كرونيك عابرة زمن

الفصل الاول 《القرار》

فوت قبل ماتبداو باش تشجعوني على الاستمرار🌸🤗
قراءة ممتعة 🌼☘

البارت الثالت☑🌹☑🌹☑🌹☑🌹☑

دخلت للقصر لقاتو مقلوب ... و الكل يتجارا ... عوجت فمها باستغراب ... من جيهة العادات لي يقولو عرس الأمراء عشر ايام و ليالي ... و هاذ الشي مبالغ فيه و من جيهة ماتوقعتش يديرو العادات معاها بعدما كانو غير راضيين على هاذ الزواج ... تنهدت بتعب هاد الشي مخوفها تعرف رضا الوالدين هوا كلش ...و خايفة يصراولها مشاكل ... كانت تمشي و تايهة ...لمحت زوج جواري يتهامسو عليها مامدتش اهمية للامر و جات حتتجاوزهم لولا انو لي كانت فيوم من الأيام صحبتها... حبستها بهدرتها وقت صاحت : من المحال نتزوج بسلطان ... لانو انثى وحدة ماتكفيهمش .. بلابلابلا ....زيرت على يدها ديما كانت تتجاهلها لانو عارفة علاش تتعامل هكا ...و كانت عاذرتها و رغم انها ماشي غالطة حملت روحها الغلطة و سكتت بصح لوقتاش ... دارت و طلعت حاجب  : نورهان...قولي مباشرة بلا لف و دوران ... المشكل ديالك معايا واش ... قربت منها تمشي و تتبسم بخبث و بنبرة متلاعبة : اووو قلقنا لعروسة الثانية ..عقدت حواجبها باستغراب و سالت: وش تخلطي نتي ؟؟ ... سكتت شويا و كملت : نورهان الصحبة تاعنا تستاهل انها تخلاص بهاذ الشكل ؟؟ تبسمت الثانية  باستهزاء  : نتي لي حكمتي عليها بهاذ الشي وقت سرقتيلي حبيبي ... غمضت عينيها بعصبية و جبدتها من يدها و نهرتها بحدة : ماتتجاوزيش حدودك مش معنى اني ساكتة معنتها تهدري هكا لي تهدري عليه راجلي ماتنسايش نفسك ... غمزتها و قالت : و لكن لو اني انا لي جيت ضرة ليك مش خير من بنت الملوك و اميرة الامراء ..على الاقل فالمقارنة معايا حتربحي .. و لكن فالمقارنة معاها معادلة غير عادلة شوية .. بلعت ريقها و قالت : و..وش قصدك ؟؟ عوجت نورهان فمها و قالت: اممم الظاهر ماسمعتيش ... نخليك عندي شغالات .. انسحبت نورهان بسرعة و على شفافها ابتسامة نصر ...ولات سمرا  خطوة للور و دارت يدها على قلبها من الفكرة لي جاتها ...
ثواني و هزت راسها بالنفي ... خدات نفس تهدي في روحها  ... اكيد راهي تقول هكا باش توجعها ... بصح المرة هادي مراحش تسمحلها ... كملت خطواتها واثقة ... نحنات بخفة وقت لمحت السلطانة الام فاطمة و كملت طريقها ...
صاحت السلطانة فاطمة : قاتلي الخياطة بلي هربتي مايكفوش التصرفات الصبيانية هادو ... راح تولي مرت الامير ...مرت ولي العهد ... قلبت عينيها من كلامها و دارت باش تواجهها ...نطقت  باابتسامة صفرا : ماهربتش بعثلي السلطان و ...قاطعتها السلطانة الام : روحي لغرفتك تلقاي الجواري يستناو ف جلالتك ...اليوم كتب الكتاب ...طلعت حاجب و قالت : علاش الاستعجال هذا ماشي من المفروض الاسبوع الجاي ... طلعت السلطانة الام بدورها حاجب و قالت : راكي تناقشي فيا حضرتك ؟؟ ... طلعت سمراء حواجبها و عوجت فمها و قالت بنفس نبرتها : مجرد سؤال ... شافت فيها من لفوق للتحت و التفتت لمدبرة القصر تقول بلهجة صارمة : ما نحب حتى غلطة نادية لازم يكون استقبال يليق بينا و يليق بالعايلة الملكية لي راهي جاية و كملت طريقها ... بلعت سمراء ريقها و قالت : المدبرة نادية ... شكون راو جاي ؟؟ ... المدبرة : العايلة المالكة للجنوب ... قربت منها سمراء بتساؤل : علاش جايين ..المدبرة : لل... قاطعها ولي العهد : سمراء ... انحنات المدبرة باحترام و قالت : مولاي نستأذن من جلالتكم  ... ولي العهد : اذنك معاك  نستنى منك زيارة بعدما تكملي اعمالك ...
شاف في سمراء لي كان باين عليها انو كانت شاردة لدرجة انها ما نحناتش اصلا ..حمحم و وجهلها كلامو  : سمراء ؟؟ راو مليح العم سليمان ... غمضت عينيها  تركز معاه هزت راسها بالموافقة  : مروان نسالك  ... بلع ريقو و رد باسف : عندي اجتماع مع الوزراء لازم نكملوه فالحين باش نلحق على كتب الكتاب ناجلو هدرتنا و اسئلتك اومبعد ... عضت على شفتها السفلى و ردت بزربة غالقة عليه طريق و هدرت على نفس : راك مخبي عليا حاجة ؟؟... وش حكاية العايلة المالكة و الاميرة و هده  التجهيزات ... صحا علاش بدلو موعد كتابنا ...غمض عينيه بيأس من تصرفاتها... خاصة وقت انتبه انو كل الجواري مركزين معاهم  علا من صوتو و صاح  بحدة : سمراااء راقبي تصرفاتك ماتنسايش بلي راكي امام ولي العهد ... اخر مرة نعذر تهورك و قلة احترامك ...ماتخلينيش نتصرف معاك تصرف تاني ... قربت المدبرة باش تحكمها من يدها تبعدها عليه .لولا انو نهرها بعينيه ... بعدت سمرا عليه بسرعة ... انحنات و لاول مرة كيما البقية و غادرت المكان بجمود ... زربت فخطواتها حابة تهرب من حقيقة وش صرا دوك ... خاصة انو كانت امام كل الجواري  ... تبعها بعينيه لاعن نفسو ...زير على يدو بندم و توجه لقاعة الاجتماعات
💗💗💗💗💗💗💗💗💗💗💗
توقعاتكم ياقراء ...
زعما نورهان قالت الحقيقة؟؟
  وش علاقتها بولي العهد؟؟
  سر عداوتها مع سمراء بعدما كانو اصدقاء ؟؟
وش رايكم فتصرف مروان مع سمراء ؟!