كرونيك عابرة زمن

اكستري

غمضت عينيها تستمتع بقطرات المطر على وجها ... رفدت يدها و طبطبت تستنى فيه يحل الباب ... تبسمت كي شافت الباب يتحل ... طلعت روحها باستو على راسو بمعزة ... في حين هوا طبطبلها على ظهرها بحنية ... أعطاها ضهرو مولي ... دخلت و غلقت الباب ... نحات غطا البرنوس على راسها .... تفقدت المكان بعينيها ... شهقت بفرحة و حماس كي لمحت مجموعة كتابات محطوطة على طرف المكتب ... و قالت : مجموعة جديدة ... شاف فيها من تحت عينيه و قال : انعم مجموعة جديدة ... جابها الرحالة سعدون من يومين ... هزتلو راسها و قعدت مقابلتو تشوف فيه وش راه يدير ... : وش تعمل
... فتح القجر و جبدها منو ... و خطها قدامها ...و قال : وش رايك... حلت عينيها بإنبهار و قالت بلا ماتحس : شابة ... تهبل ... حكمتها بيديها بلعقل و هيا تقلب فيها و تقول : مخدومة على أدق التفاصيل ... و لا غلطة ... رجعتها لبلاصتها و قالت : لمن الطلبية
قعد مقابلها ورا المكتب و قال : تعرفي وشنو هادي ... عقدت حواجبها بإستغراب و قالت : بوصلة ... هزلها راسو و قال : كلامك صواب ... وش تعرفي عليها ... قالت بهدوء : من الحكايات لي نعرفهم كانت دل البحارة على الطرقان ... حتى أنها كانت السبب في اكتشاف بعض المواطن و اليابسات ..
رجعلها و قال : صحيح ... البوصلة يابنتي سمراء هيا لي دلنا على الطريق الصحيحة كي نضيعو ... يكفي أنو نحكمو عقلنا و قلبنا و نخيرو وشمن طريق نسلكوه ... بواسطتها قدرنا نسافرو و نقطعو البحور ...
كانت تسمعلو بتركيز ... مدلها بيدو وحد الكتاب و قال : اقراي هاد الكتاب ... تفهمي لي ناوي عليه .. حكمت عليه الكتاب و قرات عنوانو بهمس : السفر عبر الزمن ... طلعت عينيها تشوف معاه تتأكد من الافكار لي هاجموها ... قالت كي شافت ابتسامتو الواثقة : مستحيل ... منقدروش نسافرو عبر الزمن ... هاد الشي خيالي ... عمي سليمان ... هاد الشي يفوت قدرات الإنسان ...
نحا العم نواظرو و قال : وش راح نخسرو من المحاولة ... من واش قريت و سمعت الشي هادا مش مستحيل ... و باقيلي نشوف و نتأكد
سمراء: وش علاقة البوصلة بهاد الشي
العم : البوصلة ... هيا لي راح تخلينا نسافرو عبر الزمن ... كيما خلاتنا نقطعو البحار ...ما يخفاش عليك حتى السفر عبر البحار كان شبه مستحيل ... و البوصلة هيا لي راح تربطلنا المكان بالزمان ...
هزتلو راسها و قالت : الوقت ... السلطان أذنلي لنص ساعة برك ...
العم : ربي يوفقك ...
قالت : أمين .. دخلت الكتاب ف محفظتها و انطلقت للقصر ....
__________________________

قريبا.....