إستغربت شديد من ردة فعل يمان وما إتوقعتو يعمل كدا خالص، قلت ليهو بعدم إستيعاب: يمان أنت ضربتني؟ .. قال لي وتاني ح أضربك يا ميامن لو إتكلمتي مع خالتي بالطريقة دي ورفعتي صوتك عليها، خالتي هي الربتني يعني إذا ما عرفت تربي منذر ونيڤين يعني ما عرفت تربيني أنا كمان، أوعك تاني مرة ترفعي صوتك دا عليها أو تردي ليها بالشكل دا فاهمة ولا لا؟ قلت ليهو رفعت يدك علي عشان قلت الحقيقة؟ وخليت كل كلامي لمن قلت ليك منذر أتحرش بي وركزت بس على إني إتكلمت مع خالتك بالطريقة دي؟ أنا بالجد مصدومة فيك لكن شكرا يا يمان شكرا عمري ما ح أنسى الكف دا .. قلت ليهو كدا ومشيت الغرفة لميت كل حاجة بتخصني في شنطة ولبست أقرب طرحة لقيتها في وشي وطلعت بره .. طبعا كلهم إتخلعو لمن شافوني شايله شنطتي ، ويمان زحا يدو الكان خاتيها على وشو وملامح وشو أتغيرت أول ما شافني ماسكه شنطتي وقال لي ميامن دا شنو! .. طلعت بره بدون ما أرد ليهو ولا إشتغلت بيهو الشغله ، يمان لمن أستوعب إني شلت شنطتي وماشه من هنا قام على حيلو بسرعه وجا لاحقني لقاني وصلت الشارع..
قال لي ميامن إنتي ماشة وين؟ قلت ليهو ان شاء الله أمشي جنهم أنت ما عندك شغله فيني خليك بعيد من طريقي بس .. مسكني من يدي وقال لي ميامن إستني.. مجرد ما عمل كدا طوالي فكيت يدي منو بقوه وقلت ليهو بنبره حاده: أوعاك تاني مرة تلمس يدي يا يمان ولا تفكر مجرد تفكير إنك تتكلم معاي أو تقرب مني حتى .. وعاينت ليهو من فوق لي تحت وكملت مشي .. لحقني تاني وقال لي خلاص ما ح المسك بس إنتي أرجعي معاي ماشه وين في الوقت دا؟ قلت ليهو ما يخصك يا يمان ما يخصكك فاهم ولا لا؟ .. جا وقف قدامي وقال لي ميامن أسمعي العايز أقولو ليك، قلت ليهو ولا تحلم إني أسمعك يا يمان أصلا بعد الليلة ماف تاني كلام ح يتقال بينا يلا زح من شارعي وخليني أطير من هنا، قال لي أنا أسف.. لمن كلمه أسف دي دفرتو بي يديني وبكل قوتي لي ورا، وقلت ليهو أسف؟ .. وبقيت بضربو في صدرو وقلت ليهو أسف يا يمان؟ أسف بتاعتك دي بلها وأشرب مويتها لانها ما ح تمسح الكف والكلام القلتو لي قبل دقائق، قال لي أنا ما كنت عايز أعمل كدا بس يا ميامن إنتي.. قاطعتو وقلت ليهو طلقني ، أتخلع من كلمتي القلتها ليهو وسكت ما ردا علي، قلت ليهو بتكلم معاك أنا طلقني يا يمان طلقني وهسي في اللحظة دي كمان..
قال لي ميامن إنتي أكيد ما عارفة نفسك بتقولي في شنو وما واعيه صاح؟ قلت ليهو لا أنا مستوعبة وعارفة نفسي بقول في شنو كويس، طلقني يا يمان انا ما عايزه اي علاقة تربطني بيك نهائياً ، قال لي ما ح أطلقتك ولا تحلمي أني ممكن أطلقك في يوم من الايام، قلت ليهو طالما ما ح تطلقني أبعد من طريقي هسي وأنا بعدين ح أعرف أطلق منك كيف، قال الدايره تعمليهو أعملي أنا طلاق ما بطلقك لو متي ولو حيتي .. عاينت ليهو بي غضب وجيت طقشتو بي كتفي قوي وتابعت باقي المشي بتاعي وأنا حرفيا شارع ناس بدر الدين بي وين ما عارفاهو بسبب الحصل لي وكنت ماشه في الشارع سااي .. يمان كان ماشي وراي وبيحاول يوقف فيني لكن أنا ما راضية أقيف ليهو وماشة على وين أنا زاتي ما عارفة..
لاقانا عم كبييير في الشارع وشاف يمان لاحقني وبيحاول يوفقني ف إفتكرو واحد بشغال فيني ، قال لي الولد دا قاعد يضايقك يا بتي؟ قلت ليهو إيوه يا عمي...
قال لي يمان: داير شنو من البت؟ يخس عليك وعلى أخلاقك ما عندك شغلة غير أنك تلحق بنات الناس ما بتخجل؟ ياااخي عيب عليك يلا أتحرك من هنا سريع وبطل تشاغل البنات .. يمان قال ليهو دي مرتي يا عم وهي زعلانة مني في حاجة عشان كدا ما راضيه تتكلم معاي لكن أنا بعرف أراضيها كيف شكرا ليك على سؤالك ، قلت ليهو لا أنا ما مرتو ولا حاجة الولد دا قاعد يكذب .. يمان قال لي ميامن بطلي.. قلت ليهو ما تتكلم معاي ولا تحلقني يا ود الناس وسيبني في حالي.. العم قال ليهو إذا هي بي خمشها قالت إنها ما مرتك معناتو هي فعلاً ما مرتك أبعد من هنا يا ولد وخلي البت في حالها..
وقال لي: ماشة وين يا بتي في الوقت دا؟ قلت ليهو بيت ولد عمي لكن نسيت الشارع بي وين.. قال لي كدي روقي شويه وحاولي إتذكريهو .. يمان ما أشتغل بي كلامنا وجا مسكني من يدي وبقى سايقني معاهو بالغصب .. العم قدر ما حاول يتدخل بينا ويزحني منو يمان ما خلاهو وقال ليهو قلت ليك دي مرتي وأنا بعرف أتصرف معاها شكراً ليك .. قلت ليهو فكني أنا ما ماشة معاك مكان، وبقيت بعضي فيهو في يدو لكن هو حلف كان يفكني، وقال لي مش ماشة ناس بدر؟ أنا ح أوديك ليهم يلا أمشي معاي بي هدوء .. لمن قال لي أنو ح يوديني ليهم حتى سكتا وبالفعل أتحركنا على شارع بيتهم .. الطريق كلو ونحنا ساكتين لحدي ما وصلنا البيت .. دقيت الباب ويمان دا بس كان بعاين لي وما قادر يعمل شي عشان يوقفني بيهو..
بدر الدين فتح لينا الباب وأتهجم بشكلي وأنا ببكي ودموعي جارية على خدي زي المطر وشايلة شنطتي في يدي، قال لي بهجمه: ميامن؟ مالك في شنو بتبكي كدا ولي جاية بي شنطتك؟ .. ما رديت عليهو وفضلتا ساكته، عاين لي يمان وقال ليهو مالكم يا زول الحاصل شنو؟..
ما إستنيت يمان يرد ليهو ودخلت جوا وخليت بدر واقف معاهو، خشيت وقعدت في أقرب سرير لقيتو في الحوش وبقيت ببكي بي حرقة .. خديجة وريان إتهجمو زي هجمة بدر الدين لمن شافني، خديجة جات حضنتي عليها وبقت تسأل فيني مالي ولي ببكي وريان كذالك، أما أنا ما كنت قادره أتكلم وأفهمهم الحصل خالص من كتر البكى .. بدر الدين جا راجع بعد ما يمان وراهو الحصل كلو، وهو بي دورو حكى لي خديجة وريان ووراهم المشكله الحصلت من الطقطق لي السلام عليكم .. بقو قاعدين جنبي وبيهدو فيني وبقولو لي أنو كل حاجة ح تتصلح وأنا نهائي ما وقفت بكى...
طول الليل عيوني ما شافت النوم وكل دقيقتين الموقف بتكرر قدامي وكل ما أتذكر أنو يمان ضربني كف وقال لي الكلام داك بحس بي وخزة قوية شديد في نص قلبي..
