بصراحة لمن شفت منظرهم وكيف هما قريبين من بعض للحظه أفتكرت نفسي بحلم وحتى أني غمضت عيوني وفتحتهم مرات كتتتيره عسى ولعل أكون فعلا بحلم بس للأسف الشفتو كان حقيقيه .. صاح أنا إتخلعتا لمن شفتهم بالمنظر داك بس هما أتخلعو أكتر مني لما شافوني .. يمان مجرد ما شافني فكاها وقال لي ميامن.. عاينت ليهو من فوق لي تحت بقرف وما إنتظرتو يقول حاجة تانيه وطوالي جريت على غرفتي، ختيت يدي في خشمي وبقيت مقلعه عيوني وكنت مصدومة شديد وما قادرة أصدق الشفتو خالص، معقولة يمان عارف أنها هي بتحبو ومخليها تقرب منو كده عادي؟ وحتى يوم داك قال لي أنها حضنتو بي عفوية في حين أنو هو عارف انها بتحبو يعني حضنتو قاصده وهو عارف كدا لكن ما منعها عشان بتحبو؟..
يمان جا لاحقني مسك يدي وقال لي ميامن أسمعيني لو سمحتي.. زحيت يدي منو بسرعه وعاينت ليهو بقرف وقلت ليهو أوعى تلمسني تاني زح يدك وخليك بعيد مني أنا ما عايزة أسمع منك أي شي كفايه القرف الشفتو ، قال لي ميامن إنتي فاهمة غلط.. قلت ليهو ههه بالله؟ يمان أنت بستظرف ولا شنو! أنا شفت الحصل بي عيوني وماف زول قال لي عشان أفهم غلط أوكي؟ ، قال لي طيب خليني أبرر ليك موقفي ، قلت ليهو تبرر شنو يا يمان تبرر شنو وريني؟ ، خت يدو في كتفي وقال لي صدقيني.. قبل ما يتم كلامو زحيت يدو مني بي كتفي ، قال لي ميامن لو سمحتي.. قلت ليهو يمان أنا حقيقي ما حابه اسمع منك شي أو أتكلم معاك ف أبعد مني .. ومشيت قعدت في السرير ختيت يديني في وشي وبقيت ببكي..
جا حضني عليهو وقال لي والله العظيم يا ميامن أنا ما كنت عايز أخليها تحضني حتى حذرتها وقلت ليها نيڤين أبعدي مني لكن هي براها ما فهمتني أسوي شنو في الحاله دي؟ ، قلت ليهو عايز تقنعني انك كنت حاولت تبعدها بس ما قدرت؟ قال لي وفعلا دا الحصل، ميامن إنتي ما عندك ثقة فيني؟ .. لمن قال لي كدا حسيت إني بالجد قلتت من ثقتي فيهو ، قال لي أنا ما بحبك تزعلي مني يا ميامن عشان الفكره في حد زاتها بتضايقني.. قلت ليهو لي تخليها تحضنك يا يمان ليي بس وأنت عارف أنها بتحبك؟ وكمان كنت بتبرر لي موقفها وبتقول لي أنها يوم داك حضنتك ما قاصدة؟ وهسي جاية تقرب منك بالطريقة دي وأنت مخليها عادي؟ قال لي أعمل شنو هي ما راضية تفهم حتة أني ما بحبها، من قبل سنتين ورتني أنها بتحبني بس أنا كنت وما زلت معتبرها أختي الصغيرة ووريتها وفهمتها الحاجة دي وعدتها ليها كم مرة لكن هي ما راضية تفهم وتتقبل كلامي وقبل شوية كنت بتكلم معاها في الموضوع دا زاتو وقلت ليها يا نيڤين أنا ما بحبك ولا ح أحبك أنا عندي واحدة ماليه عيني وبحبها هي وأعرفي أنك بي تصرفاتك دي قاعدة تخليني أصر أني ما بحبك ف أعملي كنترول لي نفسك ومشاعرك وأبعدي مني يا نيڨين لانك ما ح تلقي الشي العايزهو عندي.. أعتقدت أنها وأخير فهمت بس فاجاتني وفجأة لقيتها بتقرب مني وبتقول كلامها دا، أنا بالجد أسف لانك شفتينا كدا .. بكيت زيادة لمن سمعت كلامو وما عرفت أرد بي شنو وبقيت ساكتة ، فضلنا قريب العشرة دقائق ونحنا كدا أنا ما عارفة أرد بي شنو وهو ضاميني عليهو وساكت... بعد مسافه قال لي حبيييبي ممكن ما تفكري في الحصل دا تاني؟ وأسمعيها مني نيڤين دي تاني ما ح تشوفيها قريبة مني.. قلت ليهو ولو ما فهمتك المرة دي أنا ح أعرف أفهمها بطريقتي.. أتفاجى من ردي وقال لي أحمم عارفه لو كان مفروض تاخدي جائزة على أكتر حاجة إنتي بارعه فيها ف كان ح تاخدي جائزة أكتر بني آدم بكاي في الكرة الأرض كلها ما ممكن ياااخي كميه الدموع البتنزل منك والبكى البتبكيهو كل يوم، قلت ليهو أممم أهبل .. قال لي الاهبل دا بحبك شديد يا أستاذه، قلت ليهو بختي والله....
