بدر بقى بضرب في يمان وما فكاهو إلا لمن أنا وريان أتدخلنا وجينا مسكاناهو منو، أتخلعنا شديد من الطريقة الهاجمنا بيها بدر الدين لاننا عمرنا ما أتوقعناهو ممكن يتصرف كده أو تصل بيهو لدرجة أنو يضرب يمان .. قال لي يمان: دي أخر ثقتي فيك؟ معقولة تلعب بي عقل بت عمي وتخليها تهرب معاك؟ ما راعيت لي وأنت بتعمل في الحاجة دي يا يمان! أنا أعتبرك أخوي وسقتك معاي بيتنا وخليت أهلي يعاملوك كانك ولدهم لي تجي تجازينا بالطريقة دي؟، قلت ليهو يمان ما عندو ذنب أنا ال.. قاطعني وقال لي إنتي تسكتي خالص وكمان بكل عين قوية جاية تتكلمي معاي! ما عارفة أنو عمي هسي مرقد في المستشفى بي سببك يا أستاذة.. قلت ليهو بخلعة: شنو! أبوي مالو؟ قال لي لو بهمك ما كان عملتي فيهو عملتك دي، خلتيهو يخجل يعاين لينا وما يعرف يتكلم معانا حراام عليك يا ميامن حراام هو ما يستاهل منك كل دا بعد التعب التعبو عشانك السنين الفاتت دي كلها، فقدتيهو حتى أحترامو لي نفسو جازيتي عمي بطريقة ما كان في زول متوقعها بالجد نزلتي من عيني.. قلت ليهو أنا..أنا ماشة معاك لي أبووي، قال لي ولا تفكري زااتو لانو ما مجرد ما يشوفك مرضو ح يزيد زيادة، قلت ليهو بدر الدين.. ما ردا علي وقال لي ريان: يلا خلينا نمش من هنا وماف داعي نشرح ونوريها وضعو وهي ما راعت ليهو وكانت دايره تهرب.. ريان عاينت لي بنظرة ما تخافي أنا ح أطمنك عليهو، بدر ساقها من يدها ومشو .. قدر ما حاولت معاهو عشان يسوقني أبا، قعدت في الكرسي وبقيت ببكي، بكيت بكى لمن الله غفر لي .. يمان جا قعد جنبي وبقى بسكت فيني، قلت ليهو يمان أبووي.. قال لي ما تخافي ح يبقى كويس بإذن الله خلينا ندعي ليهو عشان ربنا يقومو بالسلامة، قلت ليهو يمان أنا لي سيئة كده؟ أذيتكم كلكم، أول شي أبوي كسرتو وطعنتو في نص ظهرو وخجلتو قدام الناس كلها وهسي هو في المستشفى بي سببي وممكن يمووت سبب عملتي وفوق لي دا كلو أنا هسي ما ح أقدر أمشي أشوفو وأطمن عليهو.. وأنت! أنت يا يمان خليت كل الناس يفتكرو أنك كنت ح تهربني ورميت اللوم عليك رغم أنك رجعتني وما خليتني أهرب والليلة خليت صحبك البتعبرو أكتر من أخوك يجي ضربك ويقول ليك كلام زي السم وبسببي علاقتكم أتوترت، يمان أنا سيئة وشديد كمان أنت ما بتستاهل واحدة زيي، أنا أسفة لاني خربت عليك حياتك ونكدتها، أسفة بالجد.. مسح لي دموعي وقال لي تاني لو قلتي كلامك دا فأنا الحا أضربك، ميامن أنا وإنتي عملنا الخطوة دي مع بعض فيبقى لازم أتحمل معاك كل العواقب الحاتجي بي سببها، وبالنسبة لي علاقتي مع بدر الدين فما تخافي ح تتصلح مع الايام وهو ح يفهم أنا ليه عملت كدا، قلت ليهو يماان.. حضني عليهو وبقى بيطبطب علي في حين أنو هو في حرب شغالة جواهو ما عارف يهديها كيف...
الوقت كلو وأنا كنت متوترة وقلبي في يدي ومنتظرة ريان تضرب لي عشان تطمنئي على أبوي .. قريب لي الظهر يمان أختفى كم دقيقة وبعدها جا راجع ومعاهو مرا، قال لي ميامن أنا عارف أنك حاليا في وضع صعب شديد وما حابب أخليك براك نهائياً بس مضطر أمشي المشوار دا عشان ضروري، قلت ليه ماشي وين ومخليني براي؟ قال لي مكان قريب وما تخافي ح أخلي معاك خالتو سعاد، قلت ليهو يمان فهمني.. قال لي بمشي وبجي سريع ووقتها ح أفهمك كل حاجة طيب حياتي؟ ما رديت عليهو، باسني في رأسي وفات وخلا بالي مشغول عليهو.. الخالة كانت لطيفة شديد معاي وما حاولت تسالني إنتي منو وبتعملي هنا شنو خالص بس فضلت واقفة جنبي وكانت بطمئن فيني أنو يمان ح يرجع بسرعة .. يمان غاب زي ستة ساعات كدا حتى بعد داك جا البيت .. الزمن كان بالمغرب لمن هو جا راجع، لقى الخالة ديك لسه قاعدة معاي، شكرها ومشى معاها وشكلو وصلها لغاية بيتهم .. لمن أذن أذان العشاء جانا أتصال من ريان في تلفون يمان ، رديت عليها وأنا ملهوفه وقلت ليها ريان..ريان أبووي بقى كيف؟ عليك الله طمينئي عليهو وقولي لي أنو هو كويس وما فيهو حاجة، قالت لي ما تخافي عمي أحمد بقى أحسن من الاول حتى خروجوه قبيل من المستشفى ورجع البيت، قلت ليها بالجد هو بقى كويس ولا إنتي بتكذبي علي؟ .. قالت لي والله ما قاعدة أكذب عليك، قلت ليها الحمد لله يا رب الحمد لله شديد، طيب عايزه أشوفو يا ريان أنا لازم أطمئن عليهو بي نفسي عشان أقدر أرتاح، قالت لي للاسف ما بتقدري تشوفيهو لانو لو جيتي البلد صحتو ممكن تتدهور، ميامن خليك بعيدة منو لمن الوضع يهدأ، قلت ليها لالا خلاص، خلاص ما ح أجي أنا بس ما عايزاهو يتاذى زياده بي سببي لكن عليك الله طمنينئي عليهو أول بي أول وما تنسي.. قالت لي طيب حاضر، قلت ليها ريان بالجد شكراً شديد إنتي الوحيدة من بين الناس كلهم الفهمتيني، قالت لي صاح أنا ما عارفة السبب الاساسي الخلاك تفكري تهربي شنو بس متاكده أنو إنتي ما عملتي كدا ألا بعد لقيتي كل حاجة واقفة ضددك وماف حل غير دا، ويمان مش عاشرتو لي شهرين بس! لكن عرفتو كويس ومتاكده حتى ولو كان بحبك وعايز يعرسك هو ما حاول يقنعك بي أنك تهربي معاهو وهو أكيد ما عندو ذنب لانو لو الناس كلها ما لاحظت أنا لاحظتا لي انو هو الجابك راجعة البلد وما خلاك تهربي، يعني لو كان اي واحد في مكانو ما كان رجعك البلد خالص وبالعكس كان أستغل الفرصة دي وضحك عليك، ميامن الحب البحبك ليهو يمان وأنا شفتو في عيونو تجاهك أمبارح عمري ما كنت ح أشوفو في عيون محمود فامسكي فيهو قوي رغم كل حاجة بتحصل معاكم، ميامن إنتي عارفة أنو يمان قبل كم ساعة كان معانا هنا في البلد وحاول يتكلم مع أبوك عشانك!، إتخلعت شديد من كلامها الأخير وقلت ليها هو جاكم في البلد؟ قالت لي إيوه قبيل جا أطمئن على أبوك وشافو بقى كيف وحاول يتكلم معاهو بخصوصك بس عمي رفض وما سمعو لكن رغم دا ورغم الطريقة الاتكلم بيها عمي معاهو هو قال ليهو أنو أنا ح أرجع تاني كل مرة لحدي ما تسامح ميامن، قلت ليها صحي! ودموعي نزلت، قالت لي إيي ويا بختك بيهو، قلت ليها حرفيا بختي بيهو وطبعا ياداب عرفتو مشى وين قبيل، قالت لي ميامن خليك جنب يمان ووقفي معاهو دايما عشان أنا متاكده أنو ماف واحد ح يصونك زي يمان نهائيا وأقيفي جنبو لحدي ما الأوضاع تهدأ وأبوك دا أكيد ح يسامحك لانك بتو في النهاية، قلت ليها إنتي أول واحدة ما ظلمت يمان وقلتي حاجة هو ما عملها وعرفتيهو وعرفتي أخلاقو كويس أنا بالجد ممونة شديد لانك فهمتينا، قالت لي العفوا حبيبتي، أتكلمنا شوية وقفلت منها وأنبسطت شديد بي الكلام القالتو لي وحق أنو يمان سافر البلد عشاني وعشان يخلي أبوي يسامحني، طلعت برة عشان أديهو تلفونو وأشكرو لقيتو بصلي في المغرب طوالي مشيت أتوضيت وجيت صليت وراهو، بعد الصلاة بقينا ندعي لي أبوي يبقى كويس ودعينا أنو كل حاجة تتصلح .. خلصنا وقربت منو، قلت ليهو يمان وريني قبيل مشيت وين؟ قال لي مكان قريب من هنا، قلت ليهو بطل تتهرب أنت مشيت البلد صاح؟ عاين لي بي إستغراب وقال لي عرفتي كيف! قلت ليهو ورتني ريان وأنا حاليا عايزة أعرف منك الحصل شنو بالتفصيل، وريني يا يمان، قال لي.....
