناجحة ومتفوقة، أنا ليه عملت فيهو كدا؟ أنا لي كسرت ظهرو وخليتو يتف في وشي؟ هو عمرو ما قصر معاي في حاجة، إذا كنت عاوزة شي فأنا قبل ما أطلبو كنت بلقاهو جابو لي، أنا بالجد أشتقت ليهو شديد، يا ريت بس يا ريت لو بقدر أتكلم معاهو، قال لي ح تكمليهو في أقرب وقت ممكن أن شاء الله بس إنتي هسي أمشي غسلي وشك دا وتعالي عشان ناس بدر منتظرننا برة ما صاح نفضل هنا كتتير .. أكتفيت بي إني أهز ليهو رأسي ومشيت الحمام غسلت وشي وطلعنا برة .. يمان دخل المطبخ جاب حلاوة وجا وزعها عليهم وقال لي كنت قايل نفسي ح أكل الحلاوة دي برااي لكن طلعتي شاطره ونجحتي ، قلت ليهو غياااظ... جراني من أنفي وأستأذن مننا قال عندو مشوار قريب ماشي وجاي .. وغاب زي ربع ساعة كدا وبعدها رجع .. ناس خالتو سعاد وأسيا ونسيبة وحريم تانيات كلهم جونا ، باركو لي وقالو لي سمعنا زغاريد منكم وسمعنا أسمك في التلفزيون وقتها عرفنا أنك ممتحنة وجينا نبارك ليك ، قلت ليهم الله يبارك فيكم تسلمو ياااخي .. يمان ضيفهم وأستمر اليوم كلو كدا ناس الحي داخلين ومارقين مننا بباركو لي...
