ما أعتقد أنو ممكن يمر علي موقف أسوء من موقفي وأنا بشوف محمود حاضن منى بت عمي موسى وبقول ليها بحبك .. منظرهم كان مقرف شديد لدرجة ما بتقدر تعاين ليهم مرتين من القرف ، في اللحظة ديك ما كنت عارفة أعمل شنو لا قادرة أتحرك ولا قادرة أتكلم وبس مخلوعة من الحاجة الشايفاها قدامي ومن الصدمة لمن بقيت برمش في الدقيقة الواحدة أكتر من مليون مرة، بالعافية قدرت أنطق وأقول ليهو بعدم إستيعاب "محمود دا شنو؟" .. هما أتهجمو شديد لمن شافوني واقفه قدامهم وطوالي فكو بعض بسرعه .. محمود قال لي بخلعة: ميامن؟ قلت ليهو إيوه ميامن ممكن تفهمني الشفتو والسمعتو دا يطلع شنو؟ ، قال لي أنا..أنا بس كنت.. وسكت ، قلت ليهو طبيعي ح تسكت وما تعرف تجاوب لانو أساسا ما عندك كلام يتقال بعد الحصل دا معقولة يا محمود أنت يطلع منك كده! قال لي ميامن أستني إنتي فاهمة غلط، قلت ليهو غلط! غلط يا محمود؟ أنا شفتك بي عيني وماف زول قال لي عشان أفهم غلط، عمري ما أتخيلت أنو أنت ممكن تعمل كدا كنت مفتكره أنك حتكون سندي بعد أبوي بس الليلة للاسف أكتشفت أنك مجرد حيطة مايله وما ممكن أفكر أني أثق أو أتكل عليها في يوم من الايام، وريني أنا سويت ليك شنو عشان تخوني بالطريقة السيئه دي؟ قلت لي ميامن.. قلت ليهو ولا كلمة يا محمود أنا ما عايزة أسمع منك أي مبرر كفاية الشفتو ولحدي اللحظة دي حاساهو حلم وما قادر أستوعبو صحي القالو أخر الجزاء حيكون أذى .. وإنتي؟ ، قربتا من منى أكتر وهزيتها من أكتافها وقلت ليها أنا ياداب فهمت لي إنتي كنتي بتكرهيني ولي محل ما نمش بتقعدي تعاريني وتقولي لي ما بتستاهلي محمود لانك بت مدلعة ساي وكلام كتتير أتاريهو دا الموضوع الحقيقي، عارفة لو كان جيتي وصارحتيني وقولتي لي بحب محمود ومحمود بحبني أقسم بالله كان خليتو ليك لكن الخساسة يخلوها لي منو؟ ياااخي تفو عليكم الاتنين .. منى قالت لي هييي تخليهو لي ليه! قايلاهو لعبه عشان تخليهو لي؟ أنا برااي عرفت أحببو فيني يختيي وبعدين هو ما عايز واحده همها القراية وتقعد تفلهم عليهو عشان هي قرت محمود عايز واحدة زيي ما يكون عندها هم غيرو هو بس .. قلت ليها هههه ضحكتيني شديد والله ااا أنا كيف ممكن أنسى أنك واحدة أقصى طموحاتك راجل لكن للاسف حتى دي ما ح تقدري تحصلي عليها بسبب أختيارك الزق وأصلو ما مشكلة يا زولة أقعدي عمرك كلو أخدمي فيهو ولبي ليهو طلباتو لحدي ما يشوف غيرك زي ما شاف غيري دا مجرد واحد باطل ما أكتر ومبروك عليك عرفتي تختاري واحد ما محسوب مع الرجال أصلا .. قبل ما أتم كلامي جاني كف قوي في خدي من محمود وقال لي بصوت أشبه بالعالي: ميااااامن أحترمي نفسك أحسن ليك.. قلت ليهو أوعى مره تانية ترفع علي يدك فاهم ولا لا! وهسي مالك ضاربني يعني عشان قلت الحقيقة؟ طيب أحب أطمنك وأقول ليك أنك ما راجل لانو دي ما حركات رجال .. قال لي لا بالجد عمي ما عرف يربيك يا قليلة الادب، قلت ليهو أبوي رباني أحسن تربية وعرف يوريني الرجال من أشباهم.. وعاينت ليهو من فوق لي تحت، قال لي قصدك شنو؟، قلت ليهو الفهمتو.. وقبلت على منى وقلت ليها بقولو الطيور على أشكالها تقع ودا ياهو القاعد يحصل معاكم بالظبط إنتي وهو، ومبروك عليك يا حبيبتي لانو من الليلة دا لا خطيبي ولا أنا بعرفو يلا لمي عليك وأن شاء الله ما يخونك مع أنو ما أعتقد العين الزايغه ممكن يجي يوم وتتملي فيهو.. تابعت باقي كلامي وقلت ليهو أنا بحمد ربي لاني ما وافقت أتم عرسنا أخخ الحمد لله بس، واتاكد أني من شارعي دا ح أمشي لي أبوي طوالي وأوريهو بي عمايلك وهو ح يعرف يتصرف معاك .. ومشيت منهم خطوتيين كده سمعت محمود بقول لي أخر زمن جايه تطلعيني ما راجل مع الرجال؟ طيب يا ميامن أنا بعرف أربيك كيف وح أخليك تعرسيني غصب عنك ووقتها بوريك الرجال بتصرفو كيف .. قلت ليهو بدون ما أتلفت عليهم: هه في أحلامك أنا لا يمكن أعرسك وح أكلم أبوي بي عمايلك، قال لي ما ح تقدري تكلميهو .. قبلت عليهو وقلت ليه عفوا وليه ما بقدر؟ قال لي لانو لو كلمتي أبوك أنا ح أكلم القبيله كلها بي الحاجة العملها قبل 14 سنه، وح أقول ليهم أنو أبوك قبل 14 سنه شال أرض ناس ظلم وشرد أسرة كاملة وخلاهم يموتو من الجوع في الشارع ومشى زور أوراق الأرض دي وعملها بي أسمو وباعها، قلت ليهو على أساس أني ح أصدقك مثلاً! وأصلا أبوي أستحالة يعمل كده أنا بعرفو كويس أبوي مستعد يموت بس ما يظلم زول، أبوي أنسان بخاف ربنا.. قال لي صاح أبوك ما عمل كده لكن عمتي بدرية وعمي موسى هما العملو كده بي أسم أبوك يا حلوه، وبعد باعو الارض ووزعو قروش الأرض بينهم بس القبيلة ما عندها علم بي أنو عمتي بدرية وعمي موسى هما اللي عملو الكلام دا وما ح يتهمو زول غير أبوك لانو هو المسؤول من الأراضي الفي القرية كلها والاوراق العندي بتقول أنو الشال الأرض هو أبوك وأنا ح أديها لي ناس الشرطة ووقتها أبوك ح يدخل السجن لانو زور الأوراق وأكل قروش الأرض الاصلا ما حقتو، إنتي بترضي أنو أبوك يخش السجن أخر عمرو؟ إنتي عارفة السجن عامل كيف والعيشة فيهو كيف! طيب بترضي أبوك يتفضح ومكانتو تنزل في عين الناس وبعد التعب التعبو كلو عشان القبيلة تحترمو يخسر تعبو وأحترمو دا في ثانية ويمشي وهو منزل راسو في الواطه وكل القبيله تعايرو بي أنو هو حرامي؟ ترضي يقولو ليك بت الحرامي في الطلعة والنزله؟ لو بترضي أمشي كلمي أبوك بي عمايلي وقولي ليهو ما دايره أعرس محمود..
