♥▄الـنـبـ«7»ــضــة▄♥
:
:
:
فـي الـغـــد..~
دخلت إلى الصالة...و عدم الرضا جلياً على ملامحها...لتجلس بينهم...و تتنهد بضيق...
جواهر بقلق / خير وش فيه يا أم ساري؟
أم ساري بكدر / دقيت على أم منوه عشان اشوف رأيها في الخطبه..و كأنها ما صدقت وافقت على طول.._تكمل بضيق و إستحقار_كانت تبينا نجي اليوم بعد!!
جواهر تتنهد بيأس / و أنتي كان عندك شك إنها بترفض..يعني ما تعرفين أم منوه أكيد تتمنى هالشي
أم ساري و ضيقها يتعاظم / طبعا وين يحصل لهم واحد مثل ساري يفكر يناسبهم..بس والله مو هاين علي ساري..أنا يوم خطب دانه ما كنت راضيه على ذيك الخطبه..عشان متأكده إن أمها بتنكد عليه و علينا..بس وافقت لأني كنت اتمنى وحده مثل دانه له عشان كذا تنازلت و خطبتها من موضي وقلت باتحملها عشانه و عشان البنت زينه..لكن اللحين! لا حول و لاقوة إلا بالله..لا البنت زينه و لا أمها و لا تصرفاتهم.._بندم_مادري كيف وافقت؟؟ الله يهديك يا ساري عاد هذا إختيار!!
سمو تضحك / غلطة الشاطر بعشره
أم ساري / سمو لا تقهريني مو ناقصتك
سمو بلامبالاة / عادي يا أم ساري خليه ياخذها على شينها..بس عشان يقهر مويضي العله ويشب كبد بنتها
تنهدت كادي بضيق...و هي تسمع تصريحاً يؤكد كره سمو لعائلة عمها...
من المستحيل أن تقنعها بعودة المياه لمجاريها...كما ترغب جود...و هي أيضاً...
أم ساري / عيب عليك هالكلام! لا اسمعك مره ثانيه تقولينه
سمو / يوو ياأم ساري أنا ما أعرف اسكت لاكرهت احد
أم ساري بحده / و أنتي وش دخلك فيها لاتكرهينها و لاتحبينها..و لاتتكلمين عنها أبدا
سمو / زين اتركينا منها الأذيه_تهرب بنظراتها من غضب والدتها..لتكمل بخبث_وش رايك تقولين لساري انهم رفضوا دام ما تبين له منوه..يعني ساري من وين بيعرف رايهم؟؟
تغيرت ملامح والدتها من الغضب...للدهشة...لتلتفت على جواهر بنظرات تستحسن الفكرة...
جواهر قاطعه أفكارها /لا تطاوعين هالخبله على أفكارها..لو عرف ساري وش بيكون رده و حنا لاعبين عليه......الله يكتب له اللي فيه الخير..سواء يتم هالزواج و لا ما يتم
ابتسمت كادي...و هي تراقب مناقشتهم...
و إمتنان يكبر لسمو...و هي تسمعها تردد دوماً بحضورها...أم ساري...
تعلم أنها لا تريد أن تنطق بكلمة_يمـه_فقط مراعاة لمشاعرها...و حرمانها...لذا لا تقوى أن تضايقها بمجرد ذكر جود أمامها...
لكنها تتمنى لو اجتمعن سوية من جديد...لكي لا تضطر أن تنفصل بحياة أخرى لا تجد فيها سمو...
انقطعت أفكارها بتصاعد رنين هاتفها...
كادي تجيب مبتسمة / هلا سامي......ايه خلصنا......._تلتفت إليهم_خالتي سامي يبي يسلم عليك
أم ساري تقف / خليه يدخل هنا..أنا طالعه فوق...يله سمو
سمو مازحة / كل واحد يتكلم عن نفسه..أنا شخصياً باجلس اسولف معهم
أم ساري تشدها أمامها / عن الخبال و يله قدامي
