အချစ်နှင့်ကိန္နရာ( Completed)

Part 20

လပြည့်ရန် လေးရက်အလို။

တပ်မင်းသက္က ခြေလျင်တပ်သားများထဲမှ အားကောင်းသည့် စစ်သည်ငါးရာကို ရွေးလိုက်သည်။ကြိုးများကျစ်သည့်စစ်သည်က တစ်ရာ၊သစ်လုံးများ ခုတ်လှဲသည့် စစ်သည်ကသုံးရာ၊ကျန်စစ်သည်တစ်ရာက သင်္ခယာနှင့်အတူ သမင်ကြီးများနှင့် ယဉ်ပါးအောင် လေ့ကျင့်ကြမည်ဖြစ်သည်။

တပ်မင်းသက္ကက စစ်သည်များကို တာဝန်အသီးသီးခွဲပြီးသည်နှင့် သစ်ပင်များကို စတင်ခုတ်လှဲစေသည်။တောကြီးထဲတွင် လူသံများဖြင့် ဆူညံသွားသည်။ထင်းရှူးပင်ကြီးများအားလုံး ခုတ်လဲခံရသည်။အေးမြသော ဒေသပင်ဖြစ်လင့်ကစား စစ်သည်တော် အားလုံးမှာ ချွေးတို့ဖြင့် ရွှဲနစ်နေသည်။စစ်သည်တော်များ လက်တွင် ရဲတင်းကိုင်ထားကြပြီး သစ်လုံးများကို အားကြိုးမာန်တက် ခုတ်လှဲနေကြသည်။တစ်ရက်အတွင်း ထင်ရှူးပင်များအားလုံးကို ခုတ်လဲရန် မလွယ်ကူသော်လည်း စစ်သည်အင်အားအလုံးအရင်းဖြင့် ကြိုးစားခုတ်လှဲကြသည်။

သင်္ခယာနှင့်မိဂေါနဒီစစ်သည်များမှာ ဝေဠုဒီပေါစစ်သည်များအား သမင်ကြီးများကို အမိန့်နာခံတတ်စေရန် လေ့ကျင့်ပေးနေသည်။ဝေဠုဒီပေါစစ်သည်တချို့က သမင်ကြီးများ၏ ရန်ရှာခြင်းကို ခံရသည်။

ဒီပိနှင့်ဒီပါ တပ်ဖွဲ့က ထင်းရှူးပင်မှ လွဲ၍ ကျန်သည့်သစ်ပင်များကို ခုတ်လှဲသည်။စစ်သည်များက သစ်လုံးများကို သယ်ဆောင်ကာ မြစ်ကမ်းဘေးသို့ ပို့ဆောင်သည်။မြစ်ကမ်းဘေးရှိ စစ်သည်များမှာ သစ်ဖောင်များ ဖွဲ့ထားသည်။

တပ်မင်းမင်းမဏိက ရိက္ခာတပ်များကို စုစည်းပြီး တောတွင်းအမဲလိုက်သည်။ဖမ်းမိရသမျှ သမင်များ၊ဆတ်များ၊ဒရယ်များနှင့်တောဝက်များကို ရိက္ခာအတွက် အသားများကို မီးကင်၍ အခြောက်အခြမ်းပြုသည်။

စစ်သည်များမှာ လုံလောက်သည့်သစ်လုံးအရေအတွက်ကို တစ်ရက်အတွင်း အပြီး ခုတ်လှဲကြသည်။သစ်လုံးများ စုဆောင်းသယ်ဆောင်ကြရင်းပင် တစ်ရက်ကုန်ဆုံးသွားသည်။

_________

လပြည့်ရန် သုံးရက်အလို။

တပ်မင်းသက္က သားရေကားချပ်ကို ကြည့်ကာ မျက်မှောင်များ ကြုံ့သည်။သုမဏိရှင် တပ်မင်းသက္ကကို ကြည့်လိုက်သည်။တပ်မင်းသက္ကက သုမဏိရှင်ကို သားရေကားချပ်ပြလာသည်။သားရေကားချပ်ပေါ်တွင် လေးကြီးများ၏တည်ဆောက်ပုံကို ရေးဆွဲထားသည်။