အချစ်နှင့်ကိန္နရာ( Completed)

Part 11

သုမဏိရှင် သလွန်ပေါ်မှယုဒ္ဓ‌ဓနုကို မမှိတ်မသုန်စိုက်ကြည့်နေသည်။သလွန်ဘေးတွင် ဒီပိနှင့်ဒီပါညီနောင်ရှိပြီး မုတ္တာဝလဧကရီလည်းရှိသည်။နန်းတွင်းသမားတော်က ယုဒ္ဓဓနုကို စမ်းသပ်ပြီး မကြာခင်သတိရလာလိမ့်မည်ဟုပြောကာ ဆောင်နန်းအပြင်ထွက်သွားသည်။သုမဏိရှင် ဧကရီကိုအေးစက်သောမျက်လုံးများဖြင့် စိုက်ကြည့်လိုက်သည်။မုတ္တာဝလဧကရီ ကျောရိုးတစ်လျှောက်အေးစိမ့်သွား၏။ကိန္နရာ၏အသွင်သဏ္ဌာန်က ‌အသက်ဝိညာဉ်ကင်းမဲ့သည့် နတ်ဆိုးတစ်ကောင်လို သွေးဆာ‌နေသည်။သို့သော် မုတ္တာဝလဧကရီ စိတ်ကိုတင်းထားကာ အေးစက်စက်ပြောသည်။

"ရှင် ရှင်တိုက်ခိုက်လို့ ကျွန်မရဲ့နန်းတွင်းသူတွေအကုန်ထိခိုက်သွားတယ် အဲ့တာ..."

"အရှင် သတိပြန်မရလာရင် မုတ္တာဝလနန်းတွင်းတစ်တွင်းလုံး သွေးချောင်းစီးသွားမယ်"

သုမဏိရှင်အသံက ဆောင်နန်းအတွင်းဟိန်းထွက်သွားသည်။‌အေးစက်ပြီး အာဏာစက်ပြင်းသောအသံက ဆောင်နန်းတစ်ခန်းလုံးရှိ လူများအားလုံး၏အသက်ဝိဉာဉ်များကိုပင် အေးခဲသွားစေသည်။မုတ္တာဝလဧကရီ၏စကားသံများ လည်ချောင်းတွင် တစ်ဆို့သွားသည်။ရှေ့မှ ကိန္နရာ၏လူသတ်ရိပ်ငွေ့များက လေထုထဲတွင် ပျံ့နှံ့နေသည်။တစ်စုံတစ်ခုလှုပ်ရှားမိလျှင်ပင် အမှုန့်ခြေခံရမည့်အလား မုတ္တာဝလဧကရီ ကြောက်ရွံ့သွားသည်။

မုတ္တာဝလ‌ဧကရီ လက်သီးကိုကျစ်ကျစ်ပါအောင်ဆုပ်လိုက်သည်။ပုလဲနတ်ရှင်၏စွမ်းအင်နှင့်ဆို သည်ကိန္နရာက ဥယျာဉ်တွင်းဝင်ရောက်နိုင်မည်မဟုတ်မှာသေချာသည်။သည်ကိန္နရာရဲ့စွမ်းအင်က ဘယ်လောက်ကြီးမားသလဲ မုတ္တာဝလဧကရီ မခန့်မှန်းနိုင်။သေချာတာတစ်ခုကတော့ သည်ကိန္နရာက သာမာန်နတ်ကိန္နရာမဖြစ်နိုင်ပေ။

သက်တော်နှစ်ဆယ်သာ ရှိသေးသည့် ဝေဠုဒီပေါအိမ်ရှေ့စံက သည်လိုစွမ်းအင်ကြီးမားသည့် နတ်ကိန္နရာကို ဘယ်လိုစွမ်းအင်မျိုးနှင့် ထိန်းချုပ်ထားသလဲ။အိမ်‌ရှေ့စံ၏ဘုန်းတန်းခိုးကရော ဘယ်လောက်ကြီးမားသလဲ။မုတ္တာဝလဧကရီ သလွန်ပေါ်မှအိမ်ရှေ့စံကိုကြည့်ကာ အိမ်ရှေ့စံ အမြန်ဆုံးသတိရလာပါစေလို့သာ ကြိတ်ဆုတောင်းနေလိုက်သည်။