انثنى غيم نجد لخد الحجاز النرجسيه

١٣

ركب السياره وهو يتذكر كلام عمر ونظراته وقسوته ويتذكر كيف نطق إسمها وكسر كل توقعاته وصدم كل شي داخله كان متأكد من انها نورا
كيف اليوم تبدل كل شي صارت بإسم ثاني ، إسم يحلف انه ما سمعه بحياته أبد ولا فكر فيه ،
أنهار ، هي حتى بإسمها كثيره من كثرتها بالدنيا تسمّت بالجمع ما تسّمت بمفرد
حلف يمين انها صارت أحلى بإسمها ، تنهد من تذكر بكاها وصدمتها بوجه ابوها وبالدم اللي ينزف من راسه هو جاهل كيف كان عمر معهم بعيد لكنه متأكد ان رَده ضغط عليه وبدل حاله عنهم لاسوأ حال ممكن يذوقونه منه يدري انهم مدللين من كلامهم واهتمامهم ودموعهم هو يشوف فيهم الدلال والغنح والدلع وعمر ما يظهر منه الا القسوه والخشونه ومتأكد انهم يتعورون
وصل فيه التفكير لدرجة انه نزل من سيارته ودخل المستشفى وجلس على السرير يغيرون الشاش على راسه وينظفون جرحه وهو لا زال غارق بتفكيره
،
جلست بمكانها وهي ضامه يدينها وتناظرها وسط الظلمه التفتت حوالينها بخوف من مكانها لكنها تمنع نفسها من انها تكون مع نورا او أمام عمر
تحس انها مخنوقه من التغير اللي صار بحياتهم ماتقدر تساعد نفسها عشان تساعد نورا بهاللحظه كل اللي تحسه انها تبغى تكون بعيده وخلاص حاولت ما تبكي من حست بالغصه تاكل حنجرتها والتفتت لآخر الممر وهي تشوف المستودع اللي تعدل وضعه سهت وهي تراقبه وتتذكر لحظتها
لحظة ما شدّها من يدها يجبرها تتمرد وتحرقه بيدها معاه والزيقاره اللي كان يثبتها بين شفايفه ينتظر منها تقوي نفسها وتشعل النيران بالمكان
تذكرت وقتها يوم نصحها نصيحه وسط همس صوته المميز : دموعك مايقدرها اللي تعود عليها
مسحت دمعتها اللي نزلت وعقدت حاجبينها من استوعبت جملته هي تحلف انها تبكي يومياً من وصلوا لهنا وتبكي قدام عمر وقدام خواتها ولا تستحي انها تبكي
بس دموعها ما غيرت شي هي لا زالت تعاني ولا زال عمر يتلبس القسوه لبسه الدايم معاهم
سمعت صوت البوابه والتفتت ووقفت من محلها تناظر سيارته تدخل المزرعه ويبتعد عن مكانها للمواقف شدت على جوالها وهي تنتظر تلمحه نزلت انظارها ودقت عليه
،
بهاج وقف سيارته والتفت يناظر راسه واخذ كيس الادويه من يمينه ونزل راسه من دق جواله اللي بحضنه وعقد حاجبينه وهو يشوفها مكالمه من نوع ثاني مكالمة سناب ومن أنهار
رد وهو يناظر أمامه:هلا
أنهار:تقدر تجيني ؟
بهاج عقد حاجبينه:وينك ؟
أنهار:بالمكان
بهاج التفت يساره وهمس:ممر النوير ؟
أنهار:انت تسميه كذا ؟
بهاج فتح الباب ونزل:بجيك
ماردت وقفلت جوالها وهي تناظر محله من بعيد لين بان بمدى أنظارها وهو جاي للممر
اخذت نفس وجلست وناظرته يدخل الممر اللي يعجّ بصوت حركة الشجر والنخل من الهبوب
مشى بخطوات هاديه وهو يلمح ظلها ونطق وهو يقرب منها:فيك شي ؟
رفعت راسها له وهزت راسها بالنفي وقف محله وهو يناظرها جالسه واخذ نفس طويل وجلس جنبها
أنهار نزلت راسها وهمست:راسك يعورك ؟
بهاج هز راسه بالنفي ولف لها يناظر صدودها:انتي في شي يعورك ؟
لفت له أنهار وناظرت سكوته ونظراته لها وهزت راسها:قلبي يعورني
بهاج رفع حاجبينه والتفت:حسافه لو جرح سطحي كان ساعدتك بأدويتي
ابتسمت من مزحه بوقت غير مناسب:بهاج !
ابتسم من نبرة عتابها ولف لها:بكيتي صح ؟
هزت راسها بالنفي وبهاج كمل:ما اصدقك
أنهار:كنت ببكي بس تذكرتك
بهاج:تذكرتيني ؟ وش صار ؟
أنهار:انت قلت لي لا تبكين
بهاج:اكثر شي سمعتيه من يوم وصلتي هنا
أنهار نزلت راسها وضمت يدينها وميلت راسها ونزل انظاره من شم ريحة عطرها من جديد والتفت يناظرها
ناظرته أنهار:لا تقول
مارد بهاج وكملت أنهار:ماقدرت اخذت شاور من زعلي وخرجت هنا على طول
بهاج عقد حاجبينه ورفعت كتوفها أنهار:ماقدرت انتظر لين شعري ينشف
بهاج:ابو سعود انتي خارجه وشعرك غرقان ؟
أنهار:كشفت نفسي ؟
بهاج وقف:ادخلي الله يصلحك ادخلي
أنهار وقفت وناظرته:خايف امرض ؟ عادي ادويتك بتعالجني
ابتسم بضحكه ومشى قبلها:تعالي
مشت جنبه:ما ابغى ادخل
بهاج:بتخلين اختك ؟
أنهار:انا بساعد نورا بس مين يساعدني انا ؟
وقف بهاج بمنتصف الممر وهمس:ادويتي
ابتسمت أنهار وهي تناظره لين ضحكت وابتسم من ضحكتها
تقدمت له واخذت نفس مدت ذراعها لناحيته وحاوطت ذراعه واسندت راسها على كتفه وهي تشد ذراعه لناحيتها وهمست:صارت بخاطري
صد للجهه الثانيه وغمض عيونه من حس ان جسمه يغلي من قربها ومن ريحتها اللي صارت تخالط انفاسه تملي رئته وتفرغها بريحتها
هو ماتعود ولا تخيل ان بينشد ذراعه لذراع بنت
ولها بالذات
رفعت راسها ومن شافته صاد ومغمض عيونه لانت ملامحها وبلعت ريقها من حسّت بنفوره
فلتت يدها عن ذراعه وهي تناظره صاد وعضت شفايفها ومشت قبله
رمش بسرعه من حس انها مشت والتفت يناظرها تمشي لناحية الملحق
ماقدر يلحقها بقى واقف محله هو يعرف انها عفويتها وطبعها تحب القرب تحب الاحتواء بس هي تعذبه بطبعها
دخلت الملحق وقفلت الباب بضيق رمت جاكيتها يمينها وهي تجلس بيجامتها عارية الاكتاف
هي حتى يوم جربت تكون بعفويتها رفضها بهاج بطريقه زعلتها
كل اللي حسته انها تبغى احد يحتويها ومو اي احد بهاج بالذات بس عرفت انها اندفعت وهو ما وده وباين عليه ماوده
مشى بخطوات هاديه للملحق ودق الباب اللي انفتح وتقدم يفتحه ويدخل بحذر
التفتت من شافته يدخل ورجع بخطوه لورا وهو يرفع يده:شفته مفتوح
رفعت كتفها بهدوء:جاي عشان نورا ؟
هز راسه وهو يصد بأنظاره بخوف ان عمر يطلع له بأي لحظه هو وده يلف عليها يقولها تلبس شي لكنها ساهيه تناظره بدون ما تنتبه
لف لها يناظرها تناظره ولا فهم من نظراتها شي هو كل تركيزها انها قدامه وتحتاج للحشمه
همس وهو يأشر على كتوفها:البسي ودليني
التفتت تناظر الجاكيت يمينها ووقفت وهي تلبسه وتضم جسمها وتمشي له
تعدته تمشي لغرفتهم ودقت الباب ودخلت
رفعت راسها ريوف:كويس جيتي كلميها
لفت أنهار لنورا اللي متغطيه بفراشها وهمست:بهاج بيكلمها
ريوف جلست ودخل بهاج يناظرهم والتفت يناظر فراش نورا
تنهد وهو يناظرها متخبيه بفراشها وناظرريوف اللي ميلت شفايفها بزعل
مد كيس ادويته لأنهار وعينه على نورا اخذته من بين كفه ووقفت عند الباب تناظرهم
مشى بهاج وجلس قدامها:نورا قومي بتكلم معاك
ماردت عليه وبهاج نطق يرفع صوته:بتقومين وبتطالعين فيني قومي نتكلم
ريوف:نورا بليز
نورا همست ببحة بكاء واضحه:ما ابغى خلوني لحالي
رفع راسه بهاج يناظر أنهار اللي واقفه وعقد حاجبينه:انتم تلازمون البكاء ملازمة ظلالكم ؟
ماردت أنهار ولف لنورا:ما بتبكين قومي اتكلم معك قبل يجي ابوك
جلست ومسحت وجهها وهي تبعد شعرها هي لا زالت بفستانها ومكياجها
ناظر دموعها وانهيارها:ليه تبكين ؟
ناظرته نورا بضيق:كل هذا وتسأل ؟
بهاج:تبكين عشانه ؟ كانه يبيك بيرجع لك ليه تبكين؟
نورا:ما يرد علي من اول اتصل عليه ما يرد زعل لانهم طردوه
بهاج:ما طردوه ، واكيد ما بيرد الحين هو معصب واهله يضغطون عليه لاختلى بنفسه بيرد عليك
نورا ناظرته بضيق وهمست بخوف:واذا مارد ؟
رفع حاجبينه بهاج:باللعنه
ماردت وهي تناظره وكمل بهاج:لا تبين اللي ما يبيك ، دام باعك من اول مصيبه لا تدورين عليه ، وان كانه يبيك ورجال والله ليجيك ولو ردوه مليون مره
نورا:مو بس ابكي عشانه ابكي لان بابا وقف بوجه فرحتي سمع كلام العجوز ووقف بنصيبي وفرحتي
صدت أنهار بضيق من طاري عمر
واخذ نفس بهاج:مدري وش ارقع لابوك بس مرده يرجع لعقله انتم بناته ما بيخليكم
ريوف:ما بيخلينا وما بيخلينا نكون مبسوطين اصلاً
بهاج التفت وناظرها وطاح شماغه من على كتفه
نورا ناظرت الدم اللي على ياقة ثوبه وهمست:تعورت ؟
أنهار ناظرته من التفت وتقدمت لهم:بابا ضاربه
نورا لفت بصدمه:والله بهاج ؟
بهاج:ما صار شي جرحي ما التأم بس
أنهار:ليش ما تقول ؟ يعني ما بتخلينا نكرهه كذا ؟ ضربه لان بهاج وقف بوجههم كلهم يوم غلطوا
ريوف:بابا ما يمد يده !
نورا:هذا مو ابونا اصلاً ابونا تركناه بجده وجينا هنا ، مستحيل اصدق انه هو مستحيل
أنهار لفت من شافت عمر يتقدم لغرفتهم ورفع راسه بهاج وبلع ريقه وهو يشوف حليمه تمشي معاه
دخل الغرفه وعقد حاجبينه:عسى ماشر !
وقف وهو ياخذ شماغه وناظره:جيت اطمن بس
عمر تقدم له:تطمن على من ؟
بهاج:البنات
عمر:بأي صفه ؟ داخل البيت وداخل الغرفه وجالس وسط مفارش نومهم ؟
بهاج رفع حاجبه من تلميحه وهمس:حسبة خواتي ياعمي !
عمر تقدم له:تعقب
جمدت ملامح بهاج وناظره عمر:لاهم خواتك ولا لك شغل فيهم فكنا منك واذلف لا تتدخل بيني وبين بناتي
أنهار:كويس باقي بناتك !
عمر:أنهار ! فكينا من لسانك
تقدمت برعب وهي تدخل بينهم خوفاً من التوتر اللي يشحن الغرفه وهمست:ما بيتدخل ان شاء الله
التفت لامه اللي نطقت والتفت عمر لها:ياليت تعلمينه يا أم بهاج كود ربي يهديه منك
حليمه مسكت ذراع بهاج وناظرها وهمس:ماغلطت !
عمر:اسمع من امك واطلع
حليمه بلعت ريقها وهي تسحب ذراعه وسحب نفسه ووقف قدامها بصدمه:يطردني ؟
حليمه:بهاج اطلع
بهاج ارتفعت حرارة جسمه من وقوف امه خلف عمر اللي امامه
يناظرها وشاد على يده وهمس:ما بتحرمني من امي
عمر:محد اخذ امك عنك انا اتكلم عن بناتي
بهاج تلفت اعصابه من وجود امه خلف عمر ونطق بحده يناظر عمر:محد بيرعاك لا طحت بشيخوختك الا بناتك بس ما ظنتي بعد ما بكيتهم الليله
عمر تقدم له وهمس بغضب:لا تحرضهم
بهاج:تهقى انا بكلمتين بحرضهم ! قبل تدخل يتعازمون من يكرهك اكثر ، امش وراهم خل تربيتك كلها تروح بسبة أشناب أشباه الرجال
عمر رفع سبابته بتحذير:تراهم جدك وعمامك امسك لسانك لا اعورك
بهاج لاحظ عصبية عمر وانه نجح ينرفزه وابتسم بهدوء ورفع يدينه:اضرب
حليمه مسكت ذراع عمر برجفه وخوف:تكفى
بهاج ابتسم بضحكه:وقفوا بوجه ابوك عشان يحاموني ما بيحموني من ذراعك ؟
سكت عمر وهو يراقب ابتسامة بهاج هو يحس بغليان دمه والتفت من وقفت نورا خلف بهاج تأكد كلام بهاج
وابتسم بهاج يناظر عمر ورفع حاجبينه
عمر همس:امك طالق ان دخلت هالبيت مره ثانيه
جمدت ملامح بهاج وتلاشت ابتسامته وناظر امه اللي نشف دمها برعب وخوف
بلع ريقه بهاج وهو يناظر امه ولفت حليمه لبهاج بعدم صبر:اطلع بهاج اطلع
بهاج:مو ما تبينه ؟ مو تمشين ببيته بجلالك ؟ هو حتى ما لاحظ وجودك هنا ، ليه خايفه يطلقك؟
عمر التفت لحليمه ونطقت بخوف:بهاج !
بهاج:انتي مغصوبه عليه !!
حليمه:بهاج
بهاج ناظر عمر اللي بلحظه ابتسم لحليمه اللي تتخبى خلف ظهره والتفت لبهاج يناظره
مشى بعصبيه وخرج من الغرفه ولفوا يناظرون عمر اللي لف ذراعه حوالين كتف حليمه:اتركيه يعرف غلطه
لف لنورا اللي واقفه بفستانها امامه وصد بأنظاره بسرعه وسحب حليمه بذراعه يخرجون تحت انظارهم
نزلت انظارها لكيس الادويه اللي بيدها وسمعت بعد ما دخلوا غرفتهم بكاء نورا بحرقه
ونطقت ريوف بصدمه:ليش يسوي كذا ببهاج ؟ ليش ما يبغاه يساعدنا ؟
رفعت راسها تناظرهم ولمت نفسها وخرجت من عندهم خرجت من الملحق تمشي لعنده