يمان مسك التصميم في يدو وبقى يعاين ليه وهو مصدوم من الحصل فيهو وقال لي بخلعه: دا شنو؟، قلت ليهو يمان أنا أسفه والله العظيم ما كنت منتبه والشاي أتكبا فيهو بالغلط معليش أعفي لي عليك الله.. مسح وشو بي يدينو وقال لي بي عصبيه وصوت عالي: بتعتزري؟ بتعتزري وبكل بساطة يا ميامن بعد ما ضيتي تعبي التعبتو كل الايامات الفاتت؟ طيب وريني أعتزارك ح يفيديني بي شنو! لا كدي وريني هل ح يرجع الورقه نضيفة؟ يعني ما كان ممكن تنتبهي شوية! شوية بس يا ميامن وما تضيعي تعبي؟ أنا أعمل فيك شنو يا ميامن وريني؟ ، قلت ليهو يمان أنا أسفه.. قال لي أنا بس داير أعرف إنتي حتكبري متين وتبطلي تعملي أغلاط زي دي الشفع ما بعملوها؟ يااااخي أكبري شوية وخلي تصرفات الشفع دي إنتي زوله داخلة على جامعة، أنا لي متين ح أقعد أغفر ليك أغلاطتك كدا! وهسي يا أستاذه وريني أنا ح أعمل شنو بعد السوتيهو؟ وريني ح أسلم المشروع بكره كيف؟ ، كان معصب وزعلان شديد وهو بتكلم ، قلت ليهو يمان أنا.. ما سمع كلامي لي النهاية وزحاني بي يدو بطريقة مستفزه شديد .. وقال لي أمشي نومي أحسن ما أفضي زعلي فيك لانو الكلام الحاقولو وقتها ما ح يعجبك.. قلت ليهو عليك الله ما تزعل مني والله ختيت الكبايه فيها بالغلط.. قال لي ميامن طيري من وشي وأمشي إتزفتي نومي عشان أنا ممكن أرتكب فيك جريمة باقي الليل دا، قلت ليهو يمان لو سمحت، اتأفف وقال لي اللهم طولك يا روح ياااخي دي شنو البت الما بتفهم دي ، ولزاني بي يدو بقوه أنا لمن قربت أقع .. وقال لي قلت ليك أزفتي نومي وطيري من وشي لانو بالجد ما ح يحصل خير لو فضلتي قاعده قدامي زياده يا بت الناس فعشان خلقي ما يضيق أكتر طيري من جنبي.. وبقى يلقب في الرسمة وينفض فيها لكن لقاها منتهيه عديل .. قعد في الكرسي بحيره وبقى خاتي أصبعو السبابه في جبهتو وباقي أصابعو في لحيتو وكان متحير يعمل شنو .. بقيت بعاين ليهو وأنا ببكي وعرفت أنو ما ح يرضى يتكلم معاي حاليا ولو أتكلمنا الوضع ح يسوء أكتر فأحسن إني أفضل ساكته ، مشيت رقدت في السرير وأنا لسه ببكي وكنت زعلانه شديد لاني خربت شغلو كلو..
يمان عده مسافه طويله وهو صاحي وحتى أنو مرق بره الغرفه كم مره وجا، وفي المره الأخيره جا رقد جنبي وريحه السجائر كانت فايحه منو .. قربت عليهو شوية وقلت ليهو يمان... أول ما عملت كدا طوالي هو قبل على الاتجاه التاني وعمل نفسو نايم...
_____________________________
أتضايقت شدديد وزعلت من الحركة العملتها ميامن لانو بي سببها تعبي كلو ضاع وبقى هباءً منثورا .. يعني لو كان هي أنتبهت وركزت شوية الحصل دا ما كان حصل .. غير أني زعلت منها بالجد برضو كان لازم أقسى عليها عشان لو ميامن فضلت تتصرف كدا وبالطريقة دي فهي ح تتعب شديد معاي لاني أنسان على قدر ما أنا حنين معاها على قدر ما أنا ممكن فجأة أقلب وأكون واحد عصبي لدرجة بعيده هي ما بتتخيلها .. وبعدين هي بعد فتره قصيرة حتكون داخلة على مجتمع جديد واللي هو مجتمع الجامعة يعني حاجة غريبة كليا عليها وما ح تقدر تتعامل معاهو طالما بتتصرف بي عدم تركيز كدا...
الصباح طلعت الشغل بدري حتى قبل ما هي تصحى عشان ما كنت حابب أتناقش معاها من الصباح لاني عارف نفسي وقت الزعل بكون عامل كيف وبقول شنو فما كنت حابب أجرحها بي كلامي لاني وانا زعلان ممكن أسمعها كلام عمرها ما ح تنساهو .. مشيت الشركة وأنا ما عندي حاجة أقولها لي مديري لانو الشغل بفضل شغل وهو ما حيفهم أنو مرتي بغلط صغير منها خربت شغل أيام طويله وما ح يقبل عذري أبداً...
الاجتماع الكان مفروض نسلم فيهو المشاريع كان الساعه واحدة ولي الوقت داك أنا ما كنت عارف نفسي ح أسوي شنو ولا قادر أرسم مبنى جديد لانو أستحاله يخلص في يوم واحد بس .. أخر النهايه لمن لقيت أنو مافي حل قلت أحسن أمشي أتكلم مع المدير وأتفاهم معاهو بي أي طريقه كانت عشان يمدد لي فتره التسليم رغم أنو الحاجة دي صعبه وهو لا يمكن أنو يرضى بيها لانو أداني وقت كافي بس برضو ح أحاول .. مشيت مكتب المدير وأول ما وصلت باب المكتب وقفتني فاتن " دي السكرتيرة "، وقالت لي يمان معليش ما بتقدر تخش لانو المدير مشغول حاليا ومعاهو ضيفة وهو قال ما عايز زول يزعجهم.. قلت ليها طيب ما مشكلة بس عليك الله يا فاتن من يخلص أضربي لي ورويني ضروري ، قالت لي حاضر من عيوني ، قلت ليها تسلمي يااخ...
