الامام الكاظم جان انسان مُحِب لله ولرسوله ولـ آلِ بيته من ابائه واجداده
وجان ينهى عن المنكر ويأمر بلمعروف ويساعد الناس بحيث حتى اللي يأذون ويكرهون الامام اذا طلبو المساعده منه هَم يساعدهم ويوكف وياهم بحاجتهم
جان دائمًا " يقابل الشَر بـ الاحسان "
جان عابد زاهد خاضع ومُحِب لله تعالى دائمًا يتعبد ويقضي وقته بـ العباده والتسبيح ودراسة امور الدين بـ مدرسة ابو الامام جعفر الصادق عَ العظيمة اللي تعلم كُل امور الدين
حتىٰ لُقِبَ بـ " العَبد الصالِح "
بـ منو يذكركم هذا اللقب ؟
بـ گافِل الكُبرىٰ سيدي ومولاي ابا الفَضل العباس ابن أمير المؤمنين " عليه السَلام " ♥️
جان عَبد صالح لله سُبحانهُ وتعالىٰ گ عمهُ العَباس ابن عَلي
الامام الكاظم " عليه السَلام " تعرض لظلم كُلش جبير بالدنيا وتأذه أذيه محد يكدر يتحملها
هسه اشرحلكم شلون ….
العصر اللي جان عايش بي الامام الكاظم روحي فداه هوَ العصر العَباسي
اللي جانو يحكمون البلد بهاي الفترة همَ حكام ظالمين كُلش يأذون اهل البيت " عليهم السلام " ويظلموهم ويأذوهم بـ كُل الطُرق
جان يحكم البَلد بـ هاي الفترة هوَ أبو جَعفر المنصور
اللي اغلبنه نعرفه ودارسين عنه
عاش الامام الكاظم ويا ابو الامام جعفر الصادق تَقريبًا ٢٠ سنة
بعدها ابو جَعفر المنصور قتل الامام جَعفر الصادق كُرهًا بي وحُبًا للسلطه
بسبب الحقد والغيره
لان آلِ مُحمد همَ احق بـ الخلافه من غيرهم وهمَ لعنهم الله حتىٰ يحصلون ع الخلافه يحاولون يقتلون كُل شخص من آلِ بيت النَبي الاكرم مُحمد
لهذا سمموا الامام جعفر الصادق روحي فداه ومن بعدها استشهد واندفن اللي لحد الان موجود قَبره بـ البَقيع
ابو جعفر المنصور هوَ يقربله للامام الكاظم ومن اقارب النَبي
شلون ؟
هوَ يصير اقارب العباس عَم النبي مُحمد لهذا الروايات تكول سموهم العباسيين
وجانو مستغلين الحكم بسبب قرابتهم للنبي
مرت ايام ومرت سنين لحد ما مات ابو جعفر المنصور
استلم الخلافه بعدها ابنه اللي اسمه المَهدي العباسي
وهذا الشخص جان اكثر ظلمًا وحقدًا و طغيانًا واذية من ابو
اضعاف الافعال الموحلوه والمؤذيه جان يسوي
تزوج وصار عنده ولد اسمه
هارون الرشيد
من كُبر هذا الولد قَرر يزوجه فـمن سوا حفلة زواجه عزم كبار الشُعراء وقرر يوزع فلوس وهدايا لكُل شاعر يكتب قصائد ضِد أهل البيت " عليهم السَلام "
شكد لعد حاقد عليهم بهاي الساعه هوَ ؟
الروايات تكول هذا الشخص المَهدي العباسي مجان يتعرض للامام الكاظم إلا من اجو مجموعة من المُنافقين بلغوا المهدي العباسي
انُ الامام موسىٰ ابن الامام جعفر الصادق " عليهم السلام " هوَ معارض لحكمهم ومعارض للسلطه مالته فـ امر
بـ سِچن الامام الكاظم روحي فداه
وجانت هاي اول مره يُسچن بيها الامام الكاظُم …💔
لكن بـ هذا الوقت وبـ ليله من الليالي اللي الامام الكاظم عَ جان محبوس بيها وخلف اسوار السِچن
الروايات تكول ..
جان المهدي العباسي نايم فـ من هوَ نايم زاره طيف او رأى شي او شخص يحذره من اللي هوَ دا يسوي بـ حفيد الرسول الامام موسى ابن جعفر عَ
فـ من شاف هذا المنام گعد مفزوع وخايف كُلش
وظل يفكر ويحسب عاقبة الامور السواها فـ بـهذا الوقت راح لـ جنوده وأُمر بـ اطلاق سراح الامام الكاظم عَ
فـ ظل كُل فتره من حِقده ما يتحمل يسجن الامام الكاظم ويصيرله شي او يشوف شي يخاف منه ويحذره من افعاله المُسيئه والمؤذيه للامام ويطلق سراحه
ظَل هيج لحد ما مَرت عشرة سَنوات على هذا الحال
لحد ما مات المهدي العباسي
صار ابنه اسمه الهادي وجان اقسه من ابو
و قُراء الروايات راح يعرفون شلون الهادي العَباسي مشهور بقساوته و طغيانه
من كُثر ما جان ظالم بهذا الوقت صارت ثورة ضِده
ثارو ضِده اتباع اهل البيت ومُحبيهم فـ قِتلهم كُلهم وما ترك شخص بيهم عايش
كُله لانُ يحبون آلِ مُحمد ويتبعوهم
وجان الامام الكاظم هواي يتلقىٰ تهديدات من هذا الهادي
لكن ما كدر يوصل للامام لانُ سبحان الله الهادي العَباسي بـ وسط مؤامراته ضِد الامام موسى ابن جعفر
مـات ….
لعن الله ظالمين مُحمد وآلِ مُحمد
