عشقى وقدرى (بقلم منار جمال)

الفصل 16

كان صوت الشيخ الشعراوي رحمه الله يعلو من احدي قنوات التلفاز والذي سيليه شعائر صلاة الجمعة
مديحة / وفاء،  انا هروح أنادي ريم وملك عشان نفطر ونشوف هي عاوزة تطبخ ايه ونبدأ نحضره
وفاء / خليكي انت وهروح انا
مديحة / لا شوفي انت نور صحيت ولا لسه وهروح اشوفهم واجي
وبالفعل ذهبت مديحة باتجاه شقة حازم وضربت الجرس، فتحت لها ريم ويظهر علي وجهها التعب والارهاق
مديحة / صباح الخير
ريم بابتسامة هادئة / صباح النور اتفضلى
تقدمت مديحة خطوتين كانت بمحازاة الباب ولكن من الداخل
مديحة/ شوفي ملك لو صحيت هاتيها وتعالي نفطر سوا قبل منبدأ نجهز الغذا
ريم / بس أنا خلصت
مديحة/ خلصتى إيه
ريم / الغذا
مديحة/ نعم،  خلصتيه ازاي وامتي
ريم / اتفضلى شوفيه بس لو ناقص حاجة أزود
وبالفعل اتجهوا معاً الي المطبخ
مديحة بصدمة وزهول / ايه دا،  ماشاء الله
ثم نظرت الي ريم وأكملت
_ عملتى كل الاصناف دى امتى
ريم / سهرت طبختهم
مديحة/ سهرتي طول الليل تطبخيهم
حركت ريم رأسها إيجاباً، فأكملت مديحة
_ ليه كدا ياحبيبتي ، كنا كلنا هنساعدك ونطبخ سوا
ريم/ محبتش أتعبكم
مديحة بمعاتبة / تتعبينا إيه بس، انت اللي تعبتي نفسك كدا
ريم / لا تعبت ولا حاجة أتمنى بس أكلى يعجبكم
مديحة بابتسامة / اكيد هيعجبنا ياقلبى،  طالما معمول بروح حلوة هيطلع جميل وأنا متأكدة
ابتسمت لها ريم بفرح ولم تتحدث،  فأكملت مديحة
_ طيب لفيه بفويل وأنا هروح أشوف ملك وننقله سوا هناك
ريم/ العزومة هتبقي هناك
مديحة/ أه،  لو حابة تبقي هنا
قاطعتها ريم / لالا أبداً والله أنا بس بسأل
وضعت مديحة كف يدها علي وجنتها بحنان أم استشعرته ريم لاول مرة منذ فترة، فهى اول من رأت مديحة وهى تشعر وكانها بمثابة امها بحنانها وطيبة قلبها
مديحة/ عادى لو عوزاه هنا،  انا قلت هناك لان كلهم متعودين يتجمعوا عندي يوم الجمعة بس
هزت ريم رأسها بتفهم، فأكملت مديحة
_ يالا اعملى اللي قولتلك عليه،  وانا هشوف ملك
ريم / حاضر
وبالفعل ذهبت مديحة وعادت بعد فترة قصيرة بصحبة ملك وكانت ريم انتهت من لف صوانى الطعام
ملك بذهول / إيه كل دا،  عملتيه إمتى
مديحة/ سهرت طول الليل تطبخ،  يالا ننقله سوا
ونكمل كلامنا هناك
ثم نظرت الي ريم وأكملت
_ فين حازم
ريم/ خرج من بدرى
مديحة/ مفطرش
ريم/ لا أنا قلت له احضرلك الفطار،  رفض
مديحة/ يمكن لما شافك مشغولة،  مرداش يعطلك بس
ريم/ أنا وقتها كنت بغسل الاطباق والاكل في الفرن
مديحة/ تمام مش مشكلة ، هو طبعه كدا أساسا، يالا بينا
-----------------------------
فى مطبخ مديحة
وفاء / ماشاء الله،  عملت امتي كل دا
مديحة/ سهرت طول الليل تطبخ
وفاء / ليه كدا ياحبيبتي كنا هنساعد بعض كلنا
مديحة/ محبتش تتعبنا،  ثم ذهبت اليها وقامت باحتضانها ثم اكملت
_ انت من اليوم اللي دخلت فيه البيت واتكتبتي علي اسم حازم وانت بقيتى من العيلة دي،  وبنتي التالتة زيك زيهم،  بعد كدا متتعبيش نفسك،  عارفة ومتاكدة من قصدك بس انا ميهنش عليا تعبك تمام
ابتسمت ريم بسعادة وكادت تتجمع الدموع بين جفونها من شدة الفرح
فذهبت اليها وفاء واحتضنتها هي الاخرى
_ يعني مسبتيش لينا حاجة نعملها خالص
ريم بابتسامة / لا لسه الارز والسلطة والعصير بس
وفاء / بس ودول حاجة قصاد اللي انت عملتيه،  تسلم ايدك ياحبيبتي
كانت ريم في قمة سعادتها من كم الحب والحنان الذي استشعرتهم من مديحة ووفاء لاول مرة تشعر بالحب والاهتمام لذاتها من احد
مديحة/ وفاء، نور صحت
وفاء / اه وكانت بتقرأ الورد بتاعها
مديحة/ ملك ناديها اعرفها بريم وعشان نفطر يالا
ذهبت ملك وخرجت مديحة ووفاء وريم الي الريسبشن
مديحة/ تحبى أجيب لك بيچامة تغيرى العباية دي،  مفيش حد بيجي دلوقت ومبيدخلوش قبل ميستأذنوا
ريم باستيحاء / لا شكراً،  أنا لسه أخدا دش وغيرت هدومى،  هفضل بيهم
وفاء لحظت خجلها / علي راحتك ياحبيبتى،  بس لو اديقتى قولى
هزت رأسها ايجاباً ، وفي نفس الوقت خرجت نور بصحبة ملك
نور/ السلام عليكم
رد الجميع السلام
ذهبت نور باتجاه ريم،  فوقفت ووقفت معها مديحة لتعرفهم علي بعضهم
مديحة/ ريم دى نور بنتى،  لسه بتدرس في كليه فنون تطبيقية
نور بابتسامة جذابة/ ازيك عاملة ايه
ريم بابتسامة ايضا / الحمد لله
نور/ الف مبروك معلش اجت متاخر بس توحة قالت لنا نسيبك تاخدي علي الجو اول وبعدين نتعرف كلنا
ريم/ ولا يهمك،  الله يبارك فيكي
مديحة/ يالا يانور انت وملك جهزوا الفطار
وبالفعل ذهبت نور وملك وجلست مديحة ووفاء بصحبة ريم
مديحة/ اخبار حازم معاكي ايه
ريم كانت تنظر للاسفل / الحمد لله كويس
وفاء بشئ من الهزار / اوعي يكون بيزعلك ولا بيتعصب عليكي ، يا ويله من مديحة
ريم بابتسامة بسيطة / لا هو عمره مزعلني بالعكس هو كويس جدا معايا
نظرت مديحة ووفاء الي بعضهم باستغراب وكذلك ريم ونور وهم يضعون اطباق الطعام علي السفرة وبالاكثر ملك كانت في حالة ذهول ولكن فسرت الامر بشكل خاطئ بناءاً علي مفهومها الخاطئ عن ريم،  وفسرت الامر انها تتودد اليهم وتكسب تعاطفهم نحوها
_______________
مديحةممسكة يدها / ربنا يهنيكي ويبارك فيكي ياحبيبتي بس انا عاوزة اقولك حاجة قولتهالك قبل كدا وهقولها تاني،  انا هنا زي ماما بالظبط وانت في البيت دا زيك زي نور وملك وفي نفس مكانتهم ومتقليش حاجة عنهم، يوم حازم ميزعلك بكلمة بس قوليلي وهتشوفي هعمل فيه ايه
ريم بابتسامة / ربنا يخليكي يارب انا يشرفني انك تعتبريني زي بنتك
مديحة/ مش بعتبرك انت كدا فعلا وكلهم ولادي
وفاء/ لو كان حازم اسلوبه صعب شوية اعذريه واستحمليه، هو اتحط في ظروف وشال مسؤلية بدري كان لسه صغير،  زي مبيقولوا كبر قبل أوانه فعشان كدا بقي جد في كل تعاملاته هو يبان قاسي لكن هو طيب وحنين جدا وهتشوفي دا في معاملته لملك، اصبري معاه شوية ووحده وحده الجليد دا هيزيح وهيرجع حازم اللي حبيتيه وعرفتيه
ريم توجزت خيفة أن يكونوا لاحظوا شيئا بالخطأ ويصل الامر الي حازم ويتفهمها للمرة التي لم تعرف عددها خطأ
ريم بنفي / لا لا هو كويس جدا معايا،  وبيعاملني كويس وحنين وطيب
وفاء / اتوترتي كدا ليه احنا بندردش معاكي متخافيش
قاطعهم نور وهي تخبرهم ان الفطار جهز،  جلسوا سوياً علي السفرة يتحدثون ويتناولون الفطار كانت ريم في قمة سعادتها رغم خجلها الواضح لكن لاول مرة تجرب شعور لمة العائلة وألفة ودفئ اجتماعهم مع بعضهم فهذا الشعور افتقدته منذ وفاة والديها
بعد الانتهاء من الفطار قامت ملك ونور بعمل اكواب الشاي،  وطلبت مديحة من نور في الخفاء ان تجلس هي وريم وملك في البراندا ويتناقشوا كمثل اي مجموعة فتيات معاً
************
في البراندا
كانت ريم تنظر الي منظر النيل الخلاب وشادرة،  ليس لانها لاتحب الجلوس معهم ولكن لعدم الظن بانها متطفلة وتدخلت في امور لا تخصها
انتبهت نور اليها فتحدثت معها
نور / ريم سرحانة في ايه
لم تجد رد فتحدثت مرة اخري
نور / ريم،  ريم
ريم بانتباه/ نعم
نور/ ايه روحتي فين
ريم/ مفيش سرحت شوية بس بعتذر
نور/ بتعتذرى عن ايه ياحبيبتي،  بس لقيتك مش معانا بس
ريم / عجبني منظر النيل بحبه جدا،  اوقات كتير كنت ببقي حابة ارسمه بس معنديش وقت
نور/ ايه دا بتعرفي ترسمي
ريم/ يعني شوية مش اوي يعني
نور/ انت معاكي شهادة ايه
ريم ببعض الخجل / مكملتش،  بابا وماما لما اتوفوا،  عمتي منعتني اكمل بحجة انت دي عادات الصعيد
لم تريد نور التطرق الي الامر لعدم احراجها وشعورها بالخذلان، فقامت بتغير الكلام
نور/ كان نفسك تطلعي ايه
ريم/ مهندسة ديكور
نور/ آااه عشان كدا بترسمي، استني هجيبلك الاسكتش واوريكي رسوماتي
هزت ريم راسها ايجابا وعادت بنظرها الي النيل عند رحيل نور
ملك/ ينفع اسالك سؤال
ريم/ اتفضلي
ملك/ انت ليه قولتي لهم ان ابيه حازم بيعاملك كويس جدا،  رغم ان اوقات بيتعصب عليكي،  عاوزة توصلي لايه
ريم/ مش عاوزة اوصل لحاجة
ملك/ ليه قولتي كدا ، ومتقوليش ان عشان لازم تقولي كدا والبيت اسرار و اللي بينكم ميخرجش و الست العاقلة والكلام دا
نظرت اليها ريم قليلا ثم الي النيل ثم عادت النظر اليها
ملك بشئ من السخرية/ ايه الرد محتاج تفكير اوي كدا ولا بتفكري في كلام مقنع
ريم/ لا،  انا مش عارفة انت شيفاني ازاي،  ولا اعرف ليه واخدة الفكرة دي عني،  ولا عارفة اذا كنت ينفع اقولك اللي هقوله دا ولا بس هقولك ومتسأليش بعدها
صمتت قليلا ثم اكملت وهي تنظر الي الاسفل
_ يمكن معاملة حازم ليا بالنسبة لاي حد يشوفنا يقول فيها اهانة ليا ومعاملة وحشة جدا،  انا أه معرفش سببها بس هتصدقينى لو قلتلك ان معاملته دي احسن معاملة اتعاملتها من وقت متوفوا أهلى
نظرت اليها ريم بحيرة،  كيف طلبت منها عدم سؤالها مرة اخري وهي الان تزيد حيرتها وغموضها اليها،  وما الهدف وراء حديثها أمن الممكن ان يكون هنالك احداث واسرار لم يكشف عنها للأن ام ماذا
قاطع تفكيرها ونظرتها الي ريم دخول نور وانشغلت بالحديث مع ريم ومشاهدة الاسكتشات الخاصة بها وتجوبت ريم معها وما زالت عيون ملك عليها تملئها الحيرة الي ان قاطعهم دخول وفاء
وفاء / يالا يا بنات نحضر الغذا وانت ياملك اتصلي بيهم ينزلوا
ذهبت نور لتعيد الاسكتشات الي غرفتها وخرجت ريم بصحبة وفاء باتجاه المطبخ
ريم/ هما هينزلوا منين
وفاء بابتسامة/ فوق في الروف عاملين صالة چيم خاصة بيهم وركن فيه انتريه و كورنر مشروبات بيصلوا الجمعة ويطلعوا يتمرنوا شوية
حركت ريم رأسها ايجاباً ووصلوا الي المطبخ
صممت ريم علي تحضير الغذاء وحدها ورفضت المساعدة بما ان نور وملك من احضروا الفطور
لم تعترض مديحة كثيرا لعدم احراجها ولتعطيها مساحة للشعور بانها بين عائلتها ويجب التعامل بطبيعتها
تفاجأوا جميعا من معرفتها باتكيت تحضير السفرة
فهي جهزتها كأن شيف محترف الذي فعلها ولكن لم يعقبوا
رن جرس الباب وكان هشام وعمر فتحت لهم مديحة وكانت ريم في المطبخ تحضر عصائر، وكانت نور وملك يرتدوا ملابسهم
هشام/ السلام عليكم
مديحة/ عليكم السلام ورحمة الله وبركاته ، فين حازم
عمر / معاه مكالمة ونازل ورانا
مديحة بصوت منخفض / كويس انكم نزلتم قبله عاوزة أقول لكم حاجة
هشام / في ايه
عمر / خير قلقتينا
مديحة/ خير متقلقوش،  بصوا أنا هنادي علي ريم تتعرفوا عليها،  مش عاوزة أنبهكم ريم زيها زي نور وملك تعاملوها زيهم من يوم مدخلت البيت دا وهي بقت واحدة مننا وزيها زي الكل ملكوش دعوة بحازم ولا معاملته ليها سامعين
هشام/ هو احنا صغيرين ياتوحة أكيد ملناش دعوة بحد وهي اختنا زي نور وملك
مديحة/ تمام،  ثم نظرت الي عمر
عمر / ايه.  بتبصيلي كدا ليه يعني أنا الشرير الوحش اللي هعاملها وحش،  وانا مالي هي فرد جديد دخل العيلة واخت جديدة ليا
مديحة بابتسامة / ايوا هي دي تربيتي ربنا يبارك لكم، استنوا هنادي عليها اعرفها عليكم
ريم …… ياريم
خرجت ريم من المطبخ وعندما وجدتهم نظرت الي الاسفل بخجل
ريم/ نعم
مديحة بابتسامة وهي تلف يدها حول كتفها
_ أعرفك ياقلبي دا عمر ابن عم نور ودا هشام ابن اخويا
عمر بابتسامة ترحيبا بها وممازحا / ابن عم مين وبالنسبة لاني اخوها ايه
مديحة بضحكة / أه أخوها في الرضاعة
ريم ببعض الخجل / اهلا وسهلا
عمر/ اهلا بيكي في عيلتنا
هشام / أهلا بيكي من انهاردا زاد ليا اخت،  والف مبروك
ريم بخجل وتنظر للاسفل / دا يشرفني، الله يبارك فيك
دخل فجأة حازم من الباب ونظر لهم جميعا
_ انتوا واقفين كدا ليه
مديحة/ مفيش كنت بعرفهم  علي بعض
نظر حازم لهم جميعا وأخيرهم ريم
_ تمام،  الغذا جاهز
مديحة/ أيوا ريم مجهزة كل حاجة،  5 دقايق وتلاقي الاكل علي السفرة
حازم/ تمام أنا في البراندا عما تخلصوا
وذهب بدون أن ينتظر رداً من أحد
هشام ممازحاً / الله يكون في عون اللي عايشين معاه مستحملينه ازاي
عمر / ما بلاش ليسمعك
هشام / ولا يهمني هو يقدر يكلمني
عمر بضحك / أه بقمارة البوكس اللي اتغلبت فيه فوق
هشام / لا دا أنا لسه مسخنتش بس،  استني كدا أكل وأرم عضمي وأنا اكسرهولك
عمر / غذيه بقي ياريم عشان عنده امل ان يضرب جوزك
هشام / ريم هتزعلي لو رجع بايد مكسورة ولا رجل
ريم ببعض الخجل / أكيد
عمر/ طيب قول يارب مترجعش انت مكسر،  ثم نظر الي ريم واكمل
جوزك مبيرحمش أي حد يقف قصاده ينسفه
أتاهم صوت أفزعهم وكان حازم يقف علي باب البراندا
_ بتعملوا ايه
مديحة / مفيش كنا بنتكلم شوية،  ثم وجهت كلامها لهشام وعمر
_ روحوا يالا. وهنادي عليكم
بعد قليل كان الجميع يجلس حول المائدة،  وطلبت مديحة من ريم ان تقدم الطعام للجميع
هشام ممازحا / ايه المناظر الجميلة دي شكلي مش هقوم من هنا غير وانا مخلص علي الاكل دا
عمر / طول عمرك طفس،  بس للامانة الاكل شكله تحفة ماشاء الله
نور / متقوليلنا ياريم انواع الاكل عشان دي أصناف جديدة
ريم/ في أصناف مصرية وأصناف اماراتية،  يعني مثلا دا اسمه (الهريس) عبارة عن حبوب قمح ولحمة او فراخ بيبقي سهل وبسيط بس جمييل
ودا اسمه (الجباب) شبيه الفطير المشلتت،  بيتقدم مع الجبن او العسل او القشطة ممكن سادة
ودا اسمه( الثريد) رقاق امراتي بس انا عملته بالرقاق المصري لانه يشبهه باختلاف ان بيبقي فيه خضار اكتر زي (الكوسا والبطاطا والجزر) ولحمة وفراخ علي الوش
والباقي اكلات معروفة زي البط والبشاميل والطواجن وغيرها
وفاء بابتسامة حنونة/ تعبتي نفسك والله،  اصناف كتير ماشاء الله
ريم / ولا تعب ولا حاجة ببقي مبسوطة وانا بطبخ لحد بحبه
عمر/ انت منين في الامارات
ريم / من دبي،  ماما من هناك،  وعيلتها كلها من هناك
نور/ وانت لسه فاكرة الاصناف وطريقتها
ريم / اه ماما توفت هي وباباوانا عمري 12 سنة ، وكانت معلماني كل حاجة
هشام/ ربنا يرحمهم يارب
الجميع باثتثناء حازم ردد / ياارب 
مديحة/ طيب يالا كلوا
وعندما بدأوا الطعام نال استحسان واعجاب الجميع وأبدوا رأيهم الا حازم كان يجلس ولا يظهر علي ملامحه اي ردود افعال
وعند الانتهاء من الاكل كانوا جالسين في الريسبشن
هشام/ خلاص مش قادر همووت
عمر/ ولا انا الصراحة بجد تسلم ايدك ياريم
ريم / الف هنا
نور/ حد قالكوا تطفسوا علي الاكل وتاكلوا كتير
هشام/ اكل حلو ومقدرناش نوقف من حلاوته مش انت والهانم اللي جنبك اكل علي ما تفرج يجيب تلبك معوي
نور/ ياسلااام اكلي انا يجيب تلبك معوي مااشي
عمر / انا مقولتش حاجة البت ملك اللي اكلها عك
ملك / لا والله طيب أبيه انا اكلي وحش
حازم / لا ياقلبي،  هو اللي حمار مبيعرفش يفرق بين الاكل الحلو والاي كلام
عمر/ مين دا اللي حمار بقي أنا الدكتور عمر يتقالي حمار
نظر له حازم / نعم في حاجة
عمر / لا ابداً خد راحتك
ضحك الجميع عليهم،  ولم يخلوا. الوقت من مزاح ومنكاشات هشام وعمر مع نور وملك
كانت ريم في قمة سعادتها من جو الالفة ولكن هناك كلمة عكرت صفوها ولكن لم تظهر ذلك يكفي أن اليوم بأكمله كالحلم بالنسبة لها وانها وجدت دفئ وحب العائلة

#وللحديث بقية
#عشقي وقدري
#بقلم منار جمال