إلامام محمد المُلقب بـ المَهدي او قائم آلِ مُحمد او الحُجه او المَهدي المُنتظر او هادي الأُمه او صاحب الزمان وهواي القاب للامام المَهدي
هوَ يكون ابن الامام الحَسن العَسكري
الامام الثاني عَشر من الأئمة المَعصومين
المُتمم لِـ سُلالة الرسول والامير عَلي وفاطمة الزَهراء ( عليهم السلام )
الغائب اللي من يظهر «ليملأ الأرض قسطًا وعدلًا بعدما ملئت ظلمًا وجورًا»
خلينا نحجي شويه عن الامام المَهدي عجل الله فَرجهُ الشَريف
الامام المَهدي هوَ اسمة محمد ابو سَمى ع اسم الرسول " صلى الله عليه واله وسلم "
بوقتها ما لكى غير اسم الرسول يناسبه وهذا كُله بـ ارادة رَب العالمين والرسول واهل البيت من قَبله على عِلم بهذا
اكثر العالم لحد هذا الوقت ما يعرفون منو الامام المهدي ! وشنو نسبه ومنو امه ومنو ابو و….. الخ من التساؤلات
هوَ … الامام محمد المَهدي ابن الامام الحَسن العَسكري ابن الامام علي الهادي ابن الامام محمد الجواد ابن الامام علي ابن موسى الرضا ابن الامام موسى ابن جعفر الكاظم ابن الامام جعفر الصادق ابن الامام محمد الباقر ابن الامام علي ابن الحُسين السجاد و زين العابدين ابن الامام الحُسين ابن أمير المؤمنين عَلي ( عليهم السَلام )
يكون الامام الحَسن العسكري ابو وباقي الأئمة الميامين ووياهم الامام الحَسن المُجتبى ابن امير المؤمنين هَم امام معصوم
وكُلهم اجداده واذا سامعين قصائد باسم الگربلائي و مُسلم الوائلي وباقي الراوديد من يقرون قصائد توصف غُربة الامام المَهدي من يكول للامام الحُسين " جداه " وينادي اخوات الحُسين ومنهن السيدة زَينب " عَماتي " ويكول ع امير المؤمنين گد ما يحبه " ابوي و جَدي " و ع فاطمة الزهراء " امي وجَدتي "
امـا أُم الامام المَهدي هي " السيدة نَرجس " اللي يُروى انُ هيَ من نسل شمعون الصَفا وصي المَسيح عيسى ابن مريم ( عليه السلام )
اما اسمائها تعددت لكن المتعارف هوَ نرجس
حَسب الروايات تكول انُ ام السيده نرجس من ولدتها حلمت بالمَسيح عيسى ابن مَريم يُبشرها انُ بنتها راح تتزوج احد الأئمة المَعصومين وهوَ الامام الحَسن العَسكري
تعددت الروايات بـ حادثة زواج السيدة نرجس من مولاي الحسن العَسكري
وهاي بوحدها قصة ثانيه تكون
المُهِم تزوجو وعاشو حياتهم سوا بـ سامراء لحد ما صارت حامل بـ الامام المَهدي ومحد جان يعرف شوكت راح يجي للدنيا
لكن عَن روايات اهل البيت عَ قبل جانوا يكولون " ليلة النِصف من شعبان فإن الله تبارك وتعالى سيظهر في هذه الليلة الحُجة وهوَ حُجتهِ على ارضه "
والروايات تكول هَم ان السيدة نرجس بـ ليلة النُصف من شعبان اي ١٥ شعبان سمعت صوت يكول " يا بنية إنّ الله تبارك وتعالى سيهب لك في ليلتك هذه غلامًا سيّدًا في الدّنيا والآخرة
وفعلًا بـ هاي الليله نولد امامنا المَهدي قائم آلِ مُحمد
والروايات تگول
بعد ما نولد الامام المَهدي راحو يبشرون الامام الحَسن العسكري بـ مجيئ ابنه للدنيا بوسط ما يبشروا هوَ جان ساجد لرب العالمين من گمل سجوده بشرو
يعني هنا جان عُمر الامام المَهدي يوم واحد بس او اقل حتى من يوم
الامام الحَسن بعد ما گمل سجوده نادى عمته حكيمة وكاللها هَلمي إليَ بُني
يعني جيبي الي ابني .. فَـ هيَ تكول اخذهُ فوضع يديه تحت أليتيه وظهره ووضع قدميه على صدره ثمّ أدلى لسانه في فيه وأمرر يده على عينيه وسمعه ومفاصله ثم قال: تكلم يا بني!
فقال مُحمد " الامام المَهدي " : اشهد أن لا اله الا الله وحدهُ لا شريك لهُ وأشهد أن مُحمدًا رسول الله صلى الله عليه واله … ومن بعدها صلى على الامام علي وعلى جميع الائمة الى ان وِصل لابو
ونفس الحادثه صارت بـ يوم السابع هم كال الامام لعمته حكيمة هَلمي إلي بُني
فـ جابته اله ففعل به كفعلته الأوّلى ثمّ أدلى لسانه في فيهِ. كأنه يغذيه لبنًا أو عسلًا ثمّ قال: تكلم يابني!
فقال: أشهد أن لا إله إلا الله وثنى بالصّلاة على محمّد وعلى آل محمّد، ثمّ تلا هذه الآية "وَنُرِيدُ أَنْ نَمُنَّ عَلَى الَّذِينَ اسْتُضْعِفُوا فِي الْأَرْضِ وَنَجْعَلَهُمْ أَئِمَّةً وَنَجْعَلَهُمُ الْوَارِثِينَ وَنُمَكِّنَ لَهُمْ فِي الْأَرْضِ وَنُرِيَ فِرْعَوْنَ وَهَامَانَ وَجُنُودَهُمَا مِنْهُمْ مَا كَانُوا يَحْذَرُونَ"
هسه تتعجبون ! لا لتتعجبون هذا امام معصوم وكُل الائمة المعصومين الهم صفات عظيمه مو مثل البشر العادي
انتو تعرفون امام معصوم يعني معصوم من الخطأ واكتساب الذَنب من الولاده للشهاده
حسب الروايات القريتها والسمعتها يكولون الامام المَهدي عجل الله فرجهُ الشريف
مشه وهوَ عمره اربعين يوم
وهو بهذا العُمر اربعين يوم يحجي ويتكلم كلام موزون وبرزانه و حِكم گ انُ رجل عمرة اربعين سنة
متخيلين لو لا صِفات امامنا المَهدي
داتشوفون الحادثة طفل بـ اول يوم و بـ سابع يوم يحجي ويتشاهد ويصلي عَ مُحمد وآلِ مُحمد ومن بعدها يرتل القُران
السَلامُ عَليكَ سيدي ومولاي يا صاحِب الزَمان 🤍
الامام المَهدي ظَل عايش ويا ابو خمس سنوات بالخفيه
يعني الامام الحَسن العَسكري جان خافي عن العالم الخارجي والعباسيين لانُ العصر العباسي جانو كُلش ظُلام الى درجة مو طبيعية يقتلون كُل شخص يشوفو يهدد مكانتهم و يعيق نفوذهم ويستولي ع سُلطتهم
فَـ گيف اذا درو انُ الامام المَهدي عجل الله فرجهُ هو الامام الثاني عشر والمُتمم لـ سُلالة النبي مُحمد والامير عَلي وهو الامام من بعد ابو ولازم الناس تبايعه وتعلن الولاء إله !؟
لهذا السبب عاش الامام المَهدي مُتخفي حتى استشهد الامام الحَسن العَسكري ( عليه السلام ) وجان عُمرة حسب ما اعرف اواخِر العشرين
وعُمر الامام المهدي تقريبًا خمس سنوات صار هوَ الحُجة و إمام زَمانه
