لعنة حبي الكاذب

البارت الرابع عشر

السلام عليكم
نور ال زياده

تمر ايام وسنين ونفترق عن اشخاص نتصور بسبب الفراق بعد منشوفهم بس فعلا مصير الحي يلتقي
مهما طال الزمن ....

فيان: طرقت الباب خفيف ودخلت متوجها باتجاه مكاني الي اكعد بي كل يوم

استوقفني صوت وهو يكلي

---- :هيي،، وين داخله لااحم ولادستور وين كاعدين؟ شنو هل الاحترام امشي اطلعي برا

فيان ؛سمعت كلامه وانداريت ردت اجاوبه وابررله وانصدمت بالي شفته وهو مواقل مني

حازم معقوله !!

باوعت علي بصدمه

وهو هم شفت بعيونه نضرة الصدمه

سكت واني هم سكتت لحضات مرت واحنا واحد صافن بوجه الثاني

حيييل مرت سنين ماشايفته من يوم ولادتي بعلي
وبعد ماشفته ولا سمعت عنه شي

قطع صفنتي من تحولت ملامحه للقسوه والغرور كال

حازم :اليوم اول يوم لهذا راح اسكت مره ثانيه ممنوع احد يدخل بعدي

والي مينفذ يطلع برا

تفضلي اكعدي بمكانج

فيان :تكلم ويايا بصفه رسميه واني هم من شفت كلامه وتصرفاته حتى سلام ماسلمت

رحت كعدت بمكاني واني مستغربه وجوده

عرف عن نفسه والي افتهمته راح ياخذنه لفتره قصيره نيابه عن الدكتور رافع لان مريض

وراها طلب نعرفه عن اسمائنا

كل طالب عرف عن اسمه وهو مركز من وصل الدور الي

عرفت عن اسمي بس هو حتى ماباوع بوجهي ولاكانما بشر ولااحترمني

كلش ضجت من تصرفاته ومواقفه البايخه وغروره

مر الوقت بين استفسارات وتعارف خلصت وطلع

وهنا البنات بلشن اسمعهن

اريج :صدقه لمحمد شنو هذا الدكتور يخبل شنو من شكل وشخصيه وثكل هيبه ياناس هيبه

فيان :اسمعهن كلمن تحجي شكل اخر شي ضجت
جاوبتهن

شخبصتنه ليش تحسسوني شايفات كريس همسويرث ومامصدكات

ترا واحد عادي ومغرور ومبين غثيث لتسووها ضلمه عاد وهو وغيره لا

اريج :شدعواج كبل ضجتي منه

ترا ماكفر كال لتدخلون ورايا حقه وكل الدكاتره ميرضون قابل بس هو ...

فيان :انتن بطرانات وتريدن تسولفن خلي اطلع احسن الي

عفتهن وطلعت احس نفسي مغثوثه هذا الانسان مااعرف ليش وجوده ينرفزني ويغثني