هنا ظَل العَباس يكوم و يوكع
يكوم و يوكع لحد ما بعدها وكع و ما كدر يكوم منهـا نهد حيل الگافِل والقُربة صابها سهم راح مايها كُله و وكعت منه تأذه بهذا الشي العباس اكثر ما تأذه من جروحه
هنا من وكع نادى بـ كُل ما بقت عنده من قُدرة وحيل على اخو الحُسين وكال
السَـلامُ عَليك يا أَبا عَبدالله … أدركِني يا إبن والدي
تمدد عَ الرِمال و ظل يتنفس الروح بي يتصارع ويا الموت يريد يشوف الحُسين يريد اخر انسان يشبكه ويموت بحظنه هوَ حبيبه واخو الحُسين
لحد ما حَس اكو حركة يمه كال
بالله عَليك امهلني حتى يأتي إلي ابن والدي
بس هذا جان الحُسين جان اخو الموجوع كلبه ومنتهيه روحه على عباسه
گعد يمه الحُسين وشال راسه لحُضنه وگال
واخااه واعباساه … اخي عباس انا اخوك الحُسين
الامام الحُسين نمرد گلبه وتأذه من شاف الامام العباس يتلوه وهو ع الرمال وكال
اخي عباس لماذا تصنع هكذا ؟
رد عليه العباس بـ عبره وحزن وكال
: أخي يا نور عيني
هذا اليوم اللي بلغ العَباس بي أُم البَنين وكللها يا يمه اني انطيج وعد بكل ايام حياتي راح انادي الحُسين سيدي الا بيوم واحد اريدج تعذريني راح اصيحله اخي
واجى هذا اليوم واخ شكد صعب هاليوم 💔
گمل گلامه الكافل بـ حزن و دموع
: أخي يا نور عيني گيف لا اصنع هكذا ؟ وانتَ الان جئتني واخذت بـ رأسي لكن بعد ساعه مَن يرفعُ رأسك عن التُراب ومن يمسح التُراب عَن وجهك الشريف
يكله يا خويه اليوم اني طحت وانتَ اجيت شلت راسي وحظنتني وحجيت وياي بس بعد شويه من تطيح انتَ ع الرمل ياهو اليجيك يشيل راسك وياهو اليمسح التراب عن وجهك الشريف يا ابن والدي يا حبيبي يا حُسين
گمل كلامه وصعدت روح الكافل لـ الخِلقه 💔 دنك على صدره الحُسين وبجه وكال
والله الان لقد انكسر ظهري الان قلت حيلتي و الان شمت بي عدوي
ومن رفع راسه من صدر العَباس وإذا بكُل شعره في وجه الحُسين اصبحت بيضاء
شيب الضامي بـ رحَيل الكافِل
تأذه الحُسين وبلكوه شالته رجله و رَدته للمُخيم
السيدة زَينب والسيدة سُكينة بحر الشمس ينتظرون الحُسين والعباس و يردن يشوفوهم يمشون سوه
لكن رد الحُسين بلايه عباسه
من شافو الحُسين وحده نلچم كلبهم
تقدمت السيدة سُكينه لابوها الامام الحُسين وكالتله
: ابي اين عمي العَباس فـ انه قد وعدني بالماء
تنهد الحُسين وكاللها : يا بُنيه عمَكِ العَباس قتلوه
بجت وبده النحيب عند آلِ عَلي
استشهد عيون الحُسين ونَفس العَقيله وعَزيز الزهراء و شبيه حيدر الكرار
راح العَباس وهوَ خجلان من سُكينه لا ما قضالها حاجتها لكن رب العالمين جزاءًا اله انطى كرامة قضاء الحوائج لكُل العالم ولكُل شخص يطلب حاجته من العَباس فـ العباس " باب الحوائج " هوَ الراح يقضيها وما يقصر حاشا من التقصير
السلام عليك يا باب الحوائج
