لمن أبوي عاين لي بي النظرة ديك وقتها ياداب حسيت بي عمق المصيبة الكنت ح أعملها وبي عواقبها الوخيمة اللي يمان كان بتكلم عنها، ياداب عرفت أنو العملتو غلط وكبيير شديد كمان وأنو مهما حصل كان مفروض أخت الهروب أخر حاجة ممكن أفكر فيها لانو زي ما قال يمان الهروب من مشكلة ما ح يحلها بالعكس ح يزيد من تعقيدها وبالفعل دا الحصل معاي، حاليا أنا وبي عملتي دي خليت أبوي البحبني وبعتبرني نعمة من ربنا يصل لدرجة أنو يعاين لي بي نظره عمري ما أتوقعت أنو ممكن يعاين لي بيها في يوم من الايام، أحيانا نحنا بناخد قرارات كتتيرة غلط وعيونا بتتعمي من الصاح لحظتها وما بنكون شايفين شي غير أنو في حل لي مشكلتنا حتى ولو كان الحل دا غلط، زيي أنا ما كنت شايفة أنو في حل غير أني أهرب وما فكرت في حتة أنو الهروب حاجة غلط وحاجة على قدر ما تديني ح تاخد مني في المقابل، يعني حتى ولو كان الهروب ح يطلعني من مشكلة أني ما أتزوج محمود بس في نفس الوقت هو وقعني في مشكلة تانية واللي هي أني خليت أبوي يفقد ثقتو فيني .. أبوي مسكني من شعري بقوة وقال لي دي أخر تربيتي؟ وصلت بيك لي الدرجة دي يا ميامن لدرجة أنك تحاولي تهربي؟، قلت ليهو أببب..أبوي أنا.. قاطعني وقال لي أوعك تاني تقولي الكلمة دي أنا ما أبوك، أنا ما عندي بت بتكسر كلمتي وبتهرب، إنتي عارفة أنك الليلة وبي عملتك دي كسرتي ظهري وطعنتيني في نصو؟ وريني أنا قصرت معاك في شنو عشان تجازيني بالطريقة السيئة دي! لي عملتي كدا يا ميامن لي بسس؟ قلت ليهو أبووي والله أنا ما كنت عايزة أعمل كدا لكن أنت ما خليت قدامي حل غير دا، أبوي صدقني أنا ما كان قصدي أوطي راسك في الارض والله العظيم ما كان قصدي.. قال لي وليك عين تتكلمي بعد العملتيهو يا قليلة الحياء؟ لكن أصبري لي أنا بعرف أربيك من جديد وح أوريك تاني تفكري تهربي كيف يا ميامن، ومسكني من يدي بي أقوى ما عندو ودخلني جوا البيت، قلت ليهو أبووي أسمعني عليك الله أسمعني.. قال لي أسكتي يا وسخة ما داير أسمع حسك دا تاني .. راماني في الغرفة ومشى جاب حبل وجا لافاهو حولين رقبتي وبقى بحاول يخنقني بيهو .. كنت بفرر في رجليني وبحاول أفك الحبل من رقبتي بي يديني عشان لو أبوي فضل خانقني بيهو كدا زيادة ح أموت بس ما قدرت لانو أبوي كان شاديهو شديد على رقبتي، وللحظة حسيت أنو روحي خلاص طلعت وبقيت ما قادرة أتنفس.. أبوي قال لي ندمت على اليوم جبتك فيهو يا ريت لو كانت أمك عاقر وما بتجيب عيال بس عشان ما تجيبك وتوطي رأسي بالطريقة دي قدام الناس يلا موتي وريحيني منك، موتي الله ياخدك وياخد اليوم الجيتي فيهو .. قلت ليهو أبوو..أبوي فف..فكني أنا كدا ح أموت، قال لي بكون أحسن يا عديمة الحياء، وبالفعل كنت ح أموت لو ما عمي عثمان أتدخل وجا زحا أبوي مني بي القوة .. بقيت بكح بطريقة ما عادية ويالله كنت قادرة أتنفس، أبوي قال ليهو زحيتني منها لي الكلبة دي خليني أقلتها وإنتهي منها .. عمي عثمان قال ليهو أهدى يا أحمد خلينا نحل الموضوع بي الهداوة، أبوي قال ليهو ماف موضوع ح يتحل أنت بس فكني ليها وأنا بعرف أربيها من الاول الما بتخجل عديمة التربية دي .. عمي عثمان قدر ما عمل حاول يتكلم مع أبوي بس هو كان مصر شديد أنو يقتلني، وكان جاي يخنقني تاني بس فجأة رأسو لفه وقرب يقع، عمي عثمان سندو وقعدو في السرير، هو أساسا عندو ضغط وأكيد حيكون أترفع عليهو بسببي .. قربت منو وقلت ليهو أبوي أنتت..أنت كويس؟ دفرني وزحاني منو بكل قوتو وقال لي أوعى تلمسيني أوعى يدك دي تاني تصلني فاهمه ولا لا؟ بس وريني أنا داير أعرف نفسي قصرت معاك في شنو عشان تهربي وتخليني أنزل راسي قدام الناس دي كلها؟ لي عاقبتيني كدا بعد تربيتي وتعبي فيك كل السنين الفاتت؟ دلعتك وما أشتغلت بي كلام الناس لمن قالو لي الدلع بخربها وكنت برد عليهم وبقول لا بتي من حقها تدلع، لي جازيتي حبي ودلعي ليك بي أنك تهربي؟ ما فكرتي في أنك لمن تمشي من هنا الناس ح تقول عني شنو؟ بتو هربت مع واحد عشان هو غصبها أنها تعرس ولد أخوهو دا الكنتي دايره تسمعيهو عني؟ الحب عمى على عيونك لدرجة خلاك تنسي أبوك والتربية الرباك ليها كل عمرك؟ كنتي مستعدة تفضلي الغريب علي أنا بس عشان تكسري كلمتي قدام الناس كلها وتوريهم أنو الدلع بالجد بخرب الطباع! من وإنتي صغيرة عمري ما قلت ليك لا، حصل مرة رفضت ليك طلب واحد وريني؟ طيب لي كسرتي كلمتي يا ميامن، لي ما رضيتي تعرسي الانا أخترتو ليك ورفضتي طلبي! كلو عشان الحب؟ .. قربت منو تاني وختيت رأسي في رجلينو وقلت ليهو أبوي صاح أنا بحب يمان بس عمري ما فكرت أكسر كلمتك صدقني يا أبوي كل شي حصل غصب عني أنا كنت محبورة أخد الخطوة دي لانك ما رضيت تسمعني، أبوي أنا أسفة والله العظيم ما قصدت أجرحك أو أخليك تنزل راسك في الأرض والله دا ما قصدي، أبوي معليش أنا أسفه .. وبقيت ببكي وأنا خاتة وشي في رجليهو، زحاني منو بكل هدوء وقال لي مش دا الولد الأنتي فضلتيهو علي وعلى كلمتي وكنتي دايره تهربي معاهو وعشانو رفضتي ولد أخوي؟ طيب يا ميامن طيب.. وساق يمان من يدو وفات خلاني وأنا غرقانة في دموعي...
