unicode
ဒီနေ့ နှစ်ပိုင်းပါနော်......
အခန်း ၉၀+၉၁
အခန်း ၉၀
ဟူအာ၏ ဆိုလိုရင်းကို ချင်းရန်နတ်မင်းက သိရှိပြီးဟန် တူသည်။ သို့သော် မေးခွန်းသာ ပြန်မေးလာ၏။
“မင်း ပြောကြည့်လေ၊ ဒါကို ဘယ်လို ဖြေရှင်းမလဲ”
“စိမ့်စမ်းပြာရေအိုင်က ရေက တစ်လောကလုံးမှာ နတ်စွမ်းအားနဲ့ အသက်ဓာတ် အပြည့်ဝဆုံးပဲ အဲရေကို သုံးပြီးတော့ စိုက်ပျိုးမယ် ဆိုရင် မဖြစ်နိုင်တာတော့ မဟုတ်ဘူး”
“ဒါဆို မင်း ဆက်ပြောကြည့်လေ ကျိုးရင်းနတ်ဘုရားမရဲ့ ပစ္စည်းကို ဘယ်သူက ထိရဲမှာလဲ”
“နည်းနည်းတောင် မကြိုးစားကြည့်ဘဲနဲ့ ဘယ်လို သိနိုင်မှာလဲ၊ ပြီးတော့ စိမ့်စမ်းပြာအိုင်က ရေက နတ်ဝိညာဉ်ကိုတောင် ကုသနိုင်တယ်လို့ ကြားဖူးတယ်”
“သေချာတာပေါ့၊ နတ်ဝိညာဉ်ကို ကုသနိုင်ရုံတင်တောင် မဟုတ်ဘူး၊ နတ်ခန္ဓာကိုယ်နဲ့ နတ်ဝိညာဉ် မကွဲကွာသွားအောင် ထိန်းသိမ်းထားဖို့ နည်းလမ်းတောင်မှ ကျိုးရင်းနတ်ဘုရားမက ရှာတွေ့သွားသေးတယ်”
“ဒါဆိုရင် ဘာလို့ မတောင်းဆိုကြည့်တာလဲ”
“ဘယ်သူ ပြောတာလဲ မတောင်းဆိုဘူးလို့၊ ငါကိုယ်တိုင် အိမ်ရှေ့မင်းသားဆီကို သွားပြီးတော့ တောင်းဆိုခဲ့တယ်”
ချင်းရန်နတ်မင်းက ခေါင်းယမ်းသည်။
“အိမ်ရှေ့မင်းသားက ကျိုးရင်းနတ်ဘုရားမဆီကို မျိုးနွယ်စု အကြီးအကဲတွေ ကိုယ်တိုင် တောင်းဆိုလိုက်ပါလို့ ပြောလာတယ်”
ဟူအာ နားမလည်နိုင်စွာ ပြန်မေးလိုက်မိသည်။
“သွားတောင်းဆိုလိုက်သလား”
“ဘယ်သူက သွားပြီးတော့ တောင်းဆိုရဲမှာလဲ၊ ကြယ်တာရာမျိုးနွယ်က ကျိုးရင်းနတ်ဘုရားမကို အပြစ်လုပ်ထားမိတယ်လေ၊ ပြီးတော့ ကျိုးရင်းနတ်ဘုရားမ ဆိုတာက သူ့ကိုယ်ပိုင် ကစဉ့်ကလျား စည်းမျဉ်းတွေနဲ့ နေတာ၊ သူ စိတ်ဆိုးသွားမလား ဒါမှမဟုတ် စိတ်မဆိုးသွားနိုင်ဘူးလား ဆိုတာကို ဘယ်သူမှ မစမ်းသပ်ချင်ဘူး၊ ကျိုးရင်းနတ်ဘုရားမသာ စိတ်ဆိုးသွားရင် ကြယ်တာရာနတ်ဒေသလို ဒေသငယ်လေးက ချက်ချင်း ပျောက်ကွယ်သွားနိုင်တယ်လေ”
YOU ARE READING
မြေခွေးလေးရဲ့ ချစ်ခြင်း ဒဏ္ဍာရီ
FantasyPaid Groupဝင်ရန် m.me/swaefoxlove ရေးသူ စွဲ့ညို့
