لمن قال كلامو دا أنا الدم غلى في عروقي وقربتا أخنقو وأديهو كف قوي لكن مسكت أعصابي بالعافية، يعني أحرجني بطريقة ما حلوة خالص، عضيت على أسناني بغيظ وقلت ليهو عمرك ما ح تتغير وح تفضل يمان المستفز دائما وخليك كدا أحسن زاتو ما تكون متذكر أنا قلت شنو .. ولا فكر أنو يرد علي حتى وأتجاهل كلامي كلو وقال لي خديجة تقلي لي القهوة لو سمحتي .. في اللحظة ديك شميتو شمه ولو علي كان قتلتو وأنتهيت منو، دخلت جوا وأنا عايزة أموت من الغيظ والاحراج ، ياااخي بارد بارد لي درجة ما طبيعية .. خديجة جات وهي ميته من الضحك قالت لي والله ما عجبني ليك يا ميامن اها لقيتي جبهتك ولا لسه! قلت ليها أسكتي مني يا حيوانه، قالت لي لكن هو زااتو ببالغ ما كان مفروض يحرجك بالطريقة دي، قلت ليها أنا أصلا الولد دا بكر... قبل ما أتم جملتي قاطعتني وقالت لي بتكرهيهو مش! والله الجمله دي حفظناها حفظ من كتر ما قولتيها، قلت ليها بطلي تتظارفي وتعالي نومي ليك نوم ينفعك، قالت لي أقفل البيوت بس وأجيك ومشت وهي بتضحك لسه .. وأنا من الغيظ غمضتا عيوني وبقيت بنبذ في يمان لمن نمتا...
صحيت نص الليل وكنت عايزه أخش الحمام، ختيت يدي في كتف خديجة وبقيت بهز فيها وبقول ليها خديجة.. خديجة قومي، قالت لي بصوت مليان نعاس: مالك ياااخ؟ قلت ليها أرح معاي الحمام، ما ردت علي وغططت وشها بالمخدة، عرفت أنها نايمة وما مستوعبة شي، حاولتا أقومها معاي بس نومها كان تقيل شديد وأبت تصحى لي، أخر النهايه لمن قنعت من فكرة أنها ممكن تصحى قلت أتوكل على الله ساي وأمشي براي، وفي الحقيقة أنا خوافه شديد وما بقدر أخطي خطوتين براي وخصوصاً أنو الوقت بليل، وعشان تكمل معاي البطاريه حقتهم لقيتها مخستكه، ما بتفتح ولا بتقفل ألا تضربها شكلو حجارها خلاص عايزين ينتهو، قلت الله يستر بس .. ولعتها وطلعتا برة وأنا بتسحب زي الحرامي، شلت الابريق وكنت ماشه الحمام كدا فجأة سمعت صوت شخير زول بالله أنا لمن قعدتا أرجف من فوق لتحت وقربتا أوقع الابريق من يدي .. ختيت يدي في قلبي ووجهتا البطارية تجاه الزول البشخر لقيتو دا محمود، في قلبي قلت هسي الله بسالك يا محمود دا شخير ودي نومه ليك؟ غايتو شكلي ح أعاني لو عرستك والنوم ما ح أرتاح فيهو طالما بتشخر بالطريقة دي .. كان في جنب سريرو سرير تاني، وجهتا البطارية على وش الزول الراقد في السرير التاني لقيتو دا يمان وأول ما وجهتا عليهو النور هو طوالي حس بيهو وبدأ يصحح، حاولتا أطفي البطارية بسرعه بسرعه لكن إتخاسست لي وأبت تطفي بسهوله، يمان صحى وقال لي في منو هنا؟ .. قلت لو ما وريتو أنو دي أنا ممكن عادي يفتكرني حرامي ويقوم يخبطني بي حاجة .. قلت ليهو بصوت واطي دي أنا ميامن .. قال لي ميامن؟ المصحيك شنو نص الليل!، قلت ليهو هو أنا.. قال لي مالك أتكلمي، قلت ليهو دايره، دايره أمشي الحمام، قال لي طيب أمشي في زول ماسكك؟ ، أتحركتا خطوتين بس لقدام وجيت راجعة لاني خفتا والمشكلة أنو حمام ناس عمي عثمان بعيد في أخر الركن بتاع البيت، قلت ليهو بتردد "يمان"، قال لي نعمم، قلت ليهو بصراحة أنا خايفة أمشي براي وخديجة أبت تصحى لي يعني لو أنت.. قام على حيلو وقال لي الخوف ما حاجة جديد عليك فهمتك يلا أمشي قدامي، أتحركتا قدامو وهو بقى ماشي وراي .. خشيت الحمام وهو وقف لي بعيد منو، بعد طلعتا ومشينا شوية قلت ليهو يمان.. قال لي خيرر في شنو تاني؟ قلت ليهو أنا عطشانه شديد لو سمحت أرح معاي المزيره أشرب ما بقدر أنوم بالعطش، أتنهد وقال أووفف اللهم طولك يا روح يلا نمش.. مشينا المزيزه شربت وجينا راجعين، أثناء ما نحنا ماشين كدا عاينت في الحيطة وبقى بتهيئا لي شكل زول بعاين لينا، قلت بتمتمه" ماف شي يا ميامن إنتي بتخيل ليك، ما تخافي" وقربت شوية من يمان ومجرد ما قربت خطوة واحدة بس تجاهو حسيت بي الأمان وكل التهيؤات ديك أختفت تماماً حتى أني فكيت جلبابي الكنت ماسكاهو قوي بي يدي من الخوف ، وأول ما فكيت جلبابي أتذكرت أني ما لابسه توب عاينت لي يمان لقيتو مركز قدامو، في قلبي قلت هسي لو ما كان الواطه بليل وضلام كنت أتفضحتا معاهو ولا كمان شعري فاكي وواقف قنا.. وصلنا محل السراير وهو قال لي بعد دا ما تجي وتصحيني تاني وعلى فكرة إنتي أنسانه مزعجة شديد الله يكون عون الحايتزوجك سواء كان محمود ولا غيرو لانو ح تجيهو جلطة من أول يوم ، قلت ليهو لو ما رديت عليك بكون أحسن عشان الواطه بليل والناس نايمين ما دايره أصحيهم، قال لي فعلا أحسن وبالله عليك مره تانية لمن تقومي من النوم لمي شعرك دا معاك لانو بخلع الزول، وأتغطى بي البطانية حقتو ونام حتى بدون ما ينتظر ردي، لا هو ياتو يوم أنتظرني أرد زاتو؟ .. في قلبي قلت أخر زمن شعري بقى يخلع الناس والله غااايتو، بس يا ربي هسي هو شافني كيف؟ ..عاينت بي جاي وجاي أكتشفت أنو القمره مضويه المكان والحته ما ضلام لي الدرجة ديك .. دخلتا الغرفه وأنا بسال في نفسي لي دايما كل ما أكون قريبة من يمان بحس بي الأمان والاطمئنان؟ وكانو الدنيا ما بقى فيها شي يتخاف منو بس عشان هو قريب مني؟ .. رجعتا كملت باقي نومي وأنا بحاول القى جواب لي السؤال دا....
