♥▄الـنـبــ« الأخيـــــرة »ــضــة▄♥
:
:
:
قبل الحادث بســاعة ..~
كان يراقبه بخيبة موجعة...و حزن...و مرار على ذلك الحال الذي لا يعلم كيف وصل إليه..؟!
منذ البارحة...وهو يجلس أمامه ساكن...شارد...لا يتحرك...و لا يتكلم....يراه يغفو للحظة...لكنه سرعان ما يفز من نومه ليسأل عن صبح...و يطلبه الإتصال بخالته كي يطمئن عليها...
سامي يرى هاتفه الملقى على الطاولة أمامه / تميم كسّر جوالك من الإتصالات..ليه ما ترد؟
باسل بضيق و تعب / مابي أكلم أحد
سامي بعد لحظة..يرفع له هاتفه / يتصل علي!
باسل بتحذير / قول له إنك ما شفتني
سامي لا يطاوعه / بيقلقون كذا عليك و أنت من الصبح ما ترد عليه
باسل بإرهاق/ خلاص قول له إني كنت عندك..بس اللحين نايم..طلعت..أي شي..بس مالي خلق اكلمه و لا لي خلق اروح خطبة ساري اللي متصل عشانها
تحدث معه سامي ليتحجج له بكل كذبة تخطر في باله...و حين أغلق منه...عاد ينظر إلى باسل بقلق...
لا يعرف كيف سيخبره...و قبل أن يجد طريقة للبدء...بادره هو بالسؤال...
باسل بقلق / كلم عمتي تطمن على صبح
سامي / خالتي كلمتني اللحين..هي مع تميم رايحين لخطبة ساري
باسل يقف بغضب / وصبح!!! هي وعدتني ما تتركها لحالها!!!
سامي يعترف أخيراً / تقول إنها رفضت تجلس في البيت و راحت بيت أهلها
باسل بمرار و ندم / أنا غلطان اللي طلعت من البيت وصدقتها! كان المفروض ما اطلع لحد ما أقدر اكلمها_بدأ يتحدث مع نفسه بشرود_ماراح ترد علي لو اتصلت..بأروح لها أحسن
سامي يوقفه / باسل..اللي صار مو بسيط...و لازم تنتبه وش لازم تسوي عشان الموضوع ما يكبر أكثر..فكر بصبح و فكر بعد بضي
باسل بقهر / أفكر بضي! والله لو مو بنت عمي و عشانه كان عرفت كيف أرد لها اللي سوته
سامي بصدمة / باسل أنت مو حاس باللي سويته! أنتي مخطي أكثر منها و لازم تتحمل نتيجة هالخطأ معها!!
باسل لا يستوعب / كل شيء أنت عارفه من الأول..هي اللي لحقتني بدال المرة ألف! و أنا ما كذبت عليها و لا وعدتها بأي شي..و هي رضت بكل هذا! مو ذنبي إذا كانت تلعب علي و تخطط لشيء ثاني و أنا قلت لها من البداية إنه ماراح يصير..تتحمل اللحين لحالها اللي رضته على نفسها..!!
سامي بإصرار غاضب / حتى لو كانت هي اللي بدت بس اللي صار خطأكم كلكم
باسل بعصبية / وش صار؟ وش اللي صار يعطيها الحق تخرب بيتي؟ أنا ما خبيت عليك شيء.. إلا إني شفتها مرتين بس
سامي يستغرب بروده حتى بعد معرفتهم بالأمر / و اللي صار بهالمرتين ماراح يخرب بيتك بس! لو عرفوا خوالي..........
باسل يقاطعه / أنت وش تقصد؟_ليكمل بصدمة و قهر_وين راح تفكيرك؟ أنا شفتها صح..بس لمسة وحده ما لمستها!!
حين رأى الصدمة تبهت ملامح سامي...عاد يستوعب في خياله نظرة عمته المذهولة بخذلان...العاجزة عن إستيعاب الأمر....
لينبض قلبه بعنف...و قهر...وهو يتذكر الهيستريا التي أصابت صبح...حينما رأته...و الرعب الذي انتفضت به حين فكر بالإقتراب منها..!!!!
