من يشتري شرفي !!
سهير رائد
للامانة في نقل القصة وكتابتها القصة منقولة من لسان احد الخوات وماعندي اي معرفة بااصحاب القصة
مع اضافه بعض الاحداث للقصة للتشويق لااكثر والقصة قصيرة ..
ونفتح دفتر الزمن ونبدا بقراءة حياتنا بين الحزن ولحظات الفرح وبين طيات الفقر وغنى المستقبل وبين وبين الف حكاية وكلمة
باسم العلي
اوكف يازمن
وياك الحساب
خذت مني العزيز
بغير اسباب
اوكف يازمن
وياك الحساب
خذت مني العزيز
بغير اسباب
اخذته اشلون مني
هوه اعيوني هذني
كمرنه من وكت ياللاسف غاااااااااااااب
اوكف يازمن .. اوكف يازمن ..
....
ميادة .. اكلج هو منو يسمع بعد هاي الاغاني ؟
غادة.. ليش حلوة والله .
ميادة .. بس كئيبه واحنه اليوم طالعين من شدة الكأبة ومخلصين أخر امتحان والدنيا حارة وتسمط وكهرباء الوطني ماكو وبس هلبنگة تجرخ بروحها جرخ على ساعه توگع علينـة وتكمل الحسبه وانتي دايرته على اوكف يازمن اووووي يا غادة هسة لاحبيبي لا نعال حتى نسمع اغاني عليهم .
غادة .. اي بس الاغاني مرات كلماتها حلوة مو شرط على الحبيب يمكن هو يقصد اخوة صديقة امه ماتوا ويذكرهم ..
ميادة .. اوي من فگر الحياة اللي احنه عايشينها كمت ماتأثر بشي حتى بالكلمات .
غادة .. احسن من غيرنا بهوااااي احنه
ميادة .. اي والله خطيه بابا دشداشته صايرة حمرة من كثر الشمس والحر والله اتمنى اساعده واخفف عنه
غادة .. سوده عليه حتى ميقبل نطلع ويااه يگول انتن بنات واخاف عليجن من الشارع ذيابة..
ميادة . اااخخخ كون اطلع معدل عادلي وادخل كليه بيها خير طب ناخيه الله ورسول الله واهل بيته كون معدلي فوك التسعين حتى ادخل طب واريح بابا وماما
غادة . . لاتضحكيني ولج هو منو يخليج تدخلين كليه احنه اليوم كملنه صح بس بعد لهنا وتوقف كلشي ووننتظر النصيب ونتزوج حتى بابا يخف حمله .
ميادة . ولج بلكي ادعي هو احنه مصيرنا واحد لازم تتفائلين ويايه اكثر ندخل كليه نتخرج نتعين نعين اهلنه متتمنين هل الشي ونخلص من الفگر وهل الخان اللي يومية طالعه النه لو عكرب لو حيه ..
غادة .. اتمنى طبعا ولو يوافق بابا والله انزل وياها للبگاله والبسطة من باجر او ادور على شغل بعيادة او محل واعينه على هم الدنيا والخان اللي معاجبج صاحبة مأجرة النه هل الغرفتين ب50بالشهر تعرفين شنو 50يعني لاشي بين اجارات هل الوكت واحنه بمنطقة زينه يجوز اقل مشتمل ب500الف
